Shimikila mu Kushilimuka
1 Ukushilimuka cifwaya ukuti tumfwikishepo fimo pa lwa bantu tushimikilako. Mulandu nshi? Pa mulandu wa kuti ukutunguluka kwesu mu kufika pa mitima ya bantu kwashintilila pa kulamuka kwesu ukwa kupeela ubukombe bwa Bufumu mu nshila iyo iibacebusha. Mu mweshi wa January, tukalatambika ifitabo fya kusambililamo Baibolo ifyalekanalekana ifyo pambi icilonganino cicili nacikwata. Nga te ifyo ninshi bakasabankanya bali no kubomfya icitabo Insansa—Ifya Kushisanga. Imitubululo yakonkapo kuti pambi yaba iya kwaafwa.
2 Nga ca kuti wasalapo ukubomfya icitabo “Insansa—Ifya Kushisanga,” kuti watambika cene mu kulungatika pa kulondolola mu kwipifya ukuti:
◼ “Napamo pa nshita imo mwalyumfwapo inumbwilo ya kuti, ‘Insansa kulila fye apo washisanga.’ Lelo ndi uwashininkisha ifyo mulesuminishanya na ine ukuti imipelulwile ya musango yo tayafwa sana apantu bonse tatusanga insansa ishingi mu calo ilelo. [Leka mwine ŋanda alandepo.] Baibolo yalaya insansa kuli abo abatukuta ukubomfya ifishinte fya iko ifyalungama mu bumi bwabo. Bakasapika ba muno nshiku abengi na baishibisha ifya kwampana kwa buntunse balasuminisha umupwilapo cintu Baibolo yalandile kale sana. Ku ca kumwenako, . . . [Lumbula icishinka ico wasoobwela libela ico uletontonkanya ifyo kuti cacebusha mwine ŋanda, pamo nga amabula 58-61 nelyo 65 na 66.] Ici citabo kuti camulanga ico mulekabila ukucita pa kunonkelamo mu cintu Lesa ali no kucita. Kuti natemwa ukumushiila cene pali K800.00.”
3 Lintu ulebomfya icitabo ca “Ukulenga Ubumi bwa Lupwa Lobe ubwa Nsansa,” kuti pambi wasose capale ci:
◼ “Bushe tamulesuminisha ukuti indupwa sha ndakai shilelolenkana na mafya ayo ayashaliko mu nkulo shapita? [Leka asuke.] Ukulingana ne fyo mwishibe, mulandu nshi ici cilecitikila? [Suminisha icasuko cakwe. Kupukula pali 2 Timote 3:1-3 no kubelenga.] Inumbwilo sha kuti ‘aba bucintomfwa ku bafyashi’ na ‘abaumalala’ shilelondolola bwino bwino ifili abantu abengi muli lelo. Nangu cibe fyo, Lesa umo wine uwasobele ishi mpika na kabili alitupeela ubutungulushi busuma pa fya kwikatanya ulupwa capamo.” Belenga paragrafu ukufuma kuli “Bakasabankanya” pe bula 2. Leka asuke, tambika icitabo.
4 Inshila na imbi iingabomfiwa mu kuba ne citabo ca “Insansa—Ifya Kushisanga,” iletendekela ne ci cipusho:
◼ “Abantu abengi ilelo bacetekelo kuti Lesa mu cituntulu tapoosako amano kuli ifwe fwe bantunse pe sonde no kuti takacitepo nangu cimo pa lwa mpika shabapo. Bushe e fintu na imwe mutontonkanya? [Leka asuke.] Lekeni mubelengeleko cintu ici ica kwaafwa ukusambilila Baibolo cisosa pa lwa mifwaile ya kwa Lesa ukulola ku muntu ne sonde. [Belenga paragrafu 19 pe bula 189 na paragrafu 20 pe bula 190.] Ndemwebekesha ukuti, kwalibako umulandu usuma uo Lesa asuminishisha amafya ayo yabako pe sonde. Nga mulefwaya ukwishiba uyu wine mulandu, napaapaata mubelenge ici citabo, icikwete umutwe wa kuti Insansa—Ifya Kushisanga.” Nga ca kuti umuntu atemwa ifyebo, tambika icitabo.
5 Ngo ulefwaya ukulanda mu kwipifya ukubomfya icitabo ca “Umutelelwe wa mu Kusalala kwa Calo pe Samba lya kwa ‘Cilolo wa Mutende,’” kuti wakupukula icitabo pe bula 4 no kwipusha ukuti:
◼ “Cinshi cikacitika kuli planeti we Sonde? Abengi balepusha ici cipusho. Bushe muletontonkanya likatala aliba paradise?” Kutikisha icasuko ca kwa mwine ŋanda, kabili lyene belenga ifyebo fya kwiswila pe bula 2. Tambika icitabo.
6 Ukushilimuka kukatulenga ukwishiba ifyo abantu tukumanya bakabila na fintu batemwisha. Amapinda 16:23 yatwebekesha ulwa ici, ukusoso kuti: “Umutima wa wa mano ulenga akanwa kakwe [ukushilimuka, NW], no kulundako ukukolopeka ku milomo yakwe.”