Ifya Kulubula Inshita

¹ Ukupikintika mu mulimo wa kwa Yehova kulatulenga ukupamfiwa! (1 Kor. 15:58) Twalishiba ico tufwile ukukwatila isambililo lya pa lwesu no kusambilila pamo no lupwa, ukubelenga Baibolo cila bushiku, ukupekanishisha ukulongana kwa cilonganino no kusangwako, no kubombako lyonse mu butumikishi bwa mwi bala. Bakangalila baba no mulimo wa kucema, kabili balabomba ne milimo imbi iya cilonganino. Bamo bakwata imilimo ikalamba mu lupwa ne milimo imbi iyo bafwile ukubombela bambi. Pa kuti fye fyonse fibombwe bwino, bonse tukabila ukushikatala no kuiteyanya bwino.

² Imikeni Ifya Kucita Intanshi: Pa kuti fye ‘tulubule nshita’ kano tuli no mucetekanya no kupingula bwino pa fintu. (Efes. 5:15, 16) Tulekabila ukwishiba “ifyacilamo” no kufibika pa muulu wa mutande wa fyo tufwile ukucita. (Fil. 1:10) Abaupana bamo balondolwele imibele yabo iya bulesa pa ng’anda ati: “Icine e cayandatila imikalile yesu . . . Icine tacaba lubali lwa bumi bwesu, e bumi bwesu. Icine calikuma fye fyonse ifyo tucita.” Calicindama ukubika intanshi ukupepa Yehova no mulimo wakwe mu mikalile yesu.

³ Ishibeni Ifyonaula Inshita: Mu mulungu mwaba amaawala 168, kabili tukabila ukubomfya bwino inshita tukwete. Pa kusanga inshita ya kubombamo imilimo ya kwa Lesa, tufwile ukwishiba ifyonaula inshita no kukanafikonkelela. Ukufwailisha kumo kwasokolwele ukuti umuntu umukalamba mu United States apoosa amaawala 30 cila mulungu ukutamba TV! Bambi bena bonawila inshita ikalamba ku kubelenga ifitabo fya ku calo. Bamo nakalimo kuti basanga ifyo bapoosa inshita iikalamba ku milimo ya mu bwikashi, ku fya kuleseshamo icitendwe, ku kwangala, nelyo pali kompyuta. Nakalimo tulekabila ukubebeta ifyo tucita cila bushiku no kumona fintu twingabomfya bwino inshita yesu. Ukubomfya amano kufwaya ukuti twalinga inshita intu tubomfya ku fintu fishakatama.

⁴ Pangeni Imitantikile Isuma: Te mulandu ne filetucitikila, umo umo uwa ifwe kuti alubula inshita ya kucitamo ifya ku mupashi. Bamo basanga ukuti ukubuuka bwangu cila bushiku kulabaafwa ukupwishishisha ifingi. Nga tulapoosa inshita ikalamba ukwenda muli bamotoka ukuya ku ncito nelyo ukupembelela bambi, nakalimo kuti twabomfya iyi inshita ku kubelenga Baibolo, ukupekanishisha ukulongana, nelyo ukukutika ku fyebo fyapayanishiwa na Sosaite pa makaseti. Indupwa shilamwenamo apakalamba pa kulubulako inshita yaimikwa iya kusambilila lyonse capamo. Nga ca kuti bonse mu lupwa balesunga inshita pa kwisa kwi sambililo lya lupwa, kulaba ukushako inshita ya kucitako fimbi.

⁵ Cila bushiku ubwapita, tulingile ukwibukila sana ukuti “naipipe nshita iyashalako.” (1 Kor. 7:29) Ubumi bwesu bwaba mu fyo tubomfya inshita ya mutengo iisheleko. Tukapaalwa nga twalubula inshita pa kuti tubike ifya Bufumu intanshi!—Mat. 6:33.