Umukululo wa Fipusho
◼ Bushe kuti twabombela shani pamo no kutantika kwa kutwafwa mu butumikishi bwa mwi bala?
Bakangalila ba Bwina Kristu balatangilila mu mulimo wa kubila, balabikako amano ukutucema no kwafwa abanaka. Ilyo balemona ubukose bwesu no bunake, balateyanya ukutwafwa, kabili ici cisanshamo ukubomba na ifwe mu butumikishi.—km 9/96 ibu. 3 para. 7; w85 8/1 ibu. 20 para. 18.
Kangalila wesu uwe Sambililo lya Citabo pa Cilonganino alyangwa sana ukulunduluka kwesu ukwa ku mupashi. Ilyo mukumene ku kuya mu mulimo wa mwi bala, alatubulula ifyo mwingalanda mu mulimo. Alalangilila ifya kubomfya Baibolo ilyo muleshimikila. Kabili alapoosa amano kuli kasabankanya umo na umo. Kuti twaitendekelako ukulanshanya na ba bacemi banono aba kutemwa ku kuleka “twafwiwe pa nshita yalinga.”—Esa. 32:1, 2; Heb. 4:16.
Ilyo bakangalila benda batandalila icilonganino, bamunyina, bankashi, na bacaice balakoseleshiwa ukutantika ukuti babombe nankwe nelyo umwina mwabo mu butumikishi bwa mwi bala. Mwandini kulaba ukukoseleshanya! Tufwile ukutwalilila ukupokelela ishi nshila sha kutwafwilamo lwa ku mupashi.—om amabu. 49, 52.
Twalishiba ukuti Yehova alasakamana abantu umo umo. (1 Pet. 5:7) Ubutumikishi bwa kwa Yesu bwakoseshe icishinka ca kuti Lesa alicindamika umo umo uwa ifwe. (Luka 12:6, 7) Bakangalila na bo balanga ukwangwako kumo kwine ku kufwaya ukutwafwa. Nga ca kuti kangalila atantika ukubomba na nkashi nelyo uwacaice, kuti twafumyapo ukutwishika abali bonse bengakwata pa kubacinkulako ulwa bufwayo bwa mateyanyo ya musango yu no musango wa bantu ababomba nga bakangalila.—1 Pet. 5:2; Tito 1:7-9.
Lelo ifwe bonse kuti twabomfya amano mu kutaluka ku mibele ingalenga abantu ukutwishika. Umukululo wa Fipusho uwali mu Ubutumikishi Bwesu Ubwa Bufumu bwa May 1997 walipeele ukufunda kusuma pa lwa kubombela pamo munyina na nkashi mu butumikishi. Umukululo watile: “Nangu cingati munyina na nkashi nalimo kuti babombela pamo inshita shimo, ici kuti cawamisha nga bali ibumba.” Moneni ukuti bakomaila pa kubomba ne bumba, e kuti, ukubombela mu ncende umulebombela bambi nelyo mu ncende sha cintubwingi pamo nga mu musebo nelyo ku ng’anda ne ng’anda. E co kufwile kwaba ukukomaila pa kukanabomba mweka kumbi nelyo ukulabomba na nkashi atemwa munyina umo wine lyonse. Ico napamo kuti caleta amatunko nelyo ukuleta ukutwishika kushakabilwa.—Amapi. 22:3.