Cindikeni Yehova “Inshiku Shonse”

¹ Pe Ilumbo 145:2 paba ubulayo ubo Imfumu Davidi alaile Yehova, ubwa kuti: “Inshiku shonse ndemucindika, ndetasha ne shina lyenu umuyayaya umuyayaya.” Na ifwe bene twalikwata umulandu wa kucindikila Shifwe wa mu muulu no kumutasha! Lelo ni shani fintu twingapashanya ica kumwenako ca kwa Davidi mu kulumbanya bumulopwe bwa kwa Yehova “inshiku shonse”?

² Ukwisulamo Ukutasha Yehova mu Mitima Yesu: Isambililo lya lyonse ilya Cebo ca kwa Lesa lilalenga ukutasha kwesu Yehova ukukoselako pa fintu atucitila, ifyo aletucitila, na fintu akatucitila. Ilyo tulecililako ukutasha imilimo yakwe iya kusungusha, tukacankwa pa lwa busuma bwakwe. (Ilu. 145:7) Tukafwaisha ukulumbanya Yehova pa kashita akali konse akalinga.

³ Lumbanyeni Yehova mu Kulanshanya kwa Cila Bushiku: Lintu tulelanshanya na bena mupalamano, abo tusambilila na bo ku sukulu, abo tubomba na bo incito, na bo tukumanya cila bushiku, kuti pambi twasanga utushita twa kubebako pa lwe subilo lyesu. Umwina mupalamano kuti pambi atila nasakamikwa pa lwa misoka mu bwikashi; uo tusambilila nankwe ku sukulu kuti aba uwasakamikwa pa lwa kubomfya imiti ikola nelyo bucisenene; uo tubomba nankwe ncito napamo kuti alondolola ifyo aletontonkanya pa lwa mulandu umo uwa bupolitiki. Kuti twalosha ku fishinte na malayo mu Cebo ca kwa Lesa ifyo filanga inshila yalinga iya kukonka nomba na fintu aya mafya yali no kucimfiwa mu kupelako. Amashiwi ya musango yo ayalandwa pa “nshita iyene” kuti yaba lipaalo!—Amapi. 15:23.

⁴ Landeni pa lwa kwa Yehova Inshita Yonse: Umuntu uutasha Yehova apakalamba afwaya ukushimikila imbila nsuma kuli bambi ukufika apo engapesha. (Ilu. 40:8-10) Ukulosha kuli ici, tulingile ukuipusha fwe bene atuti, ‘Bushe ndecita fyonse fintu imibele yandi ingasuminisha?’ Abengi balisanga ukuti mu kuba no kuteuluka kwalinga, baliba na maka ya kubomba nga bapainiya ba nshita yonse. Nga ca kuti imibele ya ndakai tailesuminisha ico, bushe kuti twalembesha ukubomba nga bapainiya ba kwafwilisha? Apantu inshita ya Cibukisho iileisa yaba ni nshita ya mibombele yatanununwa, imyeshi ya March na April kuti yaba ni nshita ishaiwamina ku kwingilishako umulimo wesu pa kubomba bupainiya bwa kwafwilisha.

⁵ Afweni Abapya Ukuilunda Kuli Ifwe mu Kucindika Yehova: Ukusefya Icibukisho ca mfwa ya kwa Yesu kulatwibukisha lyonse ulwa milandu ya kutashishapo Yehova no kulumbanya ishina Lyakwe. Ukucilisha iyi yaba ni nshita isuma iya kukoselesha abasambi ba Baibolo ukuilunda kuli ifwe mu kulanda ku bantu bonse pa lwa bumfumu bwa kwa Yehova. Bacincisheni ukutontonkanya mu kubamo ipepo pa lwa calondololwa mu maparagrafu 7-9 pa mabula 173-5 mu citabo ca Ukwishiba Uko Kutungulula ku Mweo wa Muyayaya. Nga ca kuti bafikapo, tabalingile ukushimunuka pa mulandu wa kuti tababelesha. Bakasabankanya babelesha e po baba aba kubalanga ifyo umulimo wa kushimikila Ubufumu ubombwa. Nga ca kuti abapya bengashipa mu kulanda imbila nsuma, kuti bacetekela ukuti Yehova akabaafwa.—Imil. 4:31; 1 Tes. 2:2.

⁶ Tulanonkelamo fwe bene ku ciyayaya capamo na bambi lintu twafwaya ukucindika Yehova inshiku shonse.