Lekeni Imikalile Yesu Icindike Yehova—Ulubali 3

¹ Pa kutwalilila ababula akabi, tufwile ukukaana intambi shitungililwa na buno bwikashi bwa kwa Satana. Apo nomba twaipeela kuli Yehova ukuti tuli fibombelo fyakwe ifya kumulumbanya, ifibumbwa ificindika bumushilo bwakwe no bulungami, bushe pa kashita kamo kuti twaikantaikako nelyo ukutonaikwa na mabala ayengalenga twamoneka abashafikapo pali bumushilo bwa kwa Lesa? Natulande pa menga.

² Icupo, Impango ne Ntambi sha Bufyashi: Ca cifyalilwa fye ku bafyashi ukufwaya ukupekanishisha abana babo ubwikalo busuma ubwa ku ntanshi. Mu ncende shimo, mwaba ulutambi lwa kuti abafyashi e bafwaila umwana wabo umukashana balemona ukuti e wingalinga sana ukuti ope. Limo nalyo kwaba ulutambi lwa kuti abafyashi bafwile ukushininkisha ukuti umwana mwaume nasuminisha. Ukucite co kweka kweka fye te kuti kube bwafya ku Bena Kristu, nga ca kuti bonse, abafyashi no mwana baba mu cine. Abafyashi Abena Kristu bakafwaya ukuti umwana wabo opile “muli Shikulu epela,” kanshi umukashana bakafwaila umwana wabo afwile ukuba mu cilonganino ca Bwina Kristu. (1 Kor. 7:39) Nga ca kuti umwana aba mu cine, lelo abafyashi tababa mu cine, kuti bamufwaila umukashana uushaba mu cine kabili ico kuti caba bwafya ku mwana mwaume. Ena alingile ukwishiba ukuti afwile ukuupa umukashana uwasumina, uwaipeela kabili uwabatishiwa. Afwile ukulondolwela abafyashi bakwe ulwa bucibusa bwakwe na Yehova Lesa no kuti afwile ukuupa uwasumina, uwaipeela kabili uwabatishiwa. Ico catuleta na ku mulandu umbi, uwa mpango.

³ Ubupe bwalepeelwa abafyashi ba kwa nabwinga bwalilembwa na mu Baibolo. Lelo impango tashifwile ukuba ni ndalama ishingi sana nelyo ifipe fimbi ifingi nga nshi, ifipingulwa na banalume ba mukashana ku mitundu imo nelyo balupwa bambi. Wishi Umwina Kristu e wakwata amaka yapeelwa na Lesa aya kukusha abana, kabili afwile ukukwata amaka na pa kutantika kwa bwinga bwa mwana wakwe umukashana. (Efes. 5:1) Tafwile ukusuminisha balupwa bambi ukumupoka bumutwe pa ng’anda yakwe ica kuti aleka e balepingula pa bwinga bwa bana bakwe. Nga kuli lupwa umbi uwayafwilisheko ukusambilisha umukashana kabili bawishi ba mukashana balefwaya ukutasha kuli uyo lupwa ukupitila mu kumwakanyako impango, ninshi kuitemenwa fye kwabo abene. Lelo ico te cingalenga ukuti bapingule impango ishingi sana. Wishi onse Umwina Kristu afwile ukufwaya ukuti umwana wakwe akalimbwe nga nshi mu cine ukupitila mu kuupilwa mu cine. (Fil. 1:10) Abafyashi ba mano bafwaya ukuti shifyalebo aba uwatemwa Yehova, uwapimpa kabili uwikala cila bushiku imikalile yalingana ne cine. Munyina washikatala kabili uwakosoka, uwacindikisha icine mu mikalile yakwe, kuti aba umulume umusuma sana nangu ca kuti teti akwate indalama ishingi isha kulipila impango ishingi.—Moneni icipande ca kuti: “Ukulipilisha Impango Ishalinga” mu Ulupungu lwa kwa Kalinda ulwa September 15, 1998.

⁴ Ilyo fye twingalanda ukuti abantu babili balyupana ni liya balembesha icupo cabo kabili bonse babili basaina icipangano pa menso ya nte pa mulashi ucitisha imilapo ya cupo. E co takwaba umwaume uwakwata insambu ya kusendama na nkobekela wakwe ukufikila fye icupo calembeshiwa bwino bwino ukulingana ne funde. Ukusendama no mwanakashi uushilaba mukashi wakwe bulalelale, kabili umo kuti atamfishiwapo mu cilonganino ca Bwina Kristu. (1 Kor. 6:9, 10) Abafyashi, umwaume e lyo no mukashana wine, bonse tabafwile ukuleka ica musango yo ukucitika.

⁵ Abafyashi Abena Kristu na bana baume abasumina na bana bakashana bafwile ukwangwa ku fyo ubwinga bwabo bukaba. Amalembo yakonkomesha ukuti: “Nga mulelya nalimo mulenwa, nalimo conse ico mulecita, citeni fyonse ku kucindika Lesa.” (1 Kor. 10:31) Bushe ubwinga bukacindika Yehova kabili bushe ‘bukapuulamika isambilisho lya kwa Kristu’ nelyo bushe bukaseebanya Yehova ne cilonganino ca Bwina Kristu no kupunwisha bambi? Ni shani nga kuti ku bwinga kwaba iciwowo, ukukolwa no kulisha inyimbo shisonga ubulalelale no kucinda, ica kuti kwasuka kwaba no bulalelale?—Moneni icipande ca kuti “Amenga ya Nsansa Ayacindika Yehova” mu Ulupungu lwa kwa Kalinda ulwa May 1, 2000.

⁶ Ilyo baupana, ababa mu cupo ca Bwina Kristu bafwile ukutulukusha ukwendela umwalola icine icilubula abantu ku fishilano fishili fya bulesa. Abena Kristu ba cine balitemwa abantu banabo kabili baba aba cikuuku, na kucilisha kuli balupwa. (Efes. 4:32; Kol. 3:12; 1 Kor. 13:4) Bushe te kuti tupusane ne yi mibele ya Bwina Kristu nga twalakonkelesha intambi sha fishilano isha kuti umukashana uwaupwa tafwile ukumonana na shifyala? Kuti twaba shani ne cikuuku ku banensu nga twalakonka intambi sha kuti tatufwile ukumona balupwa lwesu bamo mu menso, ukuti tatufwile ukulanda na bo, tatufwile ukwendela mupepi na bo, tatufwile ukwikala na bo mu muputule umo wine nelyo ukuti tatufwile ukupita mu kashila bapitamo?

⁷ Icupo cikateemuna Lesa nga ca kuti umulume no mukashi bantu basanguluka ukufuma fye pa kuupana. (Heb. 13:4) Mwandini tacakafye ku baupana ukucetekelana ilyo bali mu cupo no kukusha abana babo umwabela amafunde ya kwa Yehova kabili bonse capamo ukutwalilila aba citetekelo mu kupepa kwasanguluka, ababula akabi ku fya pano isonde. Na imwe bene kuti mwapaalwa ifyo fine nga mwakaana ukutekwa ubusha ku fishilano fishili fya Bwina Kristu.