Abantu ba Misango Yonse Bakapusuka
1 Yehova afwaya ‘ukuti abantu ba misango yonse bapusuke no kufika ku kwishiba kwalungikwa ukwa cine.’ (1 Tim. 2:4, NW) Nangu cingati abantu ukufika ku cipimo cimo balasongwa ne fyo bapyana, icikulilo, ne cifulo bekalamo, balikwata ubuntungwa bwa kuisalila kabili umo umo kuti apingulapo fintu engabomfya ubumi bwakwe. Kuti bacita icisuma no kuba aba mweo, nelyo kuti bacita icabipa no kuloba. (Mat. 7:13, 14) Ni shani fintu uku kumfwikisha kwambukila inshila tumwenamo abantu tutununuka ne mbila nsuma iya Bufumu?
2 Tatulingile ukutunganya ukuti icisonga umuntu ukuti asekelele mu cine fyaba fintu pamo nga icikulilo ca mu calo nelyo ica mu lutambi nelyo fintu aishibikwa mu bwikashi. Icine kuti cacebusha napamo aba masomo yanono nelyo ayasumbuka, abaibimba mu fikonkelelo fya bupolitiki, abasoma, bamukaanalesa, abashasumina muli Lesa, nangu fye intalamisoka shalumbuka. Abantu ba mu fikulilo fyonse no bwikashi bonse balyaluka ukufuma ku mibele yabo iya kale kabili nomba bapembelela ubumi mu calo cipya ica kwa Lesa. (Amapi. 11:19) E ico, tatulingile ukushingashinga ukutununuka abantu ba mu nyendelo shonse isha bumi no bukombe bwa Bufumu.
3 Tontonkanyeni Pali Ifi fya Kumwenako: Umwaume umo alepanga ukwipaya wishi umuleshi lelo tamwipeye. Pa numa ya ico apingwilepo ukuipaya lelo alifililwe. Pa numa abikilwe mu cifungo pa mulandu wa kwiba no kushitisha imiti ikola, icupo cakwe calipwile. Ilelo uyu muntu ali mufumacumi kabili aleipakisha icupo ca nsansa capamo no kwampana kusuma na wishi umuleshi. Cinshi calengele ukuti apusaneko? Alisambilile Baibolo ne Nte sha kwa Yehova no kubomfya ifyo alesambilila. Yehova tamulangulwike ukuba umuntu uushingalubulwa.
4 Ukulumbuka kwa mukashana pamo nga uwa fyangalo uwa pa TV takwamulengele ukuba uwa nsansa. Lelo pa numa ya kucebushiwa ku mibele isuma iya Nte, alisumine ukusambilila Baibolo, kabili mu kwangufyanya aleafwa bambi ukusambilila pa lwa mbila nsuma iya Bufumu. Ukuli konse uko aaleya mu butumikishi bwa ku ŋanda ne ŋanda alishibikwe, lelo mu nsansa alondolwele ukuti aalefwaya ukwishibikwa pamo nga umo uwa Nte sha kwa Yehova mu cifulo ca kwishibikwa nga uwa fyangalo.
5 Lintu Nte atantike isambililo lya Baibolo no walembeshe Ulupungu lwa kwa Kalinda, umwina mupalamano alyumfwile pa lwa ico no kusangwa kwi sambililo. Umwina mupalamano mu kwangufyanya alimwene ukuti e cine cintu alefwaya pa nshita yalepa! Wene no mulume wakwe balifuutishe icipope ca kulekana ico bapeelwe kabili baliwikishenye. Aliikobenkenye mu fya kulengula intanda kabili alepupa imipashi, lelo mu kwangufyanya alipoosele ifitabo fyakosa umutengo ne cili conse cimbi ico akwete icalundene no kupupe fibanda. Mu kwangufyanya atendeke ukusangwa ku kulongana no kulanda kuli balupwa bakwe ne fibusa pa lwa cisumino cakwe icipya. Nomba alashimikila kuli bambi mu kucincimuka.
6 Tatulingile ukupingula uuli onse. Mu cifulo ca ico, natushimikile imbila nsuma ku bantu ukuli konse mu kupimpa. Lyonse fye twalicetekela ukuti Yehova, ‘uumona mu mutima,’ akaba ‘Mupusushi wa bantu ba misango yonse.’—1 Sam. 16:7; 1 Tim. 4:10, NW.