Bushe Cine Cine Mulatasha pa Mapuaalo ya kwa Yehova?

¹ Twalikwata icintu cimo ica mutengo nga nshi ico tulingile ukutashishapo. Ni cinshi? Baibolo ilacilondolola ilyo itila: “Yawama kuli ine amalango ya ku kanwa kenu, ukucile sha makana isha golde na silfere.” (Amalu. 119:72; Amapi. 8:10) Nangula ca kuti golde yalyumo mutengo, amalango ya kwa Yehova yena yacilapo ukuwama. Ukwishiba kwalungika ukwa malango yakwe pamo no kushilimuka no mucetekanya ifyo Yehova apeela abafwaya icine mu bufumacumi fyaba fintu fya kuteesa. Filatupangasha ku kuicingilila, ukwishiba ifya kwikala na mafya, ifya kupwisha impika bwino bwino, ne ci cilenga tuleteeko mutima no kuba ne nsansa.

² Ukutampa pa January 1, 2000, Yehova alipeela abantu bakwe bonse ‘amalango yasuma aya ku kanwa kakwe’ ukupitila mu mitantikile ipya iya kupokelamo impapulo. Ici calibomba bwino pantu ababomfi ba kwa Lesa bonse, te mulandu baliba bwino mu fya ndalama atemwa babusu, kuti bakwatako ifibombelo fya ku mupashi ifikabilwa. Impapulo te sha pa fye pantu palapooswa indalama pa kupulinta no kutwala ku filonganino mu fimbayambaya. Nangu cibe fyo, na bashakwata pa kuuma kuboko kuti bakwatako bamagazini ne fitabo ifyo bakabila kabili imisangulo yabo iinono iya kwafwilisha umulimo wa mwi sonde lyonse ilatashiwa nga nshi.

³ Bamo ici cikuuku cabamo ukutemwa ica kwa Yehova calibafika sana pa mitima, lelo bambi tabatasha sana atemwa ukukanatasha fye no kutasha pali ci. Cimoneka shani ukuti tabatasha? Intanshi, imisangulo itumwa ku Sosaite yalibwela sana pa nshi. Tulamona abo tushalikako impapulo balesangwilako, ninshi e kutila ifwe fwe bene tulefilwa ukutasha pali ishi mpapulo shaumo mutengo isho tupokako ku kubomfya pa lwesu? Ica bubili, bamo ukwabula no kutontonkanyapo bwino, balaorda ifipe fya kuorda mu kuibela ifyo baalefilwa ukushita kale. Bamo ukwabula no kusakamana balaorda amatepu ya pa vidio nangu ca kuti tabakwata televishoni! Cilatemuna Yehova ukupeela kasabankanya umo na umo ifikabilwa fye epela, ne fi fyaba magazini wa Ulupungu lwa kwa Kalinda, icitabo ca pe sambililo lya citabo na Baibolo. Nga ca kuti kale twalefilwa ukushita ifipe fya kuorda mu kuibela, teti ciwame ukulaorda iminshinda ya ifi fipe nomba. Ica butatu, pe bungano lyesu ilya citungu ilyaleti “Bakacita wa Cebo ca kwa Lesa,” e muku wa kubalilapo twapokelele impapulo shipya ishafumine ukukonka imitantikile ipya. Abena Kristu bakosoka balitanteme busaka busaka no kupembelela mu kutekanya ukupokako ulupapulo lwa pa lwabo ulwafumine. Lelo, kwali amalipoti ya bulanda aya kuti bambi balelwila, ukuyaipatika ku ntanshi, kumbi kwaleba fye no lubuli ilyo bamo muli bukaitemwe balefwaya fye bena e bo bapoke impapulo.

⁴ Ukukanatasha ni cimo ica fya kwishibilako ukuti tuli mu “nshiku sha kulekelesha.” Umutumwa Paulo asokele ati: “Lelo ishibe ci, ukuti mu nshiku sha kulekelesha mukesaba inshita ishayafya. Pantu abantu bakaba abaitemwa, . . . abashitootela.” (2 Tim. 3:1, 2) Apo abantunse bonse bafuma kuli Adamu uwali umubembu, bafyalwa no kuitemwa kabili balemenena ku kukanatasha. (Rom. 5:12) Ukukanatasha kwaba mibele ya bukaitemwe iyaandatila abantu isonde lyonse. Iyo mibele, yaba fye mpanga yonse kwati mwela tupeema, kabili ilatukuma. (Efes. 2:1, 2) Kanshi, tufwile ukuba abatasha. Kuti twacita shani fyo? Ukupitila mu kutontonkanya sana pa fyo Yehova atucitila. Ku ca kumwenako, Rahabu cilende alangile icikuuku ilyo afishile inengu sha mu bena Israele. E ico, abena Israele bamulangile icikuuku ukupitila mu kubakilila wene na ba ng’anda yakwe ilyo umusumba wa Yeriko waonawilwe. (Yosh. 2:1-21; 6:20-23) We ca kumwenako ubusuma ica kulangilila ukuti nga twabelelwa icikuuku na ifwe tufwile ukulangulukilako bambi no kuba aba cikuuku!

⁵ Bushe mulebweseshapo icikuuku kuli Yehova ukupitila mu kutasha wene no kuteyanya kwakwe pali fi fintu fyawamisha apekanya ifyo mulepokelela nomba? Yehova atila: “Uwipaye lambo lya kutootela ancindika; no watambalike nshila yakwe ndemulengo kumone pusukilo.” Shi namusange ubuseko bufuma mu kutasha Lesa ukwa ku mutima.—Amalu. 50:23; 100:2.

⁶ Kwi bungano lya citungu ilileisa ilileti “Bakasambilisha wa Cebo ca kwa Lesa,” bushe tukacita shani pa kupokelela impapulo shikafuma? “Ifwe bonse umo umo tutemune umunensu, ku kumuletelo busuma bwa kumukuula. Ukuti pa kuba aba mutima umo, mucindikile mu kanwa kamo Lesa kabili Wishi wa kwa Shikulwifwe Yesu Kristu.” (Rom. 15:2, 6) Ifyo tuisunga pali ilya nshita kuti caletela Yehova ubukata nelyo umuseebanya. Lelo shi bonse natupampamine pa kuisunga ifyo abapepa Lesa wa cine bafwile ukuisunga ukupitila mu kulangulukilako abanensu. Baeluda na babomfi batumikila pamo na bana babo kuti babika ica kumwenako cisuma ukupitila mu kutantama busaka busaka ilyo balepembelela ukupokako ulupapulo lufumine. Tapali uufwile ukutontonkanya ati afwile ukuba ku ntanshi. Aba ku calo abeshile kwi bungano kuti balasunka no kuipatika lelo nga bamona ifyo tuisungile busaka busaka, “[bakabwela] no kumona apalekene umulungami no mubifi, apalekene uubombela Lesa no ushimubombela.”—Mal. 3:18.

⁷ Na kabili, kuti twatontonkanyapo nomba ifyo tukalanga ukutasha pa fya mutengo ifyo tuli no kupokelela. Yehova akoselesha ababomfi bakwe ati: “Imiku itatu mu mwaka ukalecito lwendo lwe lambo kuli ine. . . . Kabili kwilamoneka wa minwe mikutwa ku cinso candi.” (Ukufu. 23:14, 15) Shi bonse natupampamine pa kulanga ukuti cine cine tulatasha ifyo Yehova atupekanishisha pa kuti tumwishibe no kumutemwa.