Bakangalila Abatungulula—Katungulula we Sambililo lya Ulupungu lwa kwa Kalinda
1 Ulupungu lwa kwa Kalinda Ulusabankanya Ubufumu bwa kwa Yehova lwaba ca kupayanya cikalamba ica “musha wa cishinka kabili uwashilimuka” ica kutupeelelamo ica kulya ca ku mupashi “mu nshita iyene.” (Mat. 24:45) Eluda uutungulula Isambililo lya Ulupungu lwa kwa Kalinda abombo mulimo wacindama pamo nga kasambilisha uwimika ica kumwenako cisuma mu mikalile ya Bwina Kristu.—Rom. 12:7; Yak. 3:1.
2 Pa kusambilisha bwino, cila mulungu katungulula we Sambililo lya Ulupungu lwa kwa Kalinda afwile ukubombesha mu kupekanya. Acite fyo mu kubamo ipepo kabili mu kusakamanishisha. Alangishe fyo alyangwako ku cilonganino ukupitila mu kutukuta ukutufika pa mitima ne fyebo ifilesambililwa. Atontomesha fye pa fishinka fikalamba ifye sambililo no kutwaafwa ukumona ifyo fileampana no mutwe wa cipande.
3 Pa kupekanya bwino alabelengela libela amalembo pa kuti engeshiba ifyo yabomba. Alatangishako Icebo ca kwa Lesa ukupitila mu kukoselesha icilonganino ukubomfya bwino Baibolo pe sambililo. Lintu abaleyasukapo bashako icishinka cikalamba nelyo lintu bashako ilembo lya mpikwe, alepusha icipusho calundwako ica kulungatika pa kuti balandepo. Muli iyi nshila, alatwaafwa ukufika pa cishinka no kwishiba ifya kubomfya ifyo tusambilila mu bumi bwesu.
4 Katungulula we Sambililo lya Ulupungu lwa kwa Kalinda panono panono alatukuta ukuwamyako imisambilishishe yakwe. Talandapo ifingi lelo alatukoselesha ukulandapo, mu mashiwi yesu, mu kwipifya, no kufika pa cishinka. Kuti atucinkulako mu nshita mu nshita ukuti uwa kubalilapo ukwasuka muli paragrafu alingile ukwipifya no kwasuka icipusho capulintwa mu kulungatika. Ifyasuko fyalundwako ukufuma mwi bumba kuti fyakomaila pa fyo ilembo lilebomba, ukutungilila ifilelandwapo, nelyo pa fyo ifyebo fingabomfiwa. Ukupitila mu kukoselesha bonse e lyo ne ndupwa ukupekanya bwino, Katungulula we Sambililo lya Ulupungu lwa kwa Kalinda alacincimusha bonse ukwasukapo.
5 Pamo nga “basambilishiwa kuli Yehova,” tulatasha pa kukwata “ifya bupe ku bantu,” pamo nga bakatungulula, “abacucutika mu kusambilisha.”—Esa. 54:13; Efes. 4:8, 11; 1 Tim. 5:17.