Kuti Twacita Ifyo Yehova Afwaya Kuli Ifwe
1. Bushe inshita shimo kuti twayumfwa shani, kabili mulandu nshi?
1 Ukumfwila amafunde ya kwa Yehova ne fishinte, e mikalile yawamisha pali lelo. Kabili kulatwafwa ukwimika umufula usuma wa nshita ya ku ntanshi iya ciyayaya. (Amalu. 19:7-11; 1 Tim. 6:19) Lelo icalo ca kwa Satana cilatuletela amafya ayengi. Imibili yesu iishapwililika ilenga aya mafya ukukulilako. Inshita shimo kuti twayumfwa abapelelwa ilyo tule-esha ukubomba imilimo ya mu Malembo. (Amalu. 40:12; 55:1-8) Limo kuti twatwishika nampo nga kuti twacita fyonse ifyo Yehova afwaya kuli ifwe. Nga cabe fyo, cinshi cingatwafwa ukusungilila bumupashi bwesu?
2. Bushe mulandu nshi uo twingasosela ukuti ifyo Yehova afwaya kuli ifwe fyalilinga?
2 Amafunde ya kwa Yehova Tayaba Cisendo: Yehova tafwaya ifyafulisha ukufuma kuli ifwe. Amafunde yakwe tayaba cisendo lelo yabelako ku kutunonsha. (Amala. 10:12, 13; 1 Yoh. 5:3) Alishiba ubunake bwesu, ‘ebukisho kuti tuli lukungu.’ (Amalu. 103:13, 14) Nangu ca kuti imibele yesu ilatulesha ukubombesha, Yehova mu nkumbu alateemunwa ku milimo yesu nga twabomba apapela amaka yesu. (Lebi 5:7, 11; Marko 14:8) Atweba ukupoose cisendo cesu icafina pali wene, kabili atulaya ukuti akatwafwa ukutwalilila aba busumino.—Amalu. 55:22; 1 Kor. 10:13.
3. Bushe Yehova atwafwa shani ukushipikisha?
3 Tulingile Ukushipikisha: Ifyalembwa fya mu Baibolo ifya bantu abashipikishe pamo nga Eliya, Yeremia, na Paulo filangilila ukuti na ifwe tulingile ukushipikisha. (Heb. 10:36) Lintu bali na mafya na lintu bafuupwilwe Yehova alibatungilile. (1 Isha. 19:14-18; Yer. 20:7-11; 2 Kor. 1:8-11) Kabili tulacincishiwa na bucishinka bwa bamunyinefwe aba muno nshiku. (1 Pet. 5:9) Ukwetetula pali ifi fya kumwenako kuti kwatwafwa ukukanafuupulwa.
4. Mulandu nshi cacindamina ukulaibukisha amalayo ya kwa Lesa lyonse?
4 Ukuba ne subilo mu malayo ya kwa Lesa e “nanga ya mweo.” (Heb. 6:19) Isubilo lyalengele Abrahamu na Sara ukumfwila Yehova ilyo abebele ukufuma ku mwabo no ‘kuyaikala nga balebeshi mu calo ca bulayo.’ Lyakoseshe Mose ukuba uwashangila mu kupepa kwa cine. Li subilo, e lyakoseshe na Yesu ukushipikisha pa cimuti ca kucushiwilwapo. (Heb. 11:8-10, 13, 24-26; 12:2, 3) Ukusunga amalayo ya kwa Lesa aya calo cipya umwaba ubulungami ayabilima mu mitima yesu na ifwe bene kukatwafwa ukutwalilila abashangila.—2 Pet. 3:11-13.
5. Mulandu nshi cacindamina ukulaibukisha imilimo yesu iyo twabombele kale muli bucishinka?
5 Ukulaibukisha imilimo yesu iine iyo twabombele kale muli bucishinka, ifyo twaipeeleshe, ne fyo twashipile kuti kwatucincisha ukubombesha mu mulimo wesu. (Heb. 10:32-34) Ukwibukisha ifyo kutucinkulako pa fyo tusekelela ilyo twacita ico Yehova afwaya kuli ifwe, e kutila ukuipeelesha no mweo onse.—Mat. 22:37.