Ukukumana kwa Mulimo wa mwi Bala Ukwabamo Bupilibulo
1 Pali Luka 10:1-11, twalikwate calembwa ica kukumana uko Yesu akwete na basambi bapya abatuminwe 70 ku kubaafwa ukuipekanishisha ku mulimo wa mwi bala. Apayenye ubutungulushi bwa kulungatika ku kubaafwa ukuba abateyanishiwa, ukupekanya cintu baali no kusosa, no kubomba ne mibele yaafya. Kuti twasambilila pa kubebeta ubu bulondoloshi.
2 Mu kumonekesha abasambi bonse 70 e po baali pa kukumana na Yesu. Inshita ikalamba ilapooswa pa kukumana kwa mulimo nga ca kuti abantu bamo mu cibelesho besa mu kucelwa. Ukufika kwabo mu kucelwa ilingi line kucilengo kufwaikwa ukuteyanya cipya cipya amabumba pamo pene no kupeelwa kwa fifulo fya kubombelamo. Ici ilingi line cilenga ibumba lyonse apo lipelele ukuceeleshiwa. Ifwe bonse kuti twabomba ulubali lwesu pa kufika mu nshita no kuipekanya ukuya mu kwangufyanya ku cifulo ca kubombelamo.
3 Yesu apeele ibumba ilyashi lya kulungatika ilya kulanshanyapo ilya kubomfya, ukulilumbula, “ubufumu bwa kwa Lesa.” (Luka 10:9) Twalipeelwa umulimo wa kushimikila ubukombe bumo bwine, kabili ilingi line tulatesekesha imitubululo imo iya kwaafwa pa cintu tulingile ukusosa. Katungulula kuti pambi alosha ku citabo ca Ukupelulula, icipeela ukucila pa mitendekele 40 na Malembo yalinga ayengabomfiwa mu mibele yalekanalekana. Ukupitulukamo ukwipi ukwa mipeelele imo nelyo ibili kuti kwatwaafwa ukukwata icintu cimo mu muntontonkanya ica kusosa, ukutulenga ukusosa mu kuba no kuicetekela kwakulilako pa minshi.
4 Yesu taebele fye abasambi bakwe ica kusosa lelo alibebele ifya kusosa cene. (Luka 10:5, 6) Ifilangililo ifibikwa muli programu wa Kulongana kwa Mulimo fitulanga fintu twingailumbulwila mu kufumamo cimo. Katungulula kuti pambi apituluka mu fyapeelwe pa kulongana kwafumineko no kupeela imitubululo pa fintu fingabomfiwa mu mulimo pali ako kasuba. Icilangililo icipi icapekanishiwa ica mipeelele yaanguka iya mu Malembo kuti catwaafwa ukukolopeka amatontonkanyo yesu no kuyabika mu mashiwi.
5 Yesu na kabili afundile abasambi bakwe pa lwa mibele ya pa lwabo. (Luka 10:7, 8) Katungulula kuti pambi mu nshila imo ine atupeela ubutungulushi bwa kulungatika ukutwafwilisha ukusengauka icili conse icinganasha umulimo wesu. Kuti pambi atusoka pa lwa kukolongana mu fifutu fya misebo nelyo ukupoose nshita ukukansana na bakakaanya. Kuti pambi atucinkulako ulwa kukabila kwa kusunga icalembwa ca ku ŋanda ne ŋanda icalungikwa. Abafyashi kuti pambi bakabila ukucinkulwako pa lwa kwangalila abana babo mu kubamo kusakamana.
6 Abasambi 70 babombele mu kumfwana na makambisho ya kwa Yesu kabili pa numa “babwelele no kusekelela.” (Luka 10:17) Nga ca kuti twaankula ku butungulushi tupokelela pa kukumana kwa mulimo, na ifwe bene kuti twaenekela ukusekelela kwaingilishiwako mu kushimikila ubukombe bwa Bufumu.—Imil. 13:48, 49, 52.