Ni Bani Bakakutika ku Bukombe Bwesu?
1 Ukutula fye apo abantunse babelako aba mweo, takwatala akubako ifyebo fyafulisha nge fi abantu balebelenga ilelo, ifingi ifishacindama kabili ifya kulufya. Pa mulandu wa ico, abengi balitendwa, kabili ciletukosela ukubaafwa ukukutika ku bukombe bwa Bufumu bwa kwa Lesa. Tabomfwikisha fintu ukukutika ku Cebo ca kwa Lesa kwingabanonsha apakalamba.—Luka 11:28.
2 Tulesekelela ukuti mu ncende ishingi isha calo, amakumi ya makana ya bantu ayengi balekutika kuli ubo bukombe kabili balesumina lintu twabepusha ukuti tuletungulula amasambililo ya Baibolo aya mu ŋanda kuli bene. Mu fifulo fya kubombelamo fimbi, nangu cibe fyo, te bengi bankulako nge fyo. Umo tutandala umwingi lintu tuli mu butumikishi, abantu abengi tabankulako bwino, kabili kuti twatwishika nampo nga ni bani bakakutika ku bukombe bwesu.
3 Tufwile ukuibaka ku kufuupulwa. Paulo alondolwele ukuti: “Umuntu onse uwalilila kwi shina lya kwa Shikulu akapusuka. Lelo bakalilila shani ku o . . . bashaumfwile? Lelo bakomfwa shani, apabula kabila? . . . Ifyo calembwa, aciti, Ifyo yayemba amakasa ya balete mbila nsuma iya fisuma!” (Rom. 10:13-15) Nga ca kuti mu mukoosha twatanda imbuto sha Bufumu, Lesa akashimesha muli abo ababa ne mitima ya bufumacumi.—1 Kor. 3:6.
4 Amakii Yaba mu Kuya ku Fipempu fya Kubwelelamo Libili Libili: Mu fifulo fya kubombelamo umo cimoneka ifyo banono bengakutika ku bukombe bwesu, tulekabila ukwangwa ukulundulula ubuseko bwa bantu abali bonse abo twasanga balesekelela, nampo nga twashalikako impapulo nelyo iyo. Mulandu nshi uwa kukwankwanishisha ukusondwelela ukuti takuli nangu cimo icikapwishishiwa? Lintu twatanda imbuto, tatwishiba uko shikashukila. (Luk. Mil. 11:6) Nga ca kuti ilyo twabwelelako tuli abaipekanya ukulanda ku bene mayanda pa cintu cimo ukufuma mu Malembo, nangu fye ni mu kwipifya, nakalimo kuti twafika pa mutima wa uyo muntu. Kuti twasha trakiti nelyo ukutambika bamagazini ba nomba line. Mu kupita kwa nshita, nakalimo kuti twalangilila fintu tutungulula isambililo lya Baibolo. Mu nsansa tukasunguka ukumona fintu Yehova apaala ukubombesha kwesu.—Ilu. 126:5, 6.
5 Trakiti alishalikwe ku mwanakashi uwalemoneka ukuba uwasekelela. Talesangwa pa ŋanda na kabili ukufikila papitile imyeshi ibili, kabili lyene aali uwapamfiwa nga nshi ica kuti te kuti mulanshanye. Trakiti umo wine alishalikwe kuli wene na kabili. Te mulandu no kubombesha kwatwalilila kuli kasabankanya ku kumutandalila pa ŋanda, papitile imyeshi itatu na imbi pa kuti engamusangapo, kabili ukuyasanga fye ukuti alilwele. Nkashi alileko na kabili umulungu wakonkelepo, kabili baimishe ukulanshanya pa lwa trakiti mu kwipifya. Lintu nkashi abweleleko umulungu wakonkelepo, umwanakashi alangishe ubuseko bwine bwine mu bukombe bwa Bufumu. Imibele yayalwike mu bumi bwakwe yamulengele ukuba uwaibukila ulwa kukabila kwakwe ukwa ku mupashi. Isambililo lya Baibolo lyalitendeke, kabili pa numa ya ico alesambilila mu kucincimuka cila mulungu.
6 Ukupala icili conse cintu twingafwaya ukumona cilekula, nampo nga maluba, umusalu, nelyo ubuseko mu bukombe bwa Bufumu, ukukusha kulakabilwa. Ico cilasendako inshita, ukubombesha, umutima wa kusakamana, no mupampamina wa kukanaleka. Umwaka wapwile, ukucila pa bantu 333,300 abo imbuto sha Bufumu shatendekemo ukumena balibatishiwe! Nga ca kuti twatwalilila ukushimikila, mu kushininkisha tukasanga abafulilako abakakutika ku bukombe bwesu.—Linganyeniko Abena Galatia 6:9.