Lengeni Ishina lya kwa Yehova ne Milimo Yakwe Fishibwe
1 “Tooteleni Yehova, bileni ishina lyakwe, lengeni imilimo yakwe iishibwe mu bantu na bantu; . . . imitima ya bafwaya Yehova isamwe.” (Amalu. 105:1, 3) Kemba wa malumbo uwalembele aya mashiwi asangile ukusekelela kukalamba ilyo alebila ishina lya kwa Yehova ne “milimo” yakwe. Milimo nshi yo? Ukwabula no kutwishika milimo yakuma ubufumu bwa kwa Lesa ubwa bukata no ‘kupususha kwakwe.’—Amalu. 96:2, 3; 145:11, 12.
2 Ilyo tulepalama ku nshiku sha Cibukisho ca mu 2001, kuli fingi ifyo tufwile ukusekelelapo pa lwa milimo Yehova aatucitila. Cinshi twasosele fyo? Umulalilo wa kwa Shikulu, ukwabula no kutwishika, e kusefya kwacindamisha mu mwaka onse ku Bena Kristu bonse aba cine. E kusefya kwacindamisha, e kwaba no bufwayo bwacindamisha kabili e kucitwa mu musango wacindamisha. E nshita bonse twibukisha ico Yehova na Yesu baatucitila pa kutupeela inshila ye pusukilo. Kanshi e mulandu wine lyonse fye twenekela ukubombesha sana umulimo wa mwi bala mu nshiku sha Cibukisho, ilyo ‘tulebila ukupususha’!
3 Bushe Mukabombako Bupainiya bwa Kwafwilisha? Mu April uyu mwaka wapwile, abantu 10,724 e babombeleko bupainiya bwa kwafwilisha. Bushe uno mwaka kuti twalenga imyeshi ya March na April ukuba iyaibela nga twabombesha mu mulimo wa butumikishi bwesu ubwa mwi bala? Mu March muli Ifibelushi fisano, mu April na mo muli inshiku sha pa Mulungu shisano. Nga bapekanya ukubomba inshiku shonse ishituntulu pa mpela ya milungu, bakasabankanya abengi ababomba isha ncito basanga ukuti kanshi kuti bakumanisha ukubomba bupainiya bwa kwafwilisha. Pa kukumanisha amaawala 50 ayafwaikwa, painiya wa kwafwilisha afwile ukubomba napamo amaawala 12 mu mulungu umo. Bebeteni sana ukutantika kutubulwilwe mu mukululo pe bula 4. Bushe pali ukutantika kumo ukulingene ne mibombele mwingakumanisha? Palya nga tapali, nalimo kuti mwaitantikila mwe bene pa kuti mukabombeko bupainiya bwa kwafwilisha uno mwaka mu March na mu April.
4 Baeluda bafwile ukutendeka lino line ukucincisha no kutungilila ukubombesha mu mulimo wa kushimikila. Uyu mwaka wapwile mu cilonganino cimo umo baeluda bonse na babomfi batumikila babombeleko bupainiya bwa kwafwilisha, abantu 64 pali bakasabankaya 121, e babombele bupainiya mu April! Kabili icilonganino calitemenwe nga nshi ukumona bakasabankanya abashabatishiwa 6 batuma lipoti wabo uwa kubalilapo mu myeshi ya March na April. Cine cine iyi yine e nshita ya kuti abana na bapya bambi bepushe baeluda pa kuti bamone nga nabafikapo ukutendeka ukubomba umulimo wa kucitila ubunte ku cintubwingi.
5 Ukubombesha Kuleta Amapaalo: Ifilonganino ifimika amabuyo yaibela no kubombesha filaipakisha amapaalo ayengi. Ifilonganino fimo kuti fyafwaya ukubika amano ku kupwisha ukubombela mu fifulo fishibombelwamo ilingi, ukubombako sana ubunte bumbi ukufumyako ukutungulula amasambililo no kuya ku ng’anda ne ng’anda. Kuti babika amano na ku bunte bwa pali lamya, pantu bulabomba bwino sana ku kulanda na bashisangwa pa mayanda na bekala mu fifulo fyayafya sana ukuyamo.
6 Bushe ukulwalilila no bukote fifwile ukulenga sana umo ukukanabomba na maka yonse mu mulimo? Te lyonse cibe fi. Ku ca kumwenako, nkashi yesu uwa myaka 86 uwalwala kansa, nangu ca kutila alafimba amoolu, alibombeleko bupainiya bwa kwafwilisha mu April uyu mwaka wapwile. Ubunte bwa pali lamya bwalengele abombako umulimo bwino bwino fye no kulumbanya sana Yehova. Ico calengele umwine ne cilonganino ukukoseleshiwa.
