“Citeni Ici ku Kunjibukisha”
1 Abantu ilingi line balalabako ku bupilibulo bwa fyacindama nga papite nshita. Ici e cimo icalengele Yesu ukukambisha abasambi bakwe ukuti: “Citeni ici ku kunjibukisha” lintu aletendeka “umulalilo wa kwa Shikulu.” Ukutula lilya, pa kusefya kwa pa caka ukwa mfwa ya kwa Yesu, Abena Kristu mu cumfwila balitwalilila ‘ukubile mfwa ya kwa Shikulu akasuke esa.’—1 Kor. 11:20, 23-26.
2 Nomba line fye, Yesu akapokelela ku muulu aba kulekelesha aba mu bashalapo aba “mukuni unono” abalecepelako. (Luka 12:32; Yoh. 14:2, 3) Uno mwaka abashalapo pa basubwa pamo ne bumba likalamba ililekulilako fye ilya “mpaanga shimbi” na kabili bakakwata ishuko lya kusefya Umulalilo wa kwa Shikulu, pa April 11. (Yoh. 10:16; Ukus. 7:9, 10) Ukutasha kwesu pa kutemwa kukalamba ukwa kwa Yehova mu kutumina bantunse Umwana wakwe uwafyalwa eka kukakoshiwa. Ifikalandwapo fikaba ca kumwenako ca kwa Yesu, ukutemwa kwakwe, ubusumino bwakwe ukufikile mfwa mu kupayanya icilubula, no kuteka kwakwe nomba nge Mfumu ya Bufumu bwaimikwa ubwa kwa Lesa, pamo na mapaalo Ubufumu bukaletela abantu. Cine cine kashita ka kwibukisha!
3 Ipekanyeni Nomba: Bonse natuibikilisheko ku kulenga iyi nshita ya Cibukisho ukuba iya buseko sana no kutulenga ukutasha fwe bene na bonse abakaba na ifwe. Kuti twapekanya umutima wesu ukupitila mu kubelenga na kabili ubulondoloshi bwa Baibolo ukulosha ku nshiku sha kulekelesha isha butumikishi bwa kwa Yesu ne fyacitike ukufikila imfwa yakwe. Isambililo lyesu ilya lupwa imilungu inono pa ntanshi ya Cibukisho kuti lyaba lya kupituluka mu fipandwa 112-16 mu citabo ca Umuntu Wakulisha.
4 Ni banga mwaishiba abengesa ku Cibukisho nga mwabalenga ukutesekesha aka kashita, ukubalaalika, no kubalenga ukuyumfwa abapokelelwa? Lembeni amashina nomba, kabili mubombeshe ku kubaafwa pa kuti bakasangweko. Pa numa ya ico, mukabaafwe ukutwalilila ukukula lwa ku mupashi ukupitila mu kubakoselesha ukulasangwa ku kulongana lyonse.
5 Mu ciputulwa ca mwaka ica Cibukisho, kukabako ukupekanya kwaibela ku kuleka uuli onse ashimikile sana. Mu kuba no kutantika kusuma, bushe kuti mwabombako bupainiya bwa kwafwilisha mu April? mu May? Inshila imo iyawamisha iya kulanga ukuti tulebukisha mu kutasha fyonse ifyo ilambo lya kwa Yesu lipilibula kuli ifwe yaba ukulanda pali Lesa wesu, Yehova, na mapaalo ayo ukuteka kwa Bufumu ukwa Mwana wakwe kukaleta.—Ilu. 79:13; 147:1.