Kalata Ukufuma Kwi Bumba Litungulula
APO natupalamina ukwingila mu calo cipya, cili ice pamfya ukutwalilila ukulolela pali Yehova. (Sefa. 3:8) Kasesema Daniele alandile ukuti ‘Lesa . . . e usokolole fya nkama, kabili alenga ukwishibikwa . . . icikesaba ku nshiku sha kulekelesha.’ (Dan. 2:28) Mwandini lishuko ukuba aba mweo mu nshita ya mpela iyasobelwe, no kumfwikisha inkama sha kwa Yehova isho alesokolola nomba!
Ukupitila mu “musha wa cishinka kabili uwashilimuka,” Yehova alesokolola panono panono ubufwayo bwakwe ubwa kulonganika “ibumba likalamba” ilya bakapepa bakwe abafuma mu nko shonse muli shino “nshiku sha kulekelesha” ishayafya. (Mat. 24:45; Ukus. 7:9; 2 Tim. 3:1) Esaya 2:2, 3 (NW) ilondolola ili bumba lya mu calo conse ukuti likabako “mu nshiku sha ku mpela.” Cila mwaka, uku kulonganika kulatwalilila te mulandu ne cimfulumfulu no lukaakala ifyaba fye mpanga yonse muno calo.
Mu mwaka wa 2004, twalyumfwikishe ubucindami bwa kumfwila amashiwi ya kwa Yesu aya kuti: “Mulelola . . . Mube abaiteyanya.” (Mat. 24:42, 44) Abena Kristu ‘abeluka ifishibilo fya nshita’ balishibo kuti ifilecitika mu calo, pali umo filolele kabili baleankulako ukulingana ne fyo fishibilo. (Mat. 16:1-3) Pa kufishapo Icebo cakwe, Yehova akatwalilila ukuba na bantu bakwe abateyanishiwa ku kubomba umulimo wakwe, te mulandu no kukaanya.
Nangu ca kutila bamo balyesha ukucilikila nelyo ukulesha umulimo wa kubilisha Ubufumu, bamunyinefwe balitwalilila ukubile cine no kulongana capamo. (Imil. 5:19, 20; Heb. 10:24, 25) Mu Russia, mu June 2004, icilye ca kumfwilamo ama-apilu mu Moscow casuminishe ifyo icilye cinono capingwile, e kutila ukubinda imilimo ya Nte sha kwa Yehova no kwisala akabungwe ka mwi funde aka Nte sha kwa Yehova aka mu Moscow. Lelo, bamunyinefwe tabafuupulwa; balishiba ico Lesa afwaya kuli bena, kabili balamumfwila nga Kateka ukucila ukumfwila abantu. (Imil. 5:29) Tuli abashininwa ukuti Yehova akatungulula ababomfi bakwe te mulandu no kupingula bubi bubi ukwa iyi milandu.
Mu myaka inono iyapitapo mu calo ca Georgia, bamunyinefwe balilufya ifipe, ukubemina ku bantu, kabili balibocela ifitabo. Lelo takwaba icilwilo cafulilwa bena icashuka. (Esa. 54:17) Mu mwaka wa mulimo uwa 2004, Inte sha kwa Yehova mu Georgia balisuminishiwe mwi funde na kabili. Kwali ukulongana amabungano ukwabula ukupumfyanya ukuli konse, kabili impapulo shilengila mu calo ukwabula no bwafya. Kwali impendwa ipya iya bakasabankanya na basangilwe ku Cibukisho.
Bamunyinefwe mu fyalo fya Armenia, Eritrea, Republic of Korea, Rwanda, na Turkmenistan, balikakwa pa mulandu wa citetekelo cabo. Te mulandu no kucushiwa, balishiba umulandu wa mu Malembo uwa kweshiwa kwabo, ico cilabafwa ukutwalilila ukuba na bucishinka ilyo balelolela Yehova ukubapususha.—1 Pet. 1:6; 2 Pet. 2:9.
Ilyo mulebebeta Lipoti wa Mulimo uwa Mwaka wa 2004 mu Ulupungu lwa kwa Kalinda ulwa February 1, 2005, muli no kusekelela pa kumona ubusuma bwa kwa Yehova. (Amalu. 31:19; 65:11) Tulesubila ukuti uyu lipoti alamukoselesha ukutwalilila ukwenda mu nshila iisekesha Lesa.—1 Tes. 4:1.
Kuli ukubombesha kukalamba ukushimikile cine ku bantu balekanalekana. Ku ca kumwenako, amavidio, amaDVD, ne mpapulo shimbi mu lulimi lwa bankomamatwi ne mpapulo sha filembo fya mpofu fyalipangwa ku kwafwe mpofu na bankomamatwi lwa ku mupashi. Bakasabankanya abengi aba Bufumu balisambilila indimi ishilandwa na bantu abafuma ku fyalo fimbi abekala mu fifulo umo ifilonganino fyabo fishimikila.
Kabili, amabumba ayengi nga nshi ayaba ukutali yalipangwa mu fifulo ifyayafya ukufikamo. Umusambo umo, wakwata amabumba ayaba ukutali ukucila pali 300 umwaba bakasabankanya ukucila pali 7,000. Icine cine fye ici cilelangilila ukuti ifilonganino ifipya fili no kupangwa! Na kabili, pa bantu 16,760,607 abasangilwe ku Cibukisho muli uyu mwaka wa mulimo, ukucila pa mamilioni 10 te Nte sha kwa Yehova. Ici cilelangilila fye ukuti kucili umulimo ukalamba uwa kulobolola.
Tulatasha Yehova cila bushiku pa mapaalo yakwe na pa fyo atusakamana cila bushiku mu kutemwa kwakwe. (Amapi. 10:22; Mal. 3:10; 1 Pet. 5:7) Ilyo tuleya ku ntanshi abaikatana capamo, muli shino “nshiku sha kulekelesha,” tulecetekela Yehova umupwilapo. Te mulandu na mafya yengesa, lekeni twibukishe amashiwi ye lembo lya mwaka uwa 2005 aya kuti: “Ukunjafwa kufuma kuli Yehova.” (Amalu. 121:2) Mukwai ishibeni ukuti twalimutemwa kabili tulamupepelako.
Ni fwe bamunyinenwe,
Ibumba Litungulula Ilya Nte sha kwa Yehova