Abena Kristu Abashimikila Icebo Bakabila Ukulapepa
1. Cintu nshi icacindama ico tulingile ukucita nga tulefwaya ukubomba bwino umulimo wa kushimikila?
1 Te kuti tubombe bwino umulimo wa kushimikila pa lwesu. Yehova alatupeela amaka ya kubomba umulimo. (Fil. 4:13) Abomfya bamalaika bakwe ukutwafwa ukusanga abantu abapala impaanga. (Ukus. 14:6, 7) Ni Yehova e ulenga imbuto isha cebo cakwe isho tubyala no kutapilila ukutila shimene. (1 Kor. 3:6, 9) Kanshi calicindama ukuti fwe Abena Kristu abashimikila icebo tuleshintilila pali Shifwe wa ku muulu ukupitila mwi pepo!
2. Fintu nshi fimo fimo ifyo twingapepela?
2 Ukulaipepela: Tulingile ukulapepa inshita yonse ilyo tuleshimikila. (Efes. 6:18) Fintu nshi fimo fimo ifyo twingapepela? Tulingile ukupepa ukuti Lesa atulenge ukulamona ubusuma bwaba mu cifulo tushimikila no kupepa ukuti tuleba abashipa. (Imil. 4:29) Kuti twalomba Yehova ukuti atutungulule ku bantu abakwata imitima isuma abo twingalasambilila nabo Baibolo. Nga ca kutila umwine wa ng’anda atwipusha icipusho, kuti twapepa ipepo ilipi ilya mu mutima ukulomba Yehova ukuti atwafwe ukwasuka icishinka. (Nehe. 2:4) Kuti twalomba Lesa ukuti atupe amano ayengalenga tulebika umulimo wa kushimikila pa ntanshi. (Yako. 1:5) Te apo peka iyo, Yehova alatemwa nga ca kuti mwi pepo lyesu twasanshamo na mashiwi ya kumutasha pa kutupeela ishuko lya kuba ababomfi bakwe.—Kol. 3:15.
3. Bushe ukupepela bambi kuti kwalenga shani umulimo wa kushimikila ukuya pa ntanshi?
3 Ukupepela Bambi: E lyo kabili tulingile no ‘kulapepelana,’ ukulalumbula na mashina yabo tushimikila nabo nga na cilinga. (Yako. 5:16; Imil. 12:5) Bushe mulalwalilila ica kuti mulafilwa no kubombesha mu mulimo wa kushimikila? Nga ni fyo, ninshi kuti mulepepela Abena Kristu banenu abali no bumi ubutuntulu. Mwilatwishika amapepo yenu pantu yalikwata amaka yakwafwa bamunyinenwe! Kabili caliba fye bwino no kulapepela abakwata ififulo fikalamba na bashimucindikwa ukuti imitima yabo inake pa kuti bamunyinefwe batwalilile ‘ukulaikala mu mutende kabili mu cibote.’—1 Tim. 2:1, 2.
4. Mulandu nshi tulingile ukubela no mute wa kupepa?
4 Ukushimikila imbila nsuma mu calo conse mulimo uukalamba nga nshi uo tushingabomba na maka yesu fye. Nga ca kuti twaba “no mute wa kupepa,” tukabomba bwino umulimo wesu pantu Yehova akatwafwa.—Rom. 12:12.