Ipepo Lishuko Ilyo Lesa Atupeela

1, 2. Cinshi mwingalandila ukuti ipepo lishuko nga nshi, kabili mulandu nshi tulingile ukwishibila ifyo Baibolo isambilisha?

NGA kulinganya icalo ku muulu, icalo cinono sana. Yehova amona icalo na bantu aba nko shonse nge toni lya menshi ilifuma mu ca kutapilamo amenshi. (Amalumbo 115:15; Esaya 40:15) Nangu ca kuti tuli banono nga kutulinganya ku muulu, pa Amalumbo 145:18, 19 patila: “Yehova aba mupepi na bonse abalilila kuli ena, kuli bonse abalilila kuli ena mu cishinka. Akacitila ababa na katiina kuli ena ifyo balefwaya, akomfwa ne nkuuta yabo, kabili akabapususha.” Ala ipepo lishuko nga nshi! Yehova Kabumba wa maka yonse alafwaya ukupalama kuli ifwe kabili alafwaya no kulakutika ku mapepo yesu. Ca cine, ipepo lishuko nga nshi ilyo Yehova atupeela.

² Na lyo line, Yehova asuka fye amapepo yesu nga ca kuti tulepepa ukulingana ne fyo afwaya. Kuti twapepa shani ukulingana ne fyo afwaya? Katumone ifyo Baibolo ilanda pa mapepo.

ICO TUPEPELA KULI YEHOVA

3. Mulandu nshi tulingile ukupepela kuli Yehova?

³ Yehova afwaya ukuti tulelanda nankwe mwi pepo. Cinshi twalandila ifi? Belengeni Abena Filipi 4:6, 7. Taleni tontonkanyeni pali aya amashiwi. Kabumba uwalinga ukuteka umuulu ne sonde alimubikako sana amano kabili afwaya ukuti mulemweba ifyo muleumfwa na mafya mukwete.

4. Bushe nga mulepepa lyonse kuli Yehova, bucibusa bwenu na ena bukaba shani?

⁴ Ipepo lilatwafwa ukupalama sana kuli Yehova no kuba cibusa wakwe. Nga ca kuti umuntu alelanshanya sana na cibusa wakwe pa fyo aletontonkanya ne filemusakamika, bucibusa bwabo bulakoselako. Ifi fine e fyo ciba nga tulepepa kuli Yehova. Yehova alimweba muli Baibolo ifyo atontonkanya ne fyo omfwa, kabili alimweba ne fyo akacita ku ntanshi. Nga mulelanda na Yehova lyonse, kuti mwamweba ne fili mu mutima wenu. Lyena, bucibusa bwenu na Yehova bukalakoselako fye.—Yakobo 4:8.

FINSHI TUFWILE UKULACITA PA KUTI LESA ALEUMFWA AMAPEPO YESU?

5. Twaishiba shani ukuti Yehova takutika ku mapepo yonse?

⁵ Bushe Yehova alakutika ku mapepo yonse? Awe. Mu nshita ya kwa kasesema Esaya, Yehova aebele abena Israele ati: “Nangu ca kuti mulafusha amapepo yenu, ine nshumfwa; iminwe yenu yaisulamo fye ukusumya umulopa.” (Esaya 1:15) Kanshi nga tatucenjele, nalimo kuti tulecita ifintu ifingalenga twaitalusha kuli Yehova ica kuti akaana no kulakutika ku mapepo yesu.

6. Mulandu nshi cawamina ukukwata icitetekelo? Kuti mwalanga shani ukuti mwalikwata icitetekelo?

⁶ Nga tulefwaya ukuti Yehova alekutika amapepo yesu, tulingile ukumutetekela. (Marko 11:24) Umutumwa Paulo atile: “Ukwabula icitetekelo te kuti tusekeshe Lesa, pantu uupalamina kuli Lesa afwile ukusumina ukuti e ko aba no kuti alalambula abamufwaisha.” (AbaHebere 11:6) Lelo ukulanda fye ukuti twalikwata icitetekelo te cifwaikwa fye iyo. Nga tulekonka amafunde ya kwa Yehova cila bushiku, e lyo tukalanga ukuti twalikwata icitetekelo.—Belengeni Yakobo 2:26.

7. (a) Cinshi tulingile ukuicefesha no kuba no mucinshi lintu tulepepa kuli Yehova? (b) Kuti twalanga shani ukuti tuli abafumacumi ilyo tulepepa?

