Afwa Abashatetekela
1 Muli ino nkulo yesu, calipokelelwa ukumonwa pamo nga uwasambilila kabili uulunduluka mu kutontonkanya. Amano ya buntunse ne fifundisho fya mutunganya filalumbilishiwa, ilintu amano ya bulesa ayashimpwa pa Cebo ca kwa Lesa, Baibolo, yalasuulwa. Abantu bafumaluka abasekelela mu fishinka na mu cine calondoloka bakapokelela ishuko lya kubebeta icitabo Baibolo—Cebo ca kwa Lesa Nelyo ca Muntu? Ici citabo kuti caafwa abashatetekela. (Heb. 11:6) Shininkisho kubwelela kuli bonse abalangisho buseko.
2 Kuti pambi watendeka ukulanshanya kwenu muli iyi nshila:
◼ “Ndesubila mwalishibo kuti abantu bamo bafwilisha imfundo ya kuti Baibolo yalembelwe fye no muntu. Tabasumina Baibolo ukube Cebo ca kwa Lesa. Muyumfwa shani pa lwa ico? [Leka asuke.] Te mulandu na cintu abantu bengasuminamo, Baibolo yaliishininkishe ine ukuba iyashintililwapo ne ya cine. Ku ca kumwenako tulande pali planeti wesu uwe sonde. Pa myanda ya myaka iingi abantu basumine ukuti isonde lyali ilyabatama no kuti lyashintilile ku cintu cimo; pali nomba twalishiba ukuti uyo wali mutunganya wapelebela uushashimpilwe pa cishinka. Nangu cibe fyo, ilyo abantu bashilaletako uko kwelenganya kwa bufi, Baibolo kale kale yali nailanda ukuti isonde ‘lyakobeme apashaba kantu.’ Belenga paragrafu 2 pe bula 99, kabili lyene lanshanyeni Yobo 26:7.
3 Nelyo kuti pambi wabomfya iyi nshila lintu wabwelelako:
◼ “Calibe caseeka ukukumanya abantu abashasumina mu Cebo ca kwa Lesa, Baibolo. Muletontonkanya mulandu nshi abantu bafule fi bafililwa ukukwate citetekelo muli Lesa? [Leka asuke.] Abengi bapeela umulandu wa kukanatetekela kwabo ku kwingilishiwako kwa kutiinya ukwa lukaakala no kupelelwa mu calo. Bapelulula ukuti nga ca kuti kwalibako Lesa wa maka yonse, mulandu nshi ashapwishisha ukucula konse uku? Abo abashisanga icasuko ca kwikusha kuli ico cipusho ilingi line tabafwaya ukumonamo na muli Baibolo. Lelo kwalibako ubushinino bukalamba ubwa kuti Lesa e ntulo ya Baibolo no kuti umutima wakwe ulasekelela mu mutundu wa muntu. Ukupitila muli Baibolo, alilaya ukulenga isonde ukuba cifulo ca nsansa no mutende.” Twalilileni ukulanshanya pa kubomfya Ilumbo 37:9-11.
4 Ninshi nawikata Baibolo obe mu minwe, kuti pambi watendeka ukulanshanya pa kusoso kuti:
◼ “Tuletandala na kabili ku kulondolola umulandu ukusambilila Baibolo kubelele cintu icibomba mu nshita yesu. Abantu abengi balikwata Baibolo, lelo banono fye e bapaatulako inshita ukuibelenga. Bamo mu bufumacumi balatweba ukuti tabacetekela sana muli Baibolo na kabili. Muleyumfwa shani pa lwa ico? [Leka asuke.] Cimo ica fintu filanga ukuti Baibolo Cebo ca kwa Lesa icapuutwamo caba kufikilishiwa kwa masesemo ya iko.” Losha ku Malembo mu paragrafu 3 pe bula 135.
5 Ili tontonkanyo kuti pambi lyaletako ukwankulako kwawama:
◼ “Kuti twamona ukuyemba na maka ya Baibolo ilyo twalanguluka abo abasambilila no kubomfya ukufunda kwa iko. Ici ca kucitika cishaiwamina e ca kumwenako calingisha.” Belenga ica kucitika mu maparagrafu 5 na 6 pa mabula 176-7. Londolola fintu ici citabo cipayanya ifyasuko fya kwikusha ku fipusho fyakatama pa lwa Baibolo.
6 Kuti twaleta ipaalo kuli bambi pa kubomfya ici citabo ku kubaafwa ukusanga ishintililo lyakosa ilya kutetekela mu Cebo ca kwa Lesa, Baibolo.