Ubutumikishi Bwesu Bulanga Ukutemwa kwa Cine
1 Ukubomba ubutumikishi bwesu kulanga ukuti tulomfwila amafunde yakulisha yabili. (Mat. 22:37-39) Ukutemwa twatemwa Yehova kutulenga ukulanda ifisuma pali wene. Ukutemwa abanensu kutulenga ukubakoselesha ukufwaya ukwishiba cintu Lesa afwaya ne mifwaile yakwe pa kuti nabo bakatemwe Yehova, no kulalolele cilambu ca mweo wa muyayaya. Kanshi, tulacindika ishina lya kwa Yehova ku butumikishi bwesu no kwebako abanensu isubilo lyaumo mutengo ilya Bufumu. Ubutumikishi bwesu, bulanga ukuti twalitemwa Lesa na bantu.
2 Ukutemwa kwesu kulatukunta ukulanda ku bantu ba misango misango, apali fye ponse. (1 Kor. 9:21-23) Ku kulangilila: Ilyo eluda wa Bwina Kristu aninine mu ndeke, aikele no mupatili wa ku Katolika. Eluda aipwishe ifipusho ifinono mu kucenjela pa kuti umupatili ailandile lyene ayalwilile ukulanshanya ku fya Bufumu. Inshita umupatili alefuma mu ndeke, aali napokelela ifitabo fyesu fibili. We cintu ubusuma icafuminemo pa kuti eluda alangishe ukutemwa kwa cine ku mubiye!
3 Ukutemwa kwa Cine Kutukunta Ukuti Tushimikile: Ababombako bupainiya bwa kwafwilisha no bwa nshita yonse balanga ukutemwa Lesa no munabo icine cine. Lyonse bapainiya balaipusula inshita yabo no kubomfya amaka yabo ku kwaafwa bambi lwa ku mupashi. Cinshi cibakunta ukucite fi? Painiya umo atile: “Nalishiba ukuti ukutemwa cisabo ca mupashi wa kwa Lesa. Akubula kwene, nga nshaba mu cine iyo, pali bufi ukubomba bupainiya. Ukutemwa kunenga ukwangwa abantu, ukwibukila ifyo balekabila, kabili ndatasha pa kuti abantu balankulako nga wabalanga ukutemwa.” Yesu alilangile ukutemwa kwa ifyo ku bantu. Inshita imo ilyo anakile, kabili aleya ku cifulo cimo na basambi ku “kutusha panono,” basangile amabumba nayafika kale. Acitile shani? ‘Pa kubekatilwe nkumbu,’ atalile asuulako ku fintu alekabila pa kuti ‘abasambilishe ifintu ifingi.’—Marko 6:30-34.
4 Nangu lintu abantu bakaana imbila nsuma tubila, tulayumfwa aba buseko mu kati, pa kwishiba ukuti ukutemwa nakutulenga ukucita apo twingapesha ukubaafwa ukuti bakapusuke. Ilyo Kristu akapingula ifwe bonse kwi pele pele, tukaba ne nsansa nga nshi pa kuti twalilangishe ukutemwa kwa cine pa ‘kufishapo bukapyunga bwesu.’—2 Tim. 4:5.