Amalayo Ayali no Kufikilishiwa
Imbila nsuma iya Bufumu bwa kwa Lesa ilebilwa mwi sonde lyonse nga fintu Yesu asobele. (Mateo 24:14) Ibuuku lya mu Baibolo ilya kwa Daniele lilanda ukuti ubu Ubufumu, buteko bwa kwa Lesa. Mu cipandwa 2 ice buuku lya kwa Daniele mwaliba amasesemo ayalanda pa mabuteko nelyo amabufumu ya bantunse ayalumbwike sana, ukutendekela no buteko bwa Babiloni ukushinta ku mabuteko ya muno nshiku. Icikomo 44 calisobele ifikalacitika ku ntanshi, citila:
“Lesa wa mu muulu akemya ubufumu ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse, kabili bwena bukeminina umuyayaya.”
Ubu ubusesemo e lyo na masesemo yambi aya mu Baibolo yalisobela ukuti Ubufumu bwa kwa Lesa bukafumyapo amabuteko ya bantu kabili bukalenga ifintu pa calo fikawame kabili pakabe umutende. Bushe ifintu fikaba shani ilyo Ubufumu bwa kwa Lesa bukalateka? Aya e malayo yamo ayali no kufikilishiwa nomba line.
TAKWAKABE INKONDO
Amalumbo 46:9: “[Lesa] alelenga inkondo ukupwa ukufika ku mpela sha pano isonde. Ubuta abukontola kabili aputaula ne fumo; Aoca na maceleta mu mulilo.”
Tontonkanyeni pa fyo icalo cingaba nga ca kuti indalama isho abantu babomfya pa kupanga ifyanso fya nkondo baleshibomfya ku kwafwa abantu mu nshita ya kubepaya. Ubu ubulayo buli no kufikilishiwa ilyo Ubufumu bwa kwa Lesa bukalateka.
TAKWAKABE UKULWALA
Esaya 33:24: “Takuli umwikashi uukatila: ‘Nindwala.’”
Tontonkanyeni pa fyo mu calo mukawama ilyo mushakabe amalwele pamo nga ubulwele bwa ku mutima, kansa, ubulwele bwa mpepo e lyo na malwele yambi. Takwakabe ifipatala ne miti kabili abantu bonse pe sonde bakaba no bumi ubusuma.
TAKWAKABE IFIPOWE
Amalumbo 72:16: “Ingano shikafula nga nshi pano isonde; Pa muulu wa mpili shikafula icine cine.”
Mu calo mukaba ifya kulya ifingi ica kuti takwakabe umuntu uushakakwate ifya kulya. Takwakabe ifipowe nelyo amalwele ya nsala.
TAKWAKABE UKUKALIPWA, UKULOOSHA NO KUFWA
Ukusokolola 21:4: “[Lesa] akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”
Ifi fyonse nga tafyakabeko, ninshi abantu bakaba abapwililika kabili bakekala umuyayaya mu paradaise pa calo. Ifi e fyo Kabumba wesu uwatutemwa, Yehova Lesa atulaya.
“CIKACITA ICO MFWAYA”
Bushe mulatwishika nga ca kuti aya amalayo yakafikilishiwa? Nangu ca kuti abantu abengi kuti batemwa nga ca kuti ifintu ifisuma ifyo Baibolo yatulaya fyafikilishiwa, abengi balafilwa ukusumina ukutila abantu kuti baikala umuyayaya. Ici te kuti citupapushe pantu takwaba umuntu uwaikalapo umuyayaya pa kuti atwebe ifyo ukwikala umuyayaya kwaba.
Abantunse balitekwa ubusha ku lubembu na ku mfwa kabili balakalipwa, balacula, kabili baliba mu mafya pa myaka iingi ica kuti abengi bamona kwati ifi fine e fyo abantu bafwile fye ukulaikala. Nomba ifi te fyo Kabumba wesu, Yehova Lesa, alefwaya ukuti abantu baleikala.
Lesa alitweba ifilenga twashininkisha ukuti fyonse ifyo atulaya fikafikilishiwa ilyo atile: “Tacakabwelele kuli ine ukwabula ukucita nangu cimo, lelo cikacita ico mfwaya, kabili cikafikilisha ico nacitumina.”—Esaya 55:11.
Baibolo ilondolola ukuti Yehova ni Lesa “uushingabepa.” (Tito 1:2) Apo alilaya ukuti akatucitila ifintu ifisuma ku ntanshi, kuti cawama ukulayipusha ukuti: Bushe ca cine abantu kuti baikala umuyayaya muli Paradaise pano calo nga fintu Lesa atulaya? Finshi tulingile ukucita pa kuti tukanonkelemo mu malayo ya kwa Lesa? Ifipande fikonkelepo fyalayasuka aya amepusho.