Cindikeni Yehova ku Milimo Isuma

¹ Tutile mwalokwa icine cine ku mfula, kwena kuti mwaumfwa bwino nga mwasanga ing’anda ya kuubamo! Nga mwasanga mu ng’anda muli icikabilila bwino kabili umwacingililwa, na bene ba ng’anda bamupokelela bwino, kuti mwatemwa ukwikala mulya mwine. Umulimo wa kushimikila Ubufumu utungulula abantu ku ng’anda yaba nge fyo fine ukufuma mu bwikashi bwa kwa Satana. Bushe imibele yesu iya cila bushiku kuti yalenga bambi ukufwaya ukwisa muli ico cubo? Cine cine, pantu Yesu atile abantu ‘kuti bamona imilimo yesu iisuma, no kucindika Shifwe wa mu muulu.’—Mat. 5:16.

² Bushe imibele yesu ifwile ukuba shani pa kuti imilimo yesu ilelenga bambi ukufwaya ukwisa kuli Yehova no kuteyanya kwakwe? Kuti yabe fyo nga twaleka amashiwi ya kwa Yesu pali Luka 6:31 na 10:27 yalamumunga imikalile yesu cila bushiku. Ukucite co kukatucincisha ukutemwa abanensu no kubasakamana, kabili ico cikalenga ukuti twipalana na cino calo cabipa icishisakamana abantu bambi.

³ Nkashi yesu uwali mu bwato amwene umukashana umo ifi uwaumfwile ububi ku mulandu wa bulendo bwa mu bwato ubwa pali bemba ica kuti afililwe ukusakamana umwana. Nkashi yesu aliipeleshe ukusakamana umwana. Ilyo ulya mwanakashi aipwishe nkashi yesu ico engacita ku kumutasha, nkashi yesu atile: ‘Mukwai ndemweba fye ukuti mukakutike ku Nte nga bakamutandalile na kabili.’ E fyo ulya mwanakashi acitile, kabili pali ino nshita ni Nte ya kwa Yehova kumo no mulume wakwe. Umulimo usuma e walengele ukuti lulya lupwa lupokelele ubukombe bwa Bufumu.

⁴ Tufwile Ukuba Abasuma Konse uko Tuli: Imibele yesu pa ncende twikala, ilyo tuli ku ncito nelyo ku sukulu, na lintu tulekokoloka ilenga bantu ukutontonkanyapo fimo pali ifwe na pa kupepa kwesu. Kanshi kuti cawama twaipusha ukuti: “Bushe abantu bamona shani no lupwa lwandi? Bushe abena mupalamano kuti batila ing’anda yesu no lubansa fya busaka kabili filasungwa bwino? Bushe abo tubomba na bo nelyo abo twaba na bo pa sukulu kuti batila tatucelwa kabili tulabombesha? Bushe bambi kuti batila tufwala mucinshi mucinshi kabili twaba abaicindika?’ Imilimo yesu iisuma kuti yalenga bambi ukufwaya ukupepa Yehova.

⁵ Petro asokele ukuti Abena Kristu bakulapontelwa. (1 Pet. 4:4) Tufwile ukushininkisha ukuti tabaletupontela pa mulandu wa mibele yesu iibi. (1 Pet. 2:12) Nga ca kuti imilimo yesu cila bushiku ilacindika Lesa tupepa, ninshi tukaba nge nyali shatekwa apasansuka, ishilesanikila bambi ukuti bese ku ng’anda yacingililwa iya kwa Yehova.—Mat. 5:14-16.