Umukululo wa Cipusho
◼ Kupempwila nshi kukabilwa pa kubomba mu cifulo ca kubombelamo ica busanso?
1 Ku cipimo cakulilako, tulomfwa amalipoti ya lukaakala, ukusansa, ne mpokota, ukucilisha mu ncende sha mu matauni. Nangu ca kuti tulayumfwa abasakamikwa, twalishiba ukuti nelyo fye ni mu ncende shabamo impokota, mwaliba abafumaluka abakankulako ku bukombe bwa Bufumu. E co pa nshita yalinga, tufwile ukukwata ubukose bwa kuya ku ntanshi, ukuba abacetekela ulwa kulinda kwabamo ukusakamana ukwa kwa Yehova.—Amapi. 29:25; 1 Tes. 2:2.
2 Lintu twaya mu cifulo ico icingabamo ubusanso, Yehova atwenekela ukuba abacenjela no kubomfya ubupingushi busuma. Beni abapempwila. “Uwacenjela amono bubi no kubelama; abapelwa amano bapitapo no kukandwa.” (Amapi. 22:3) Bakasabankanya babelesha balatasha ubusuma bwa kubomba capamo babili babili nelyo fye mu mabumba ya bakasabankanya bafulilako, nga cakabilwa. Lukala Milandu 4:9, 12 alondololo kuti: “Ukuba babili kwawamo kucila ukuba weka . . . Nge cipondo cayansho uli eka, babili kuti bacilwisha.” Ifipondo ilingi line fifwaya abo abali beka na muli ifyo abayanguko ukushukila.
3 Beni abasakamanishisha pa lwa kupita mu mpito sha fikuulwa umwafiita na mu matabo yashipitwamo libili libili. Beni abacenjela pa lwa kulaalikwa ukwingila mu mayanda yamo nelyo imiputule. Te kwesha ukupaashanya na bo abalemoneka aba cintiinya nelyo abalesonsomba. Angufyanyeni ukuishibisha nge Nte sha kwa Yehova. Bakasabankanya bamo lyonse balasenda Baibolo nelyo magazini wa Ulupungu lwa kwa Kalinda atemwa Loleni! ku minwe ku kwishibikilwako.
4 Pempwileni ku bantu abo abelepeta muli iyo ncende. Cenjeleni pa lwa kwingila mu cikwepe na bambi abashilemoneka nga bekala pali ico cikuulwa. Mwilafwala ifibekobeko fyaumo mutengo. Nga muli mwi bala ilyo pafiitileko, sengaukeni ukwenda mu misebo yabulwamo amalaiti umushilepita abengi. Nga waba icinakabupalu ca kusansa, wikaana nga ca kuti ico balefwaya fye ni ndalama ne fikwatwa fyobe; ubumi bobe bwalicilapo umutengo pa cili conse ico wakwata.—Marko 8:36.
5 Bamunyina abaletungulula balekabila ukuba abapempwila, lyonse ukwishiba ukuli bakasabankanya ilyo balebomba muli ico cifulo ca kubombelamo. Ilingi line caliba icawamisha ukusungilila ibumba mu ncende imo ine pa kuti bambi bali lwa mupepi. Nga ca kuti kwabako ulukaakala ululi lonse nelyo ukupumfyanya mu bwina mupalamano, ibumba lilingile ukufuma muli ico cifulo ca kubombelamo ilyo line.
6 Nga ca kuti tuli abacenjela kabili abapempwila, kuti twatwalilila ukufika ku bekala mu ncende shaisulamo ulukaakala “abateta no kulila pa fya muselu fyonse ifilecitwa.”—Esek. 9:4.