⁷ Ilyo tulepepa kuli Yehova, tufwile ukuicefya no kuba no mucinshi. Mulandu nshi? Nga tulelanda ne mfumu nelyo kateka, tulaba no mucinshi. Apo Yehova ni Lesa Wa Maka Yonse, bushe tatufwile no kucilapo ukuba no mucinshi no kuicefya ilyo tulelanda nankwe? (Ukutendeka 17:1; Amalumbo 138:6) Na kabili, tulingile ukuba abafumacumi ilyo tulepepa kuli Yehova kabili tufwile ukulapepa no mweo onse, te kulabwekeshabwekeshapo fye amashiwi.—Mateo 6:7, 8.

8. Nga ca kuti tulepepela ifintu fimo, finshi fimbi ifyo tulingile ukucita?

⁸ Kanshi nga ca kuti tulepepela ifintu fimo, tulingile ukubombesha pa kuti tukwate ifintu ifyo tulepepela. Ku ca kumwenako, nga tulepepa ukuti Yehova atupeele ifintu ifyo tukabila cila bushiku, te kuti twenekele ukutila alatupeela nga ca kuti twaikala fye ukwabula ukucitapo nangu cimo. Kanshi tufwile ukubombesha pa kuti tukwate ifyo tukabila. (Mateo 6:11; 2 Abena Tesalonika 3:10) Na kabili nga ca kuti tulepepa ukuti Yehova atwafwe ukuleka imisango yabipa, tatulingile ukucita icintu nangu cimo icingalenga twatunkwa ukucita ifyabipa. (Abena Kolose 3:5) Lekeni nomba tulande pa mepusho ayo abantu abengi bepusha pe pepo.

AMEPUSHO AYO ABANTU BEPUSHA SANA PE PEPO

9. Ni kuli nani tufwile ukulapepa? Finshi amashiwi ayaba pali Yohane 14:6 yatusambilisha pe pepo?

⁹ Ni kuli nani tufwile ukulapepa? Yesu asambilishe abasambi bakwe ukulapepa kuli “Shifwe wa mu muulu.” (Mateo 6:9) Na kabili atile: “Nine nshila ne cine no mweo. Takuli uwisa kuli Tata kano aishila muli ine.” (Yohane 14:6) Kanshi tufwile ukulapepa fye kuli Yehova ukupitila muli Yesu. Bushe amashiwi ya kuti ukupepa ukupitila muli Yesu, yalola mwi? Pa kuti Yehova aleyasuka amapepo yesu, tulingile ukucindika umulimo uo apeele Yesu. Twalisambilila ukuti Yehova atumine Yesu pano isonde ku kutulubula ku lubembu ne mfwa. (Yohane 3:16; Abena Roma 5:12) Na kabili, Yehova alisonta Yesu ukuba Shimapepo Mukalamba kabili Kapingula.—Yohane 5:22; AbaHebere 6:20.

10. Bushe tufwile ukufukama, ukwiminina, nelyo ukwikala lintu tulepepa? Londololeni.

¹⁰ Bushe tufwile ukufukama, ukwikala, nelyo ukwiminina ilyo tulepepa? Awe. Baibolo itusambilisha ukuti nampo nga natufukama, natwikala nelyo natwiminina, tufwile ukuba no mucinshi ilyo tulepepa kuli Yehova. (1 Imilandu 17:16; Nehemia 8:6; Daniele 6:10; Marko 11:25) Icacindama sana kuli Yehova kuba no mucinshi no kuicefya ilyo tulepepa. Kuti twapepa ninshi natwikatisha ne shiwi nelyo mu mutima inshita fye iili yonse, nampo nga kasuba nelyo ubushiku. Nga tulepepa, kuti twacetekela ukuti nangu takuli umuntu nangu umo uuleumfwako, Yehova ena alomfwa.—Nehemia 2:1-6.

