Muleba Abacincila Ilyo Mulebila Imbila Nsuma Nga Fintu Yesu Ali

1. Cinshi cimo icalenga pabe ubupusano pali fwe babomfi ba kwa Yehova na bantu abaitunga ukuba Abena Kristu?

CIMO icalenga pabe ubupusano pali fwe babomfi ba kwa Yehova na bantu abaitunga ukuba Abena Kristu, fintu tuba abacincilaa ilyo tulebomba imilimo ya kwa Yehova. (Tito 2:14) Nomba inshita shimo kuti camukosela ukuba abacincila mu mulimo wa kubila imbila nsuma. Nalimo na imwe mumfwa ifyo eluda umo uubombesha omfwa. Alandile ati, “Inshita shimo ng’umfwa fye ukuti nshilefwaya ukuya mu kubila imbila nsuma.”

2. Finshi fingalenga inshita shimo catukosela ukutwalilila ukuba abacincila mu kubila imbila nsuma?

² Nalimo kuti twatemwapo ukubomba imilimo imo iya kwa Yehova, ukucila ifyo twatemwa umulimo wa kuya mu kubila imbila nsuma. Cinshi cingalenga? Nalimo icingalenga ca kuti tulamona bwangu ifisuma ififuma mu milimo imo pamo nga umulimo wa makuule, umulimo wa kwafwilisha abaponenwe no busanso ubukalamba nelyo ififumamo nga twakoselesha aba bwananyina. Tulatemwa nga tulebombela pamo na ba bwananyina mu mutende kabili tulalanga ukuti twalitemwana. Tuleshiba no kuti aba bwananyina balatasha pa fyo tubacitila. Nomba limo kuti twalibila imbila nsuma mu cifulo cimo pa myaka iingi, lelo abantu fye abanono e bakutika. Nelyo kuti twabila ku bantu abashilefwaya ukukutika imbila nsuma. Na kabili twalishiba ukuti ilyo tuleya tulepalama ku mpela ya cino calo, abantu abengi tabakalakutika imbila nsuma. (Mat. 10:22) Finshi twingacita pa kuti tutwalilile ukuba abacincila, na pa kuti tulundeko ukuba abacincila ilyo tulebila imbila nsuma?

3. Bushe amashiwi yaba pali Luka 13:​6-9, yalangilila shani ukuti Yesu ali uwacincila?

³ Kuti twasambilila kuli Yesu ifya kuba abacincila ilyo tulebila imbila nsuma. Ilyo ali pano isonde, alitwalilile ukuba uwacincila mu kubila imbila nsuma. Na kuba alebombesha muli uyu mulimo. (Belengeni Luka 13:​6-9.) Mu cilangililo ico Yesu alandile, aipashenye ku mulimi uwatwalilile ukusakamana icimuti ca makunyu pa myaka itatu, nangu ca kuti tacaletwala amakunyu. Yesu alibilile imbila nsuma ku baYuda nalimo pa myaka itatu. Lelo abengi tabalekutika. Na lyo line, alitwalilile ukubila imbila nsuma kuli bena. Ali kwati ni ulya umulimi uwatwalilile ukucetekela ukuti icimuti ca makunyu cali no kutwala ifisabo. Na kuba, alebombesha pa kuti abaYuda basumine imbila nsuma iyo alebila kuli bena.

4. Fintu nshi 4 ifyo twingasambilila kuli Yesu?

⁴ Muli cino cipande twalasambilila pa fyo Yesu alangile ukuti ali uwacincila mu kubila imbila nsuma, maka maka ilyo kwashele imyeshi 6 ukuti afwe. Nga twasambilila ku fyo alesambilisha kabili nga twalamupashanya, kuti twatwalilila ukuba abacincila. Natulande pa fintu 4 ifyo twingasambililako kuli Yesu: (1) Abikile amano ku kucita ifyo Yehova alefwaya ukuti acite, (2) alibikile amano ku masesemo ya mu Baibo, (3) ashintilile pali Yehova pa kuti alemwafwa, na (4) alitwalilile ukusubila ukuti abantu bamo bali no kukutika kuli ena.

