Mwe Bana—Mulatuletela Ubuseko!
1 Mwe balumendo na bakashana, bushe mwalishiba ikambisho lya kwa Yehova ilya kuti mulesanshiwa mu milimo ya cilonganino? (Amala. 31:12; Ilu. 127:3) Caliba buseko ukupepa Yehova capamo na imwe! Tulasekelamo lintu mwaikala tondolo pa kulongana no kukutikisha. Na kucilisha tulasansamuka lintu muleesha ukwasukapo mu mashiwi yenu. Icilonganino conse cilacankwa ilyo mulelanda amalyashi mwi Sukulu lya Butumikishi bwa Teokrasi, ilyo mwaya na ifwe mu kupimpa mu mulimo wa mwi bala, na lintu twaumfwa ukuti mulashimikila mu kushipa ku bo musambilila na bo na kuli bakafundisha.—Ilu. 148:12, 13.
2 Tulefwaya mwishibe ukuti tulomfwe cilumba ilyo twamona imisango yenu iisuma, imimonekele yenu iya busaka, imibele yenu iisuma, no mucinshi mwakwatila abakalamba. Ubuseko bwesu bulacililako ilyo mulelangisha ukuti ‘muleibukisha Kalenga wenu’ ukupitila mu kukwata amabuyo ya fya buLesa.—Luk. Mil. 12:1; Ilu. 110:3.
3 Twebeni Amabuyo Yenu: Kalume umo uuli ne myaka 8 aebele kangalila wa citungu ukuti: ‘Ica kubalilapo ndefwaya ukubatishiwa, lyene ndefwaya ukwafwilisha mu cilonganino ukupitila mu kubombela ku fisoselo, ukuba kapyunga, ukubombela ku fitabo, ukubelenga amaparagrafu pe sambililo lya citabo na pe Sambililo lya Ulupungu lwa kwa Kalinda. Lyene ndefwaya nkabe umubomfi utumikila, lyene eluda. Na kabili nkabe painiya no kuya kwi sukulu lya bapainiya. Lyene nkaye ku Bethel, nkeseba kangalila wa muputule nelyo uwa citungu.’ Fintu alangishe ukutasha kusuma pe shuko lya kubombela Lesa!
4 Ilyo mulekula lwa ku mubili na lwa ku mupashi, tulasansamuka ukumona amabuyo yenu yafikilishiwa. (Linganyeniko Luka 2:52.) Cila mwaka, amakana pali imwe basanguka bakasabankanya bashabatishiwa no kufikapo ku lubatisho nga babomfi baipeela aba kwa Yehova. Ubuseko bwesu bulakulilako ilyo twamona mulebombako bupainiya bwa kwafwilisha no kutendeka fye umulimo wa nshita yonse. Cine cine, mwe bana, mulatuletela ubuseko no kuletela Shifwe uwa ku muulu amalumbo. Shi Yehova amupaale nga nshi!—Amapi. 23:24, 25.