Amapaalo Yafuma mu Kubomba na Bambi
1 Bushe uyumfwe fyo kwaliba ubunonshi wingaipakisha mu kubomba na bambi mu butumikishi? Yesu e fintu ayumfwile. Nangu ca kuti ukulobolola kwena kwali ukukalamba kabili ababomfi balicepele, atumine abasambi 70 ukuya “babili babili” mwi bala. Mwandi ni nshita ya kulambula iyo bonse bene bakwete ukushimikila “ku mushi onse ne mpanga yonse uko alaswa aye umwine”!—Luka 10:1, 17; Mat. 9:37.
2 Caliba ca kucincimusha ukubomba na bambi. Bamo aba ifwe twaliba aba nsoni kabili tulacisanga icakosa ukutununuka abo tushaishiba. Ukubomba na umbi kuti pambi kwatupeela ukuicetekela kwa kusosa Icebo ca kwa Lesa mu kuba no kushipa. Lintu tuli no muntu umbi, kuti pambi catwangukila ukubomba umulimo mu nshila twakanshiwilwamo. (Amapi. 27:17) Umuntu wa mano atile: “Ukuba babili kwawamo kucila ukuba weka.”—Luk. Mil. 4:9.
3 Cisuma ukubomba na bakasabankanya balekanalekana na bapainiya. Bakabomba banankwe aba mu mulimo aba mutumwa Paulo basanshisheko Barnaba, Sila, Timote, na Yohane Marko, kabili baliipakishe amapaalo ayengi ilintu baleshimikila capamo. E fintu cingaba ne lelo. Bushe walibombapo na umo uwaba mu cine pa nshita yalepa? Pa numa ya kumona ukulamuka kwakwe mu kucitilo bunte, mu kupalishako walikopako inshila shisuma isho shakwaafwako ukuwamyako. Bushe waliyapo na bakasabankanya abapyako? Lyene kuti pambi wali na maka ya kwakana na bene fimo ifyo wasambilila na muli ifyo kuti pambi walibaafwile ukuba abacilapo ukufumamo cimo kabili ukusanga ubuseko bwakulilako mu butumikishi bwabo.
4 Bushe pali ino nshita uletungulula isambililo lya Baibolo? Nga ni fyo, mulandu nshi te kulaalikila umo uwa baeluda nelyo kangalila wa muputule ukuya nobe? Caliba ica kunonsha ku basambi besu aba Baibolo ukubeleshanya na bakangalila. Nga ca kuti uleshimunuka mu kutungulula isambililo pa menso ya kwa eluda, napamo kuti aba uwaitemenwa ukutungulula lyene no kukuleka ukumona. Pa numa, yumfwe umuntungwa ukumwipusha ulwa mitubululo pa lwa fintu wingaafwa umusambi ukulunduluka mu kwangufyanya nga nshi.
5 Ba uwa kukoselesha kuli abo ubomba na bo. Ba uwa kukoselesha mu kulanda kobe pa lwa cifulo ca kubombelamo. Te kwesha ukwamba bambi nelyo ukuilishanya pa lwa mitantikile ya mu cilonganino. Sungilila umuntontonkanya obe uwatontomesha pa butumikishi na pa mapaalo yafuma kuli Yehova. Nga wacite fyo, bonse babili iwe no yo mulebomba nankwe mukabwelela ku sha myenu abapembesulwa.
6 Imibele yobe napamo kuti yacilenga ukuba icayafya ukubomba lyonse na bamunyina bambi ne nkashi. Nangu cibe fyo, nga cingacitika, mulandu nshi ushingatantikila ukukwata inshita ya kubomba na bakasabankanya bambi? Bonse babili mukapaalwa!—Rom. 1:11, 12.