Ishibeni Bamunyinenwe
1 Baibolo ilondolola cibusa wa cine ukuti alalambatila ukucilo wa bwananyina, aba uwa cishinka no kutemwa mu nshita yonse, kabili alafwilisha cibusa lintu ali mu kucula. (Amapi. 17:17; 18:24) Ifibusa fya musango yo e fyo fye tukakwata mu cilonganino nga twapoosako sana amano ku kwishibana no kutemwana na bamunyina.—Yoh. 13:35.
2 Inshita isuma nga nshi iya kwishibana na bamunyinefwe ni pa ntanshi na pa numa ya kulongana. Kanshi mulefika mu kubangililako no kukokolako pa numa ya kulongana pa kuti muleipakisha ukubishanya kwacincimuka kabili ukwa bucibusa. Landeni na bamunyina bapusanapusana, aba cikalamba, abakokole na bacaice, e lyo na balya bamoneka aba nsoni, shimikeni na bo ilyashi.
3 Muletendeka Ukushimike Lyashi: Mwilaposesha fye bamunyinenwe mu lupita. Kuti mwatampa ukushimike lyashi pa kubebako ifyo mwakumenye mu butumikishi, icishinka mwabelengele muli magazini wa nomba line, nangu ukulanda pa cishinka caciba mu kulongana ubo bwine bushiku. Kuti mwaumfwe fingi kuli bamunyinenwe nga mulekutikisha, ukubakoselesha ukumushimikilako ifilebacitikila ne fyo balesambilila. Kuti mwaumfwa ifingi nga mwaipusha umo ifyo aishile mu cine. Bamo mu mikalile yabo baliponenwa ne fintu ifingakoshe citetekelo cenu, bambi na bo pali nomba line baleshipikisha amafya yakakala ayo mwingomfwa kwati balebepa fye. Lintu tuleibukisha ifyo lyonse, nga ba bwananyina bene bene, tukalaaba abaibukila nga nshi no kulacitapo cimo pa kucula kwa bamunyinefwe.
4 Mulelanga Bucibusa: Pa numa ya mfwa ya mwana wakwe, nkashi umo aleumfwa sana ubulanda pa kwimbe nyimbo shilanda pa kubuuka. Ebukisho kuti: “Pa kulongana kumo, nkashi uwaikalile ku lubali lumbi alimwene ndelila, alishilenkumbatila no kutendeko kwimba na ine ifikomo fya lwimbo ifyasheleko. Nayumfwile ukuti kanshi bamunyina na bankashi cine cine balintemwa, kabili nali ne nsansa nga nshi pa kuti e ko nali ku kulongana, kulya ku Ng’anda ya Bufumu, pantu e ko tusanga aba kutwaafwa.” Tufwile ukulalanga bucibusa kuli bamunyinefwe pa kulabasansamusha nga bali no bwafya no kulabakoselesha lyonse.—Heb. 10:24, 25.
5 Apo amacushi ya muli cino calo cikote yalecilapo fye ukulatutitikisha, natubombeshe ukwishibana na bamunyinefwe bwino bwino. Uku kusansamushiwa kwesu pamo ukwa kufuma ku mutima kukalaba lipaalo kuli ifwe bonse.—Rom. 1:11, 12.