ABIKILE AMANO KU KUCITA IFYO YEHOVA AFWAYA

5. Bushe Yesu alangile shani ukuti ico abikile pa ntanshi kucita ifyo Lesa afwaya?

⁵ Yesu aleba uwacincila ilyo alebila “imbila ya Bufumu” pantu alishibe ukuti uyu e wali umulimo uo Lesa alefwaya ukuti alebomba. (Luka 4:43) Ico Yesu abikile pa ntanshi, mulimo wa kubila imbila nsuma. Na lintu kwashele imyeshi iinono ukuti afwe, “alepita mu misumba na mu mishi alesambilisha abantu.” (Luka 13:22) Alisambilishe na basambi na bambi ifya kubila imbila nsuma.—Luka 10:1.

6. Bushe imilimo yonse iyo tubombela Yehova, yakuma shani umulimo wa kubila imbila nsuma? (Moneni ne cikope.)

⁶ Na muno nshiku mwine, umulimo uwacindamisha uo Yehova na Yesu bafwaya tulebomba, mulimo wa kubila imbila nsuma. (Mat. 24:14; 28:​19, 20) Imilimo yonse iyo tubombela Yehova, itungilila umulimo wa kubila imbila nsuma. Ku ca kumwenako, tulakuula ifikuulwa fya cilonganino ca kwa Yehova, nelyo tulabombela pa Bethel pa kuti tuletungilila umulimo wa kubila imbila nsuma. Nga ca kuti aba bwananyina baponenwa no busanso ubukalamba, tulabapeela ifyo balekabila pa kuti batendeke ukulongana no kubila imbila nsuma na kabili. Nga tuleibukisha ukuti umulimo wa kubila imbila nsuma walicindama, no kuti e mulimo uo Yehova afwaya ukuti tulebomba, tukalafwaisha ukulabomba uyu mulimo lyonse. Ba János, baeluda ba ku Hungary batile: “Lyonse ndaibukishako ukuti pa milimo yonse iyo tubombela Yehova, tapaba umulimo uwacila umulimo wa kubila imbila nsuma.”

7. Mulandu nshi Yehova afwaila twatwalilila ukubila imbila nsuma? (1 Timote 2:​3, 4)

⁷ Kuti twatwalilila ukuba abacincila nga tulemona abantu nge fyo Yehova abamona. Afwaya abantu abengi bakutika imbila nsuma, bafwaya no kusambilila icine pali ena. (Belengeni 1 Timote 2:​3, 4.) E mulandu wine atusambilishisha ifya kubomba bwino uyu mulimo uukalenga abantu bakapusuke. Ku ca kumwenako, muli broshuwa iitila Muletemwa Abantu—Mulelenga Baba Abasambi, mwaliba ifyo twingalacita pa kutendeka ukulanshanya na bantu pa kuti twingatendeka ukubasambilisha Baibo. Nangu ca kuti abantu tabatampile ukubombela Yehova pali ino nshita, nalimo kuti baisatampa ukumubombela ilyo ubucushi bukalamba bushilapwa. Ifyo tubeba pali ino nshita, nalimo e fingalenga baisafwaya ukusambilila icine ku ntanshi. Lelo ifi kuti fyaisacitika fye nga ca kuti twatwalilila ukubila imbila nsuma kuli bena.

ALIBIKILE AMANO KU MASESEMO YA MU BAIBO

8. Masesemo nshi aya mu Baibo ayalengele ukuti Yesu alebomfya bwino inshita yakwe?

⁸ Yesu alishibe ifyo amasesemo ya mu Baibo yali no kufikilishiwa. Alishibe ukuti ali no kubomba umulimo wakwe uwa kubila imbila nsuma pa myaka fye itatu ne myeshi 6. (Dan. 9:​26, 27) Na kabili alishibe ifyo amasesemo yalandile pa nshita ali no kufwilapo, na pa fyo ali no kufwa. (Luka 18:​31-34) Ifyo Yesu aishibe pa masesemo fyalengele alabomfya bwino inshita. Ici calengele abe uwacincila ilyo alebomba umulimo uo Yehova amupeele.

