“Cinshi Mfwile Ukucita?”
1 Pamo ngo musepela uulekula, kuti waipusha auti, ‘Cinshi mfwile ukucita mu bumi bwandi?’ Imisepela ya Bwina Kristu ilafwaya ukukusha umulimo wa iko uwa kubombela Yehova mu butumikishi. Lelo bushe kuti mwabomba shani ilyo uku mulekabila no kuisakamana nga mwakula, pamo no kuipayanishisha ifikabilwa lwa ku mubili? Te kuti canguke ukwishiba ifyo mwingabomba.
2 Imisepela imo ilasakamikwa lintu yamona ifyo imikalile yafishe mu calo ne fyo ifintu fikaba ku ntanshi. Nalimo kuti balanguluka abati: ‘Bushe mfwile ukulundako amasomo ya ku sukulu? Bushe mfwile fye ukutendekelapo no mulimo wa nshita yonse?’ Pa kupingulapo bwino, umo akabila ukwasuka ici cipusho mu bufumacumi, ica kuti ‘Cinshi mfwaisha ukucita mu bumi bwandi?’ Alingile ukubebeta bwino ico afwaisha ukucita.
3 Bushe cinshi mufwaisha ukucita ukutula fye ku bwaice? Bushe ico mufwaisha sana fyuma, nelyo bushe cine cine mulafwaisha ukuibomfya mu kulundulula ifya Bufumu? Ukuba na madigri ya ku yuniversiti takupilibula ukuti nangu cibe shani mukasange ncito. E co abengi balisambilila imilimo ya butukushi ukupitila mu kusambilila ku wabengishe ncito, bamo baya ku masukulu basambilila imilimo ya butukushi, nelyo ukusambilila amakosi ku makoleji ayashipoosa inshita.
4 Cetekeleni Ifyo Yehova Alaya: Umulandu wacindamisha uwa kutontonkanyapo wa kuti Yehova Lesa alilaya ukuti akapayanishisha abatangishako ifya Bufumu mu bumi bwabo. (Mat. 6:33) Ubu tabuli bulayo ubushingacetekelwa. Bamunyina abengi abapita mwi Sukulu lya Kukansha Ilya Butumikishi ilyo bashilasambilila icine balikwete amadigri ya ku koleji. Lelo milimo nshi iya ku calo balebomba? Banono nga nshi balebombe ncito basambilishiwe ku koleji. Abengi balelungisha fye ifya kulungishalungisha, no kuisakamana bwino mu fya ndalama ninshi uku balabomba na bupainiya. Balepokelela amapaalo ayashingalingana ne ndalama pa mulandu wa kukusha imibombele yabo mu butumikishi.
5 Ilyo mulepingula ico mukacita nga mwapwisha isukulu lya ku sekondari, pitulukeni muli fyonse ifyabimbwamo no kubebeta bwino bwino ico mufwaya ukucita. Pa kuti mwingapingulapo bwino, moneni ifyebo fyaba muli Loleni! wa March 8 1998, amabula 26-28. Landeni na bafyashi benu, na baeluda, na kangalila wenu uwa muputule, na bapainiya ababomba bwino mu ncende yenu. Ici cikamwafwa ukupingulapo bwino pa co mufwile ukucita mu bumi bwenu.—Luk. Mil. 12:1, 13.