Icibukisho—Ica Kucitika Cacindamisha!

¹ Pa Mulungu, March 23, pa numa ya kuwa kwa kasuba, tukasefya Icibukisho ca mfwa ya kwa Kristu. (Luka 22:19) Mu cine cine ici caba ca kucitika cacindamisha! Ukupitila mu kusungilila bumpomfu kuli Yehova ukufikila imfwa, Yesu ashininkishe ukuti umuntunse kuti asungilila ukuipeela kwa bukapepa nangu fye ni mu kukanshika kwatapata, muli ifyo ukusumbula insambu sha bumulopwe bwa kwa Yehova. (Heb. 5:8) Mu kulundapo, imfwa ya kwa Kristu yapayenye ilambo lya buntunse ilyapwililika ilikabilwa ku kulubula umutundu wa muntu, pa kuti abatetekela bengekala ku ciyayaya. (Yoh. 3:16) Kuti twalangilila ukutesekesha kwesu ukwa kufuma ku mutima ku kutemwa kwa kwa Yehova ne lambo lya kwa Yesu kuli ifwe ukupitila mu kusangwa ku Cibukisho.

² Bonse balekoseleshiwa ukukonka muli programu wa kubelenga Baibolo uyo atantikwa mu March 18-23, nga fintu calangililwa pali Kalenda wa Nte sha kwa Yehova uwa 1997. Na kabili, ukulanshanya kwa lupwa ukwa fipandwa 112-16 mu citabo ca Umuntu Wakulisha Uwabalile Abako Uwa Mweo kukatwaafwa ukutontomesha pa mulungu wacindamisha ukutula apo umuntunse abelapo.

³ Bushe mu nshita ya mwaka iya Cibukisho kuti mwaingilishako inshita mulebomfya mu butumikishi bwa mwi bala? Bakasabankanya abengi bakashukila impela sha mulungu shisano mu March ku kubomba nga bapainiya ba kwafwilisha. Mulandu nshi te kubela pa kati kabo? Ifwe bonse kuti twailundako mu kukumanina ku kukomaila pa bucindami bwa kusangwa ku Cibukisho. Apantu cikabako pa Mulungu, cikaba icayanguka ku bengi ukusangwako. Shininkisheni ukulaalika abasambi ba Baibolo bonse na balesekelela bambi ukuilunda kuli ifwe. Lanshanyeni na bo icalondololwa pe bula 126, paragrafu 18, mu citabo ca Ukwishiba ukukuma ku bushiku bumo ubwa mwaka ubo bulingile ukubakwa mu kuibela.

⁴ Pekanishisheni ici ca kucitika ca mu 1997 mu kuba no kutasha kwashika pali fyonse ifyo imfwa ya kwa Yesu ipilibula kuli ifwe. Sangweniko ku cungulo bushiku ca March 23, lintu Abena Kristu ba cine konse bakabaka Icibukisho muli bucishinka.