9. Mulandu nshi amasesemo yalengela twaba abacincila ilyo tulebila imbila nsuma?

⁹ Na ifwe bene nga twaumfwikisha amasesemo ya mu Baibo, kuti twaba abacincila pa kubila imbila nsuma. Twalishiba ukuti cino calo cili ku mpela. Baibo yalisobele ifintu ifyali no kulacitika mu nshiku sha kulekelesha. Yalisobele na pa mibele iyo abantu bali no kukwata, kabili ifyo yasobele filefikilishiwa muno nshiku. Na kabili yalisobele ukuti “mu nshita ya ku mpela,” imfumu ya ku kapinda ka ku kuso ne mfumu ya ku kapinda ka ku kulyo shikalalwishanya. Twalishiba ukuti ishi imfumu ishilwishanya, buteko bwa Anglo-America ubwakwatisha amaka pano isonde e lyo ne calo ca Russia ne fyalo ifitungilila ici calo. (Dan. 11:40) Twalishiba no kuti amakasa ya cimpashanya ico ibuuku lya kwa Daniele 2:​43-45 lyalandapo, yemininako ubuteko bwa Anglo-America. Twalishininkisha ukuti nomba line, Ubufumu bwa kwa Lesa buli no kulofya amabuteko ya bantunse yonse. Aya amasesemo yonse yalangilila ukuti tuli ku mpela sana ya cino calo, kabili yalenga twaba abacincila ilyo tulebila imbila nsuma.

10. Masesemo nshi ya mu Baibo ayengalenga twatwalilila ukuba abacincila ilyo tulebila imbila nsuma?

¹⁰ Na kabili, mu masesemo ya mu Baibo, mwaliba imbila iyo tufwaisha ukulabila ku bantu. Ba Carrie, bankashi ba ku Dominican Republic batile: “Ifintu ifisuma ifyo Yehova atulaya filalenga ndefwaisha ukusambilisha abantu icine.” Balandile no kuti: “Nga namona amafya ayo abantu bakwata, ndeluka ukuti te ine neka Yehova alaya aya malayo, lelo alaya fye abantu bonse.” Amasesemo ya mu Baibo yalangilila ukuti Yehova e utwafwa pa kuti tulebila imbila nsuma, kabili ici cilenga tuletwalilila ukubomba uyu mulimo. Ba Leila, abekala ku calo ca Hungary batile: “Amashiwi yaba pali Esaya 11:​6-9 yalalenga ndefwaisha ukulabila imbila nsuma na ku bantu abamoneka ukuti nalimo te kuti bafwaye ukukutika imbila nsuma. Nalishiba ukuti umuntu onse kuti ayaluka nga ca kuti Yehova amwafwa.” Munyinefwe Christopher uwa mu Zambia na o atile: “Nga fintu Baibo yasobela pali Marko 13:​10, imbila nsuma ilebilwa mwi sonde lyonse, kabili ng’umfwa ukuti Yehova alincindamika ifi ansuminisha ukubombako uyu mulimo.” Masesemo nshi aya mu Baibo ayalenga muleba abacincila ilyo mulebila imbila nsuma?

ALESHINTILILA PALI YEHOVA

11. Cinshi twingalandila ukuti Yesu alingile ukushintilila pali Yehova pa kuti engatwalilila ukuba uwacincila pa kubila imbila nsuma? (Luka 12:​49, 53)

¹¹ Yesu alicetekele ukuti Yehova ali no kulamwafwa pa kuti engatwalilila ukubila imbila nsuma. Yesu talekalifya abantu ilyo alebila imbila nsuma. Lelo alishibe ukuti imbila iyo alebila yali no kulenga abantu bakalipa. (Belengeni Luka 12:​49, 53.) Intungulushi sha mapepo tashatemenwe imbila iyo Yesu alebila. E ico pa miku iingi shalefwaya ukumwipaya. (Yoh. 8:59; 10:​31, 39) Lelo Yesu alitwalilile ukubila pantu alishibe ukuti Yehova ali nankwe. Alandile ati: “Nshaba neka, lelo Tata uwantumine aba na ine. . . . Tandeka neka iyo, pantu lyonse ncita ifya kumusekesha.”—Yoh. 8:​16, 29.

