Bwelelako ku Kupususha Bamo
1 Caba kufwaya kwa kwa Lesa ukuti ‘abantu [ba misango yonse, NW] bapusuke no kufika ku kwishibe Cine.’ (1 Tim. 2:4) Cinshi twingacita ku kubaafwa? Bwelelako mu kuba ne mifwaile ya kusambilisha icine. Cinshi uli no kusosa? Imitubululo yakonkapo kuti pambi yakwafwa.
2 Lintu uletandalila umuntu uwapokelele icitabo “Insansa—Ifya Kushisanga,” kuti na kabili walosha ku fishinka pa mabula 58-61, 65 na 66 no kwipusha mwine ŋanda ukuti:
◼ “Pa numa ya kubebeta icitabo namushilile mu kulundapo no kutontonkanya pa bulayo bwa kwa Lesa ubwe sonde lya paradise, muleyumfwa shani pa lwa aya malayo yashaiwamina ayo Lesa alaya umutundu wa muntu?” Pa numa ya kukutika icasuko ca kwa mwine ŋanda no kulandapo mu kwipifya, kuti pambi wayalukila ku cipandwa calenga 5 no kutubulula ukuti mulanguluke ifyo umuntu engabomba ne mpika sha mu bumi mu kutunguluka.
3 Nga ca kuti washile mwine ŋanda alelanguluka icalenga ukuti Lesa asuminishe ububifi, ilyo wabwelelako kuti pambi watendeka ukulanshanya pa kusoso kuti:
◼ “Naliipakishe ukulanshanya kwesu lintu twakumene pa muku wa kubalilapo, kabili nalefwaya ukubwela ku kumona ico mwasangile ukuba e mulandu Lesa asuminishisha icimfulumfulu no lukakaala ifyo fyaba mu calo ilelo. [Leka asuke. Alukila ku maparagrafu 1 na 2 no kuyabelenga pe bula 131 mu citabo ca Insansa.] Mona ukuti icipandwa cikonkelepo mu citabo cikwete umutwe uuli mu cipusho uuleti, ‘Bushe ‘Ukupwa kwa Calo’ kuli Mupepi?’ Napamo kuti twalanshanya icasuko kuli ici cipusho ilyo nkamutandalila na kabili.”
4 Kuti pambi wakonkanyapo ukwashalikwe icitabo ca “Ukulenga Ubumi bwa Lupwa Lobe ubwa Nsansa” pa kubomfya iyi nshila:
◼ “Lintu namutandalile pa muku wa kubalilapo, nalitemenwe ukumona ifyo mwaba abayangwako pa lwa lupwa lwenu. Apo tuleikala mu nshiku sha kulekelesha isha micitile ibifi iya fintu, cili icakatama ku ndupwa ukutwalilila ukupekanishisha inshita ya ku ntanshi. Pa kucite co, icitabo namushilile, Ukulenga Ubumi bwa Lupwa Lobe ubwa Nsansa, citubulula sana ukulasambilila Baibolo lyonse mu ŋanda. [Belenga paragrafu 10 pa mabula 185-6.] Kuti natemwa ukupoosako fye baminiti banono ukumulangilila ifyo abantu mu fyalo mupepi na 200 basambilila Baibolo mu mayanda nga mabumba ya ndupwa.” Nge nshita yasuminisha, bomfya ifyebo pe samba lya kamutwe kanono pe bula 71 ku kulangilila ifya kusambilila.
5 Kuti wabwelela apo washalike icitabo ca “Umutelelwe wa mu Kusalala kwa Calo” no kusosa ukuti:
◼ “Nalefwaya ukubwela ku kumulanga ifyafulilako pa lwa mifwaile ya kwa Lesa kuli lino isonde.” Alukila ku mabula 172-3, belenga Ukusokolola 21:3, 4, kabili lyene mu kwipifya londolola ifyo Ubufumu bwa kwa Lesa bukafikilisha ubu bulayo. Tambika isambililo lya Baibolo ilya pa fye ilya mu ŋanda.
6 Ibukisha ukuti ubuyo bobe mu kucite fipempu fya kubwelelamo bwa kutampa amasambililo ya Baibolo. Icitabo cipya, Ukwishiba Uko Kutungulula ku Mweo wa Muyayaya, ukucilisha capekanishiwa ku kutungululamo amasambililo. Lintu twabwelela uko twashalike ifitabo fya kale no kutampa isambililo, kuti cawama ukwalwila ukusakamana kuli ici citabo cipya. Tukasanga ubuseko bwafulilako ilyo abalesambilila baishiba ukwita pali Yehova kwi pusukilo.—Imil. 2:21.