Abantu Bakwatisha Insansa Pano Isonde
1 “[Ba nsansa, NW] abantu abo Yehova e Lesa wabo.” (Amalu. 144:15) Aya mashiwi yalondolola Inte sha kwa Yehova ukuti e bantu bakwatisha insansa pano isonde. Takwaba icawama ngo kubombela Lesa eka uwa cine kabili uwa mweo, Yehova. Apo ni “Lesa [wa nsansa, NW],” abamupepa balanga insansa shakwe. (1 Tim. 1:11) Ni mbali nshi shimo isha kupepa kwesu ishitulenga ukuba ne nsansa?
2 Ico Twabela ne Nsansa: Yesu atwebele ukuti insansa shisa nga tuli “abaibukila ukuti [tulakabila] ifya ku mupashi.” (Mat. 5:3, NW) Ukulasoma lyonse Baibolo no kusangwa ku kulongana konse ukwa Bwina Kristu kulafishapo uku kukabila. Ukusambilila icine ca mu Cebo ca kwa Lesa kwalitulubula ku fisambilisho fya mipepele ya bufi. (Yoh. 8:32) Amalembo na kabili yalitusambilisha imikalile yawamisha. (Esa. 48:17) Ici calenga ukuti tuleipakisha ukubishanya kusuma ukwa Bwina Kristu na bamunyinefwe ababa ne nsansa.—1 Tes. 2:19, 20; 1 Pet. 2:17.
3 Tulamwenamo sana ilyo tuleumfwila ifipimo fya kwa Lesa ifyasumbuka ifya mibele isuma, pantu twalishiba ukuti ici cilatucingilila no kulenga Yehova ukusamwa. (Amapi. 27:11) Kalemba we lyashi umo atile: “Nangu ca kuti kwena balikwata amafunde yakosa, Inte sha kwa Yehova tabamoneka aba bulanda. Bantu ba nsansa. Abaice na bakalamba lyonse bamoneka aba nsansa nga nshi kabili abashikatala.” Kuti twayafwa shani bambi ukuba ne mikalile ya nsansa nge yi twaba na yo?
4 Afweni Bambi Ukusanga Insansa: Mu calo tamuli insansa, kabili abengi tabamona ukuti ku ntanshi kukawama. Lelo, ifwe twalishiba bwino ifyo ku ntanshi kukawama, twalishiba ukuti bushiku bumo ubulanda bonse bukapwa. (Ukus. 21:3, 4) E co tubela abapimpa mu butumikishi, ukufwaya abafumacumi abengakutika pa kuti tubebeko isubilo lyesu ne fyo twasuminamo pali Yehova.—Esek. 9:4.
5 Nkashi umo uuli ni painiya atile: “Takwaba icileta insansa ngo kwafwa abantu ukwishiba Yehova ne cine cakwe.” Shi natubombe ukulingana na maka yesu ukwafwa abengi ukutendeka ukusambilila Baibolo pa mwabo. Ukubombela Yehova no kuipeela ku kwafwa bambi ukumubombela kulaleta insansa shine shine.—Imil. 20:35.