11. Fintu nshi ifyo twingapepelapo?

¹¹ Fintu nshi twingapepelapo? Kuti twapepela pa fintu fyonse ifilingene no kufwaya kwa kwa Yehova. Baibolo itila: “Conse ico twalomba, cikulu fye nacilingana no kufwaya kwakwe, alatumfwa.” (1 Yohane 5:14) Bushe kuti twapepela na pa fintu ifikumine ifwe bene? Ee. Ilyo tulepepa kuli Yehova tufwile ukulanshanya nankwe nga filya fine twingalanshanya na cibusa wesu uo twatemwa sana. Kuti twaeba Yehova ifintu fyonse fye ifyo tuletontonkanyapo ne fili mu mutima. (Amalumbo 62:8) Kuti twamulomba ukuti atupeele umupashi wakwe uwa mushilo uwa maka pa kuti utwafwe ukucita ifyalungama. (Luka 11:13) Na kabili, kuti twapepa kuli Yehova ukuti atupeele amano pa kuti tulesala bwino ifya kucita, kabili kuti twamulomba ukutupeela amaka ya kushipikisha amafya. (Yakobo 1:5) Tufwile ukulomba Yehova ukuti atwelele imembu shesu. (Abena Efese 1:3, 7) Na kabili, tulingile ukulapepelako na bantu bambi pamo nga balupwa wesu na ba bwananyina mu cilonganino.—Imilimo 12:5; Abena Kolose 4:12.

12. Finshi ifyo tulingile ukubalilapo ukulumbula mu mapepo yesu?

¹² Finshi ifyo tulingile ukubalilapo ukulumbula mu mapepo yesu? Tufwile ukubalilapo ukulumbula Yehova no bufwayo bwakwe. Tulingile ukumutootela no mutima onse pa fintu fyonse ifyo atucitila. (1 Imilandu 29:10-13) Na kuba, ifi fine e fyo Yesu asambilishe abasambi bakwe ukulapepa lintu ali pano calo. (Belengeni Mateo 6:9-13.) Abebele ukuti balingile ukubalilapo ukulapepa ukuti ishina lya kwa Lesa libe ilya mushilo nelyo licindikwe. Lyena Yesu alangilile ukuti tulingile ukulapepa ukuti Ubufumu bwa kwa Lesa bwise no kuti ukufwaya kwa kwa Yehova kucitike pano isonde ponse. E ico muli lilya ipepo lya cilangililo, Yesu alangilile ukuti nga twabalilapo ukulumbula ifi ifintu ifyacindama, e lyo twingapepela pa fintu ifyo tulekabila. Kanshi nga tulebalilapo ukulumbula Yehova no bufwayo bwakwe mu mapepo yesu, ninshi tulelanga ukuti ifi e fintu twacindamika sana.

13. Bushe amapepo yalingile ukulepa shani?

¹³ Bushe amapepo yesu yalingile ukulepa shani? Baibolo tayatweba. Amapepo yesu kuti yaba ayatali nelyo ayepi, ukulingana fye ne fyo tulefwaya ukweba Yehova pali iyo inshita. Ku ca kumwenako, nalimo kuti twapepa ipepo ilipi pa fya kulya, lelo kuti twapepa ipepo ilitali nga tulefwaya ukweba Yehova ifitusakamike nelyo nga tulefwaya ukumutootela. (1 Samwele 1:12, 15) Tatufwile ukulapepa amapepo ayatali pa kuti fye tusekeshe abantu nga fintu abantu bamo balecita mu nshiku sha kwa Yesu. (Luka 20:46, 47) Yehova tatemwa amapepo ya musango uyu. Icacindama kuli Yehova kulapepa no mutima onse.

14. Bushe miku inga tufwile ukupepa, kabili citusambilisha finshi pali Yehova?

¹⁴ Bushe miku inga tufwile ukupepa? Yehova afwaya ukuti tulelanda nankwe lyonse. Baibolo itila “akupepeni,” “beni no mute wa kupepa,” kabili “mulepepa ukwabula ukuleka” (Mateo 26:41; Abena Roma 12:12; 1 Abena Tesalonika 5:17) Yehova aliiteyanya ukukutika ku mapepo yesu lyonse. Kuti twamutootela cila bushiku pa kutemwa kwakwe na pa fintu ifingi ifyo atupeela. Na kabili, kuti twamulomba ukututungulula, ukutukosha, no kutusansamusha nga tuli na mafya. Nga ca kuti cine cine tulatasha pe shuko ilyo Yehova atupeela ilya kulapepa, tulepepa lyonse kuli ena.

