Lengeni Bambi Ukukwata Isubilo lya Mweo wa Muyayaya
1 Nangu cingati umuntu alifwailisha inshila sha kulenga abantu ukukanakota bwangu no kutantalishako ubumi, ukukota ne mfwa ficili fintu fishingasengaukwa. Fintu tutasha ukuti Baibolo ilalondolola umulandu abantu bakotela no kufwa, ne fyo ukupumpunta kwa kukota kukafumishiwapo pamo ne mfwa. Icine ici calilondololwa mu kushinina mu citabo ca Ukwishiba Uko Kutungulula ku Mweo wa Muyayaya. Icitabo casuka mu kumfwika ifipusho fipelenganya pa lwa bumi ne mfwa, ukweba kabelenga pa lwa nshita ilyo Paradise akabweshiwa.
2 Mu March tukalatambika icitabo ca Ukwishiba ne mifwaile ikaba ya kutendeka amasambililo ya Baibolo aya pa ng’anda. (Mat. 28:19, 20) Lyene tukabwelelako kuli bonse abalangisha ukuti balefwaya ukwishiba ubukombe bwa Bufumu. Muli iyi nshila kuti twalenga bambi ukukwata isubilo lya mweo wa muyayaya. (Tito 1:2) Pa kucite ci, imitubululo ikonkelepo kuti yamwaafwa.
3 Ilyo mulelanshanya umuku wa kubalilapo, pambi kuti mwaipusha ici cipusho:
◼ “Bushe mwalitalatontonkanya pa mulandu abantu bafwaisha ubumi bwatantalila? [Lekeni asuke.] AbaBuddha, Abena Kristu, abaHindu, abaShilamu, bonse basubila mu bumi bwa pa numa ya mfwa.” Kupukuleni icitabo ca Ukwishiba pa cipandwa 6 “Mulandu Nshi Tukotela no Kufwa?,” no kubelenga paragrafu 3. Lanshanyeni pa malembo yaloshiweko. Ukulosha ku fipusho fibili pa mpela ya paragrafu, ipusheni mwine ng’anda nga kuti atemwa ukuifwaila ifyasuko mu citabo. Nga kuti atemwa, twalilileni ukulanshanya amaparagrafu yanono ayakonkelepo. Isambililo liletendeka! Mutambikeni icitabo ku kuleka abelenge, kabili panganeni ilyo mukabwelelako ku kulanshanya ifyasuko, napamo pa numa ya bushiku bumo nelyo shibili.
4 Ilyo mwabwelela uko mwashalike icitabo ca “Ukwishiba” pambi kuti mwasosa ukuti:
◼ “Nabwela ukuti tulanshanye pa fipusho fibili ifyo tushaaswike pa lwa mfwa.” Cinkuleniko mwine ng’anda pa lwa fipusho. Lyene lanshanyeni pa fyebo mu cipandwa 6 pa kamutwe kaleti “Ipange lya Bubifi.” Ukushimpwa pa mibele, kuti mwatwalilila isambililo atemwa ukubomfya icipusho ca kulekelesha pa mpela ya paragrafu 7 pa kupekanishisha apo mukatendekela umuku ukakonkapo. Panganeni bwino bwino ilyo mukabwelelako. Mu kwipifya londololeni fyo tulongana. Mu nsansa mulaalikeni ukusangwako.
5 Nampo nga ni mu bunte bwa ku ng’anda ne ng’anda atemwa mu bunte bwa mu lyashi, kuti mwatendeka ukulanshanya ukupitila mu kusosa ukuti:
◼ “Bushe mwalitalatontonkanya pa fyo cikaba ku ntanshi ku bantu na kwi sonde? [Lekeni asuke.] Baibolo yasupula inshita ya ku ntanshi mwi shiwi limo—Paradise! Ilondolola ukuti pa kutendeka, Lesa apangile incende imo iye sonde ukuba paradise wayemba umo abikile abantu babili abo abumbile. Baali no kwisusha isonde lyonse, panono panono ukulyalula ukuba paradise. Moneni ubu bulondoloshi ubwa fyo isonde ilya paradise lifwile lyali.” Isuleni icitabo ca Ukwishiba pe bula 8, no kubelenga paragrafu 9, pa kamutwe kaleti “Ubumi mu Paradise.” Lyene lanshanyeni ifishinka mu paragrafu 10, no kubelenga ilembo liloshiweko ilya Esaya 55:10, 11. Mwebeni ifyo kuti mwatwalilila ukulanshanya pa lwa fyo ubumi muli Paradise akabweshiwa bukaba no kulanshanya capamo amaparagrafu 11-16. Nelyo mukoselesheni ukuibelengela umwine, kabili panganeni ukukumana na kabili no kulanshanyapo.
6 Tutile tamwatendeke isambililo pa kubalilapo, kuti mwaesha ukucite co ilyo mwabwelelako ukupitila mu kusosa ukuti:
◼ “Pamo nga fintu twalanshenye umuku wafumineko, yaba mifwaile ya kwa Lesa ukuti isonde lyonse likasanguke paradise. Ico caletako icipusho ca kuti, Bushe Paradise akaba shani?” Kupukuleni icitabo ca Ukwishiba pa cipandwa 1, no kusambilila amaparagrafu 11-16, pa kamutwe kaleti “Ubumi Muli Paradise Wabweshiwa.” Pa numa ya ico mulangeni ifikope pa mabula 4-5, no kumwipusha nga kuti atemwa ukwikala mu cifulo cawama nge ci. Lyene belengeni sentensi wa kubalilapo mu paragrafu 17 pe bula 10. Ukulingana ne mibele, kuti mwatwalilila isambililo atemwa ukusosa ukuti ilyo mukabwelelako mukalondolola icikabilwa pa kuti umo akekale muli Paradise wabweshiwa. Londololeni ukutantika kwa kulongana, kabili mu nsansa mulaalikeni ukwisalongana pa Ng’anda ya Bufumu.
7 Icitabo ca Ukwishiba caba cisolobelo cawamisha ukubomfya mu kusokolwela bambi “umweo wa muyayaya” uo Lesa alaya. Ukutungulula amasambililo ya Baibolo pa ng’anda ku bantu kuti kwabalenga ukukwata isubilo lyawamisha ilyapuutwamo na Lesa “uushibepa.”