12. Bushe Yesu asambilishe abasambi bakwe ukucita finshi pa kuti bengatwalilila ukubila imbila nsuma na lintu abantu balebacusha?

¹² Yesu asambilishe abasambi bakwe ukutila kuti bashintilila pali Yehova pa kuti engalabafwa. Pa miku iingi abebele ukuti Yehova ali no kulabafwa na lintu abantu balebacusha. (Mat. 10:​18-20; Luka 12:​11, 12) Apo alishibe ukuti abantu abengi tabali no kulasumina ukukutika imbila nsuma, akonkomeshe abasambi bakwe ukuti balingile ukuba abacenjela. (Mat. 10:16; Luka 10:3) Abebele ukuti tabalingile ukulapatikisha abantu abashalefwaya ukumfwa imbila nsuma. (Luka 10:​10, 11) Abebele no kuti balingile ukufulumuka nga ca kuti abantu batendeka ukubacusha. (Mat. 10:23) Nangu ca kuti Yesu aleba uwacincila pa kubila imbila nsuma kabili alicetekele Yehova, taleibika mu kapoosa mweo na apashilingile.—Yoh. 11:​53, 54.

13. Cinshi cingalenga mwashininkisha ukuti Yehova akalamwafwa?

¹³ Na muno nshiku mwine, abantu bakalakaana ukumfwa imbila nsuma. Kanshi pa kuti tutwalilile ukubila kuli bena, kano Yehova atwafwa. (Ukus. 12:17) Cinshi cingalenga mwashininkisha ukuti Yehova akalamwafwa? Natulande pe pepo ilyo Yesu apepele ilyaba mwi buuku lya kwa Yohane icipandwa 17. Muli ili ipepo, Yesu alombele Yehova ukuti alecingilila abatumwa bakwe. Yehova alyaswike ili ipepo. Ibuuku lya Imilimo lilanda pa fyo Yehova ayafwile abatumwa pa kuti bengatwalilila ukubila imbila nsuma, nangu ca kuti abantu balebacusha. Na kabili muli ili ipepo, Yesu alombele Yehova ukuti alecingilila abali no kusumina ifyo abatumwa balebila. Na imwe bene mwaba pa bantu abo Yesu apepeleko. Yehova taleka ukwasuka ipepo ilyo Yesu apepele. Akalamwafwa nga filya fine aleafwa abatumwa.—Yoh. 17:​11, 15, 20.

14. Finshi fyalenga tushininkishe ukutila kuti twatwalilila ukuba abacincila pa kubila imbila nsuma nangu tukwate amafya? (Moneni ne cikope.)

¹⁴ Ilyo impela ya cino calo ileya ilepalama, cikalakoselako ukutwalilila ukuba abacincila pa kubila imbila nsuma. Lelo Yesu atulaile ukuti Yehova akalatwafwa pa kuti twingatwalilila ukubila imbila nsuma. (Luka 21:​12-15) Nga fintu Yesu na batumwa balecita, na ifwe bene tatupatikisha abantu ukumfwa imbila nsuma kabili tatufwaya ukulaumana nabo. Na mu fyalo umo aba bwananyina bashakwata sana ubuntungwa bwa kubila imbila nsuma, balatwalilila ukubila pantu bashintilila pali Yehova, te pa mano yabo. Mu nshita ya batumwa, Yehova alepeela ababomfi bakwe amaka. Ifi fine e fyo acita na muno nshiku. Alatupeela amaka pantu afwaya ‘tulebila sana imbila nsuma.’ (2 Tim. 4:17) Kuti mwacetekela ukuti nga mwatwalilila ukushintilila pali Yehova, mukatwalilila ukuba abacincila pa kubila imbila nsuma.