7 Pekanishisheni Bwino Icibukisho: Uno mwaka Icibukisho cikaba pa April 8. Ne co pakaba ni pa Mulungu, abengi bafwile bakasangwako. Kuti kwasangwa abantu abengi ukucila bonse abasangwako kale nga twabomba umulimo wesu uwa (1) kusangwako ifwe bene na (2) ukulaalikako bambi ukwisasangwa na ifwe ku Cibukisho. Ni bani twingalaalika?
8 Bebeteni ifyalembwa fyenu ifya ku ng’anda ne ng’anda ku kumonamo amashina ya bamo abamoneka ukuti balatemwa ukumfwako icine, nangu ca kutila te lingi sana mubatandalila. Ilyo kwashala imilungu ibili nelyo itatu ukuti Icibukisho cifike, pooseni amano ku kutandalila aba musango yo bonse ku kubalaalika ukwisa ku Cibukisho. Nga kuti mwakumanisha, pekanyeni ne myendele ya balefwaya ukusangwako abo mulaalike.
9 Mwilabako Abanaka: Kulaba ukusekelela ilyo umusambi wa Baibolo aipeela kuli Yehova no kulanga ukuipeela kwakwe pa kubatishiwa mu menshi. Nalyo line, cila mwaka, bamo mwi bumba lyesu balaleka ukubishanya na ifwe, kabili balaleka no kubila ishina lya kwa Yehova ne milimo yakwe ku bantu bambi. Cine cine tufwile ukwangwa ku ba musango yo. Nangu ca kutila abengi abanaka tabakaana icine, nalimo balileka ukushimikila pa mulandu wa kufuupulwa, pa mulandu wa mafya yamo aya pa lwabo, nelyo amasakamika yambi aya mikalile. (Mat. 13:20-22) Abanaka lwa ku mupashi balekabila ukwafwiwa ukubwela mu cilonganino ilyo ubwikashi bwa kwa Satana bushilabalya. (1 Pet. 5:8) Uno mwaka mu nshiku sha Cibukisho, tulefwaya ukubomba sana ukwafwilisha bonse abanaka abali abafikapo ukuti batendeke na kabili ukushimikila imbila nsuma.
10 Kalemba wa cilonganino afwile ukweba bakatungulula ba masambililo ya citabo nga kwaba abanaka bamo mwi bumba lyabo. Komiti wa Mulimo uwa Cilonganino akaba pa ntanshi ukutantika ifipempu fya bucemi ifya kutandalila abanaka bonse. Nga mwasanga ukuti uyo muntu kuti amwenamo mwi sambililo lya Baibolo, kangalila wa mulimo akateyanya ukwafwa pa numa ya kulanshanya na ba muli komiti wa mulimo ukumona uwingafikapo ukutungulula ilyo isambililo. Nangu ca kuti isambililo te kuti litungululwe pa nshita yalepa sana, uuletungulula kuti acita lipoti inshita, icipempu, ne sambililo lya Baibolo.
11 Mu April uyu mwaka wapwile nkashi yesu uwalebomba ubunte bwa ku ng’anda ne ng’anda atambike bamagazini ku mulumendo mu musebo. Asokolwele ukuti umukashi wakwe ni Nte uwaleka ukubomba. Aipwishe ukwabela Ing’anda ya Bufumu no kulaalika nkashi yesu ukuyatandalila wene no mukashi wakwe. E calengele no kuti balya abaupana basangwe ku kulongana kwakonkelepo kabili basumine ukutendeka ukusambilila Baibolo.
12 Ipekanyeni ku Kubombesha! Kemba wa malumbo uwalandile ukuti tufwile ukulenga ishina lya kwa Yehova ne milimo yakwe fishibwe, alandile no kuti: “Mwimbileni, mulumbeni, lumbuleni ifipesha amano fyakwe fyonse; takishisheni mwi shina lyakwe lya mushilo.” (Amalu. 105:2, 3) Natulange ukuti tulalumba ishina lya kwa Yehova ilikulu ne “fipesha amano fyakwe” ukupitila mu kubombesha mu butumikishi, ukubombesha mu nshita ya Cibukisho ca uno mwaka ukucila ifyo twabala atubomba!
[Akabokoshi pe bula 5]
Inshila Shapusanapusana Isha Kutantikilamo Ukubomba Amaawala 12 Cila Mulungu Ilyo Mulebomba Bupainiya bwa Kwafwilisha
Ubushiku Amaawala
Pali Cimo 1 2 − −
Pali Cibili 1 − 3 −
Pali Citatu 1 2 − 5
Pali Cine 1 − 3 −
Pali Cisano 1 2 − −
Pa Cibelushi 5 4 3 5
Pa Mulungu 2 2 3 2
Yonse pamo: 12 12 12 12
Bushe pali uku kutantika pali kumo ukwingabomba kuli imwe? Nga tapali, kanshi kuti cawama mwaitantikila mwe bene.