Ukukakatila ku Nshita sha Kulongana

¹ Ukukumana capamo lyonse ku kulongana kwa cilonganino caba kupayanya kwabamo kutemwa ukufuma kuli Yehova. Caba na kabili lishuko ilyo tulingile ukuteesa pa nshita shonse. Naciletwa ku kusakamana kwesu, nangu cibe fyo, ukuti mu filonganino fimo, ukulongana kulateululwa kabili inshita shimo ukufumishiwapo mupwilapo ku kufyantikapo imibombele ya kukokoloka nelyo imbi. Bushe ici kuti caba icalinga? Bushe cilabelebesha ukutesekesha kwashika kuli uku kupayanya ukwafuma kuli Yehova Lesa?

² Ukulongana kwa cilonganino kwaba lubali lwakatama ulwa kupepa kwa cine. Twalikambishiwa na Yehova ukulongana lyonse. (Heb. 10:24, 25) Lintu inshita sha kulongana shapampamikwa ku cilonganino, shilingile ukukakatilwako. Tatulingile nangu pamo ukutelula ukulongana nelyo ukufumyapo kwene pa mulandu wa mibombele iili yonse iya kukokoloka, amenga nelyo ifililo. Ifyangalo filingile ukutantikwa pa tushita tumbi ukucila pa nshita icilonganino catantika ku kupepa kwa cilonganino. Nga ca kuti, pa mulandu wa mibele, tapali baeluda abalipo ku kupeela ilyashi lya cintubwingi nelyo ukutungulula isambililo lya Ulupungu lwa kwa Kalinda, umubomfi utumikila uwafikapo kuti aikatilila. Isambililo lya Ulupungu lwa kwa Kalinda, nangu cibe shani, lilingile ukutungululwa ku kumwenamo kwa filundwa fishele ifya cilonganino na balesekelela.—1 Kor. 14:40.

³ Mu mulungu wa Cibukisho na lintu kuliko ukulongana kwa citungu, Ibumba Litungulula ilingi line lilapeela ubutungulushi ukukuma ku kulongana, nampo nga kulingile ukutelulwa nelyo ukufumishiwapo. Balilangilila na kabili ukuti lintu ubushiku bwa kulongana kwaibela butantikilwe pa Cibelushi, ukulongana kwa pa Mulungu kulingile ukubako nga pe. Nga ca kuti ukulongana kwaibela kwabako pa Mulungu, ukusupawila kwe sambililo lya Ulupungu lwa kwa Kalinda kukapeelwa pa kulongana kwa bushiku bumo ku kumwenamo kwa bonse abakasangwako. Ifilonganino filingile ukukakatila mu kupalamisha ku butungulushi bwa musango yo ukufuma kwi Bumba Litungulula mu kulundana no kulongana ukucitwa mu kati ka isho nshita.

⁴ E co, natutwalilile ukusungilila imimwene yakatama iya nshita shesu isha kulongana kabili mu kukosa ukukakatila kuli shene. Pa muulu wa fyonse, natuleba lyonse pa kulongana kwesu ku ‘kucincimushanya ku kutemwa na ku milimo isuma ilyo tulemona ubushiku bulepalama.’—Heb. 10:24, 25.