Kuuleni Icitetekelo mu Cebo ca kwa Lesa
1 Amamilioni ya bantu balisumina ukuti Baibolo Cebo ca kwa Lesa. Bambi abengi basumina muli fimbi ifiitwa amabuuku yashila. Kwalibako abo abashashininkisha pa cintu bengasuminamo. Icitabo Baibolo—Cebo ca kwa Lesa Nelyo ca Muntu? calembelwa abantu bonse aba musango yo. Ulu lupapulo lulangilila Baibolo nga fintu fye yaba. Imifwaile ya ici citabo yaba kwaafwa abantu ukumona ukuti Baibolo Cebo ca kwa Lesa. Cilanda pa milandu iingi no kusuusha imilandile ya bufi iya balengulula Icebo ca kwa Lesa. Cipeela amasuko ya kwikusha ku mepusho ayengi. Mu mweshi wa June, tukalalangisha ici citabo cishaiwamina.
2 Abantu abengi ababelengapo icitabo ca Cebo ca kwa Lesa balisumina ukuti cilalondolola Baibolo mu kuibela. Umwanakashi umo mu United States of America uwalandile ukuti alifwayafwaya umutende wa muntontonkanya mu mipepele pa numa ya kubelenga ici citabo asosele ukuti: “Ukufika fye na pa myeshi cinekonsekonse iyapitapo, natontonkenye ukuti nshakatale nsanga uyo mutende. . . . Kasuba kamo cibusa wandi Nte ampeele icitabo iciitwa Baibolo—Cebo ca kwa Lesa Nelyo ca Muntu? Nshatala njipakishapo icitabo nge fyo njipakishe ici. Mu kushininkisha ni cimo ca mu mpapulo shawamisha isha Watch Tower Society.” Kalata ukufuma ku Buffalo, New York yatile: “E lyo mpwishishe fye ukubelenga icitabo Baibolo—Cebo ca kwa Lesa Nelyo ca Muntu? Tacilanda fye pa kulengulula kwa bantu konse ukwa Baibolo lelo na kabili cilalondolola mu kulengama umulandu ilingile ukupokelelwa nge Cebo ca kwa Lesa.” E co kuti twaba abashininkisha ukuti na bambi na bo bakatesekesha ici citabo.
3 Kuti pambi wapingulapo ukubomfya imipeelele iipi pamo nge yi:
◼ “Tuleikala mu calo umuli impika shacilishapo kufula ukucila pa nshila sha kupikulula. Impendwa shileingilishiwako isha bantu balekunkuma ku miti ikola. Amamilioni ayengi balaala insala. Umwela tupeema na menshi tunwa panono panono filekoweshiwa. Pa nshita imo ine, fwe baletitikishiwa ku misoka tuleya tulefulilako. Bushe muletontonkanya impika sha musango yu shikatala ashipikululwa? [Leka asuke.] Ubushinino bwamwenekesha bukosha ubulondoloshi bwa Baibolo ubwa kwa Kabumba uwaba te wa maka fye lelo na kabili uwatutemwisha.” Belenga 2 Petro 3:13, kabili mu kwipifya londolola ifyo caba mifwaile yakwe ukulenga isonde lyonse ukwisulamo ubulungami.
4 Nga ulefwaya ukufika pa cishinka mu kwangufyanya, kuti pambi watila:
◼ “Bushe mwalitala amulangulukapo pali ici cipusho?” Sonta ku mutwe wa lyashi, kupukula pe bula 11, belenga ifipusho mu paragrafu 17, no kulondololo kuti ici citabo cilapayanya ifyasuko fya kwikusha.
5 Nelyo kuti pambi waeshako iyi nshila:
◼ “Bushe mwalitala amulangulukapo nampo nga sayansi alishinina Baibolo ukuti yaliluba? Ku ca kumwenako, basayantisti bamo balipampamina pa kuti isonde lyafumine ku kupuulika kwakulisha ukwa mu bubumbo. Muletipo shani? [Leka asuke.] Baibolo isambilisha ukuti Lesa abumbile isonde ngo mushi wa pe na pe. Lyalipusanako na maplaneti yambi ayashinguluka akasuba kesu. Ukulingana na fintu twaishiba, e planeti eka fye mu kubumbwa konse uwakwata ukupayanya kwapaka ukukabilwa ku kutungilila ubumi.” Kupukula pa paragrafu 6 pe bula 100 kabili londolola umulandu sayansi ashingashinina ukuti Baibolo yaliluba.
6 Inshila imbi kuti pambi yapala kuli iyi:
◼ “Abantu bamo batontonkanyo kuti ifipesha amano ifyacitilwe na Yesu tafyacitike mu cine cine. Batungo kuti ifipesha amano fiba kutoba kwe funde lya mu cifyalilwa no kuti taficitika mu nshiku shesu. Muletontonkanyapo shani pa lwa ico?” Leka asuke. Londolola icalandwa mu paragrafu 33 pe bula 86 kabili lyene belenga Mateo 19:26 ukulangililo kuti ifipesha amano fyalicitike mu cine cine. “Ici citabo cilebebeta ubwingi bwa bushinino ubwaba mu Baibolo na ku nse ubushininkisho kuti Baibolo caba Cebo ca kwa Lesa.” Losha ku mutande wa filimo pe bula 3, no kulondolola ifipandwa fimo ifya kusekesha.
7 Ici citabo kuti calete paalo ku bantu bafumaluka ababepwa kuli abo abashatetekela mu Cebo ca kwa Lesa. Ifyebo fyakwatamo ifishinka ifyaba mu citabo ca Cebo ca kwa Lesa kuti fyayafwa abantu ba musango yo ukukula mu kutesekesha Kabumba wesu, uyo mu kubamo kutemwa atupayanishishe ibuuku lyawamisha.