Bakabilisha ba Bufumu Bacita Lipoti

Ukufuma ku Kupopomenwa Ukuya ku Nsansa

YEHOVA ni Lesa wa nsansa. (1 Timote 1:11, NW) Afwaya abo bamubombela ukuba aba nsansa na bo bene. E ico, nga ca kuti umo uwa babomfi bakwe ali uwapopomenwa, Yehova akamwaafwa ukushipikisha ukukalipwa kabili pa nshita shimo shimo nangu fye ukunonka cipya cipya umupashi wa nsansa. Icakukumanya cakonkapo ukufuma ku Uruguay cilangilila ici.

Nkashi alepembelela mu kiliniki mu Montevideo ku ca kufumamo ca kubebeta kwa X-ray. Umwanakashi uwaikele mupepi nankwe aali uwatiinishiwa apakalamba ku cintu dokota pambi aali no kumweba pamo nge ca kufumamo ca kubebeta kuntu apitilemo. Nkashi amwebele ukuti ukutula apo fye abela Inte ya kwa Yehova, tabala atiina icili conse. Umwanakashi, nangu cibe fyo, asosele ukuti tatemenwe Inte pantu baenekele icipimo casumbukisha ukufuma ku bantu.

Nkashi lyene amwebele fintu ukwishiba kwa cine ca Baibolo kwamwafwile. Alilufishe umwana mwanakashi wakwe uwa myaka ya bukulu 18 mu mfwa kabili apitile mu mibele ya kupopomenwa kwashika pa myaka cinekonsekonse. Nangula abasambilila ifya mitontonkanishishe nelyo imiti yakosesha umutengo tafyamwafwile ukucimfya uku kupopomenwa. Pa nshita shafulilako, asosele ukuti, alitekelwe mu cipatala, lelo takwali kuwaminako kwafuminemo. Aba mu ŋanda yakwe basakamenwe na babomfi pa mulandu wa kuti umwine tali na maka ya kusakamana icili conse. Aeseshe ukuipaya pa mulandu wa kuti alilufishe ubuseko mu bumi. Takwali nangu cimo icamoneke ukwaafwa.

Lyene, aebele umwanakashi ukuti, ubushiku bumo Inte sha kwa Yehova balimutandalile no kumushiila impapulo shimo isha Baibolo. Ico cabalamwine ubuseko bwakwe mu Cebo ca kwa Lesa, kabili atendeke ukubelenga Baibolo mu kutwalilila. Icintu cimo calitendeke ukwaluka mu kati na nkati kakwe. Atendeke ukushibuka ulucelo no kukwata ubuseko mu ba mu ŋanda yakwe. Mu kupelako apingwilepo ukusakamana iŋanda umwine no kusanga ukuti aali na maka ya kucite fyo. Cali kwati tabalile alwalapo! Ici camulengele ukuyumfwa uwa nsansa nga nshi.

Tabwelele ku wasambilila ifya mitontonkanishishe. Ukufwaya kwakwe ukwa kwikala uwa mweo kwalicincimushiwe ku kwishiba kwakwe Cebo ca kwa Lesa, kabili ici cashininkishe ukuba umuti wawamisha. Afwaile Inte sha kwa Yehova, kabili batendeke isambililo lya Baibolo na wene ilya lyonse. Na kabili atendeke ukusangwa ku kulongana, kabili mu kwangufyanya alibatishiwe. Ukwabulo kucushiwa na kabili no kupopomenwa, nomba alisanga ukusekelela mu kubombela Yehova.

Umwanakashi mu muputule wa kupembelela alekutika mu kusakamanisha. Lyene asosele kuli nkashi ukuti: “Pa nshita shimo, Inte sha kwa Yehova balapita mupepi ne cifulo candi; lelo nga ca kuti ku nshita ya ku ntanshi, ne mwine naba umo uwa Nte sha kwa Yehova, cikaba pa mulandu wa cintu fye wacinjeba. Ukukutika kuli iwe kuli kwati kutendeka ukumona ulubuuto umwafiita.”

Abantu abengi ukushinguluke calo balemona bucafye bwa kwesha ukupikulula impika sha bumi pa lwabo, kabili baleyalukila kuli Yehova Lesa. Fintu baba aba nsansa pa kwishiba ulwa calo cipya icileisa ica kwa Lesa umo uuli onse akaba uwa nsansa, kabili ukupopomenwa kukaba cintu capita!—Amapinda 16:20.