ALICETEKELE UKUTI BAMO BALI NO KUKUTIKA IMBILA NSUMA

15. Finshi filanga ukuti Yesu alicetekele ukuti abantu bamo bali no kukutika imbila nsuma?

¹⁵ Yesu alicetekele ukuti abantu bamo abo alebilako imbila nsuma bali no kulakutika. Ici calengele atwalilile ukuba uwacincila ilyo alebila imbila nsuma. Ku ca kumwenako, ku kupwa kwa mwaka wa 30, Yesu alimwene ukuti abantu abengi balefwaya ukumfwa imbila nsuma, kabili abalingenye ku fisabo ifipiile mwi bala. (Yoh. 4:35) Ilyo papitile nalimo umwaka umo, aebele abatumwa bakwe ukuti “umulimo wa kulobolola ukalamba.” (Mat. 9:​37, 38) Inshita imbi alandile ati: “Umulimo wa kulobolola ukalamba. . . . Lombeni Umwine wa mulimo wa kulobolola ukuti atume ababomfi mu mulimo wakwe.” (Luka 10:2) Yesu alitwalilile ukucetekela ukuti abantu bamo bali no kumfwa imbila nsuma kabili alesekelela nga basumina ukukutika.—Luka 10:21.

16. Bushe ifilangililo fibili ifyo Yesu alandile, fyalangile shani ukuti Yesu alicetekele ukuti abantu bali no kulakutika imbila nsuma? (Luka 13:​18-21) (Moneni ne cikope.)

¹⁶ Yesu asambilishe abasambi bakwe ukuti balingile ukucetekela ukuti abantu kuti bafwaya ukumfwa imbila nsuma, kabili ifi abasambilishe fyali no kulenga batwalilila ukuba abacincila. Ku ca kumwenako, natulandeko pa filangililo fibili ifyo Yesu alandile. (Belengeni Luka 13:​18-21.) Mu cilangililo cimo, Yesu alingenye imbila nsuma ya Bufumu ku kaluseke akanono sana akamenene no kuba icimuti icikalamba. Ici calepilibula ukuti abantu abengi bali no kulakutika imbila nsuma kabili takwali nangu cimo icali no kulesha uyu mulimo. Mu cilangililo cimbi, Yesu alandile pa citutumushi pa kulangilila ifyo imbila nsuma yali no kusalanganina mwi sonde, na pa fyo yali no kulenga abantu ba-aluka nangu ca kuti abantu bambi tabali no kumona ukuti nabaluka ilyo line. Ifi Yesu aebele abasambi bakwe fyalengele baishiba ukuti imbila iyo bali no kulabila yali no kwafwa abantu abengi.

17. Mulandu nshi tulingile ukulamwena ukutila abantu kuti baumfwa imbila nsuma?

¹⁷ Nga twamona ifyo imbila nsuma ilelenga abantu abengi ba-aluka, tulatwalilila ukubila. Cila mwaka abantu abengi balesa mu kulongana kwa Cibukisho kabili balasumina ukubasambilisha Baibo. Na kabili cila mwaka abantu abengi balabatishiwa, kabili nabo bene balatendeka ukubila imbila nsuma. Kwena tatwaishiba nga bantu banga bakasumina ukumfwa imbila nsuma iyo tubila, lelo twalishiba ukuti Yehova acili alelonganika ibumba ilikalamba ilya bantu abakapusuka ubucushi bukalamba ubuli no kwisa. (Ukus. 7:​9, 14) Tufwile ukutwalilila ukubila imbila nsuma, pantu umwine wa mulimo wa kulobolola alitwalilila ukucetekela ukuti kuli abantu na bambi abengi abengafwaya ukumfwa imbila nsuma.

18. Finshi tufwaya abantu baishiba nga batumona tulebila imbila nsuma?

¹⁸ Abasambi ba kwa Yesu baishibikilwa ku fyo baba abacincila mu mulimo wa kubila imbila nsuma. Ilyo abantu bamwene ifyo abatumwa bali abashipa pa kulanda, “baishileishiba ukuti aba bantu baali pamo na Yesu.” (Imil. 4:13) Na ifwe bene nga tuleba abashipa kabili abacincila pa kubila imbila nsuma, abantu bakalamona ukuti tupashanya Yesu uwali uwacincila mu kubila imbila nsuma.