Sungilila Imibele ya Mutima Iyashininkishiwa

¹ Fintu tuli abacincimuka ukubelenga pa lwa kwingilishiwako kushaiwamina ukulecitika mu fyalo ifingi! Nalyo line, natwishiba ukuti mu ncende shimo bakasabankanya ba Bufumu ilingi line balakumanya ukukanayangwako, imisuula, nelyo fye ukukaanya kwa kulungatika ku mulimo wesu uwa kushimikila. Ni shani fintu twingasungilila imibele ya mutima iyashininkishiwa nga ca kuti ici e fintu caba mu cifulo cesu ica kubombelamo? Ni shani fintu twingatandula imibele ya mutima iyapusanako iyo ingatupusula ubuseko bwesu nelyo ukushinshibika ukupimpa kwesu mu mulimo wa kupanga abasambi?

² Imibele ya mutima iyashininkishiwa ikatwaafwa ukusungilila ukushikatala kwesu. Nelyo fye ni pe samba lya mibele ya kwesha, tatulingile ukuleka amatontonkanyo yapusanako ukufubalisha imimwene yesu. Yesu atwimikile ica kumwenako capwililika. Mu kwampanyako bantu abanono nga nshi e bapokelele cintu asambilishe. Abengi baliipunwine pa kusambilisha kwakwe. Alolenkene ne mibele iyo yaeseshe ukushipikisha kwakwe apakalamba nga nshi. Intungulushi sha butotelo shalengulwile umulimo wakwe no kupanga ukumwipaya. Afwishilwe amate, ukuumwa indupi, ukupumiwa, ukufopaulwa, na mu kupelako ukwipaiwa. Nalyo line, asangile ubuseko mu mulimo alebomba. Mulandu nshi? Aishibe ubucindami bwa kucita ukufwaya kwa kwa Lesa, kabili talekele.—Yoh. 4:34; 13:17; Heb. 12:2.

³ Sungilila Imimwene Yalinga iya Butumikishi Bwesu: Pa kucite ci, tulekabila ukusunga ifya kusangwilako fyafulilako mu muntontonkanya. Ibukisha ukuti twalikwata ubukombe ubo abantu abengi basuula nelyo ukukaanya. (Mat. 13:14, 15) Nangu ca kuti abatumwa balikambishiwe mu bulashi ukuleka ukusambilisha pa cishinte ce shina lya kwa Yesu, batwalilile ukuba aba busumino ku kutumwa kwabo ukwa kushimikila, kabili ukulobolola kwatwalilile ukucitika. (Imil. 5:28, 29; 6:7) Twalishibila libela ukuti, mu fifulo fya kubombelamo fimo, mu kulinganyako bantu banono fye bakakutika. (Mat. 7:14) E ico, tulakwata umulandu wa kusekelela nga ca kuti umuntu fye umo mu cifulo cesu ica kubombelamo akwata ukutwi ukumfwa. Ibukisha, na kabili, ukuti nelyo fye ni abo abakaanya bafwile ukupeelwa ishuko lya mu nshita ilya kukutika. (Esek. 33:8) Bakakaanya bamo mu kupelako balaaluka no kusanguka bakapepa ba kwa Yehova. Lintu bwamonwa mu kulinga, lyene, ubutumikishi bwesu butuletela ukuyumfwa kwa kupwilikisha, nangu cingati banono fye balekutika. Ukubapo kwesu kwine pa minshi mu kuba no bukombe bwa Bufumu bwa kwa Lesa buba bunte.—Esek. 2:4, 5.

⁴ Twalikwata umulandu usuma uwa kuyumfwila abashininkishiwa mu mimwene yesu. Ulubanda lwa mulimo wa mu kusaalala kwa calo no bushininkisho buleingilishiwako ubwa kupalamisha kwa bucushi bukalamba filingile ukukunta ifwe bonse ukucita apapela amaka yesu ukubomba mu kuba no kuipeelesha kwa bukapepa. (2 Pet. 3:11, 14) Imibombele yapimpa mu kati ka August ikaba ni nshila ishaiwamina iya kulangilamo ukutesekesha kwesu ukwa co tulesambilila. Na kabili tulefwaya abalebishanya na ifwe abapya ukulangisha imibele ya mutima iyashininkishiwa ukulola ku kubomfya cintu balesambilila. Nga ca kuti bamo aba basambi besu aba Baibolo nabalunduluka ku cipimo ca kuba abaiteyanya ukuba bakasabankanya bashabatishiwa, umweshi wa August kuti waba uwawamisha ukubaleka ukutampa.

⁵ Nampo nga tulebomba nga bakasabankanya nelyo nga bapainiya, ifwe bonse tulaafwiwa nga ca kuti twasunga mu muntontonkanya ukuti cintu Yehova afwaya kuli ifwe tacayafisha. (1 Yoh. 5:3) Alaya ukututungilila. (Heb. 13:5b, 6) Te mulandu ne misuula ya cintubwingi, ukukanayangwako, nelyo ukukaanya, tufwile ukuba abaishininkisha no kutwalilila ukushimikila pa mulandu wa kuti caba kufwaya kwa kwa Lesa ukuti tucite fyo.—1 Tim. 2:3, 4.