Finshi Mwatemenwemo?

Ilyo mulelanshanya ifishinka fikalamba ifya kubelanga kwesu ukwa Baibolo ukwa cila mulungu, mufwile ukushako amaminiti yane pa kuti abali mwi bumba bengalandapo mu kwipifya. Bamunyinefwe abapeelwe ili lyashi bafwile ukuba abashilimuka ilyo baletungulula ulu lubali. Tabafwile ukwipusha amepusho aya kulungatika ica kuti cafuupula abalefwaya ukulandapo. Nalimo kuti mwaeba fye ibumba ukulandapo mu kwipifya pa fyo banonkelemo. Nga ca kuti takuli abaleyasukapo, nelyo nga ca kuti kalanda alefwaya ukulosha ku fyebo fimo, lyena kuti nalimo alosha ku lipusho limo pali yalya ayaba pe bula 48 mu citabo ca Nonkelenimo mu Masambililo ya Isukulu lya Butumikishi Ilya Bulesa, kuti lyabomfiwa nge lipusho lya pa mbali. Amepusho ayali yonse ayengabomfiwa yafwile ukucincinsha ibumba ukwasukapo.