15. Mulandu nshi tulingile ukulandila ukuti “ameni” pa mpela ye pepo?

¹⁵ Mulandu nshi tulingile ukulandila ukuti “ameni” pa mpela ye pepo? Ishiwi lya kuti “ameni” lipilibula ukuti “cibe ifyo fine.” Nga twalanda ili ishiwi ninshi tulesuminisha ukuti ifya cilandwa mwi pepo e fyo tulefwaya cibe. (Amalumbo 41:13) Baibolo itusambilisha ukuti calicindama ukulanda ukuti “ameni” pa mpela ye pepo lya ku cintubwingi nampo nga twalalandila mu mutima nelyo natwikatisha ishiwi pa kulanga ukuti natusuminisha ifyo bacilanda mwi pepo.—1 Imilandu 16:36; 1 Abena Korinti 14:16.

IFYO LESA ASUKA AMAPEPO YESU

16. Bushe cine cine Yehova alasuka amapepo yesu? Londololeni.

¹⁶ Bushe cine cine Yehova alasuka amapepo yesu? Ee, alasuka. Baibolo ita Yehova ukuti ‘uumfwa ipepo.’ (Amalumbo 65:2) Yehova alomfwa kabili alasuka amapepo ya bantu abengi nga nshi mu nshila ishalekanalekana.

17. Bushe Yehova abomfya shani bamalaika na babomfi bakwe aba pano isonde ku kwasuka amapepo yesu?

¹⁷ Yehova alasuka amapepo yesu ukubomfya bamalaika na babomfi bakwe aba pano isonde. (AbaHebere 1:13, 14) Ku ca kumwenako, kwaliba abantu abengi sana abapepa ukuti Yehova abafwe ukusambilila Baibolo, tapapita na nshita ba Nte balabatandalila. Baibolo ilanda ukuti bamalaika balabila “imbila nsuma” mwi sonde lyonse. (Belengeni Ukusokolola 14:6.) Na kabili, fwe bengi twalipepapo kuli Yehova pa bwafya bumo nelyo pali fimo ifyo twalekabila kabili munyinefwe nelyo nkashi alitwafwile.—Amapinda 12:25; Yakobo 2:16.

18. Bushe Yehova abomfya shani umupashi wakwe uwa mushilo na Baibolo ku kwasuka amapepo yesu?

¹⁸ Na kabili, Yehova alabomfya umupashi wakwe uwa mushilo ku kwasuka amapepo yesu. Nga twapepa ukuti Yehova atupeele amaka ya kushipikisha ubwafya, nalimo kuti atupeela umupashi wakwe uwa mushilo pa kuti ututungulule no kutupeela amaka. (2 Abena Korinti 4:7) Na cimbi ico Yehova abomfya ku kwasuka amapepo yesu na pa kutwafwa ukusala bwino ifya kucita, ni Baibolo. Ilyo tulebelenga Baibolo, kuti twasanga amalembo ayengatwafwa. Na kabili, Yehova kuti abomfya aba bwananyina ukulanda ifingatwafwa lintu baleyasukapo pa kulongana. Kuti abomfya na baeluda abengatwebako amashiwi yamo aya mu Baibolo.—Abena Galatia 6:1.

19. Mulandu nshi inshita shimo nalimo twingalaumfwila kwati Yehova taleyasuka amapepo yesu?

¹⁹ Na lyo line, inshita shimo kuti twayipusha atuti, ‘Cinshi Yehova ashilayasukila ipepo lyandi na nomba?’ Muleibukisha ukuti Yehova alishiba ilyo engasuka amapepo ne fyo engayasuka. Alishiba ifyo tukabila. Nalimo tufwile ukutwalilila ukulapepa pa kuti tulange ukuti cine cine tulefwaisha ifyo tulepepela na pa kutila tulange ukuti cine cine twalimutetekela. (Luka 11:5-10) Inshita shimo Yehova alasuka amapepo yesu mu nshila iyo tushileenekela no kwenekela. Ku ca kumwenako, nalimo kuti twapepela pa bwafya bumo, lelo mu nshita ya kufumyapo ubu bwafya, limbi Yehova kuti atupeela fye amaka pa kuti tushipikishe.—Belengeni Abena Filipi 4:13.

20. Mulandu nshi tufwile ukulapepela kuli Yehova lyonse?

²⁰ Ala lishuko ilikalamba nga nshi ilyo Yehova atupeela ilya kulalanda nankwe mwi pepo! Kuti twacetekela ukuti alomfwa amapepo yesu. (Amalumbo 145:18) Nga tulepepa lyonse kuli Yehova no mutima onse, bucibusa bwesu na ena bukalakoselako.