Umulimo Uutuletela Sana Insansa
1. Mulimo nshi uwa kwa Yehova ulecitika muno nshiku?
1 Abamweneko uko abalwele baleundapwa mu nshita ya batumwa balisansamwike icine cine. (Luka 5:24-26) Na lelo line, tulasekelela ukumona uko umulimo uwa kwafwa abantu ukwishiba Yehova ulecitika. (Ukus. 22:1, 2, 17) Tulatemwa ilyo tubelenga amalyashi ya bantu abo Icebo ca kwa Yehova no mupashi wa mushilo fyayalula! Lelo kwena, icacilapo ukuwama kubombako uyu mulimo wa kulatungulula isambililo lya Baibolo ililunduluka.
2. Ni nsansa nshi twingakwata ilyo tulesambilisha umuntu icine?
2 Ishina lya kwa Lesa ni nani? Mulandu nshi asuminishisha ukucula? Cinshi Ubufumu bwa kwa Lesa bukacitila abantu? Tulasekelela ilyo tuleasuka ifipusho fya musango uyu, e lyo na lintu tulemona uko umusambi asansamuka nga asambilila icine. (Amapi. 15:23; Luka 24:32) Ilyo umusambi alelunduluka kuti napamo atendeka ukubomfya ishina lya kwa Yehova, atampa no kufwala bwino, kuti aleka ne mibele yabipa no kutendeka ukushimikilako bambi icine. Nga ca kuti alunduluka ku kuipeela no lubatisho, alesa mukuba munyinefwe kabili kabomba munensu. Ishi nshila shonse twalumbula, shilatusansamusha.—1 Tes. 2:19, 20.
3. Ni nshila nshi ishisuma isho twingabomfya pa kutendeka isambililo lya Baibolo?
3 Bushe Kuti Mwabombako? Nga kuti mwatemwa ukubombako uyu mulimo uutuletela sana insansa, lombeni kuli Yehova pa kuti mukwate isambililo lya Baibolo, e lyo mulebomba ukulingana ne fyo mulepepela. (1 Yoh. 5:14) Shimikileni uko abantu bengasangwa kabili pa nshita mwingabasanga. Lyena, nga mwakwata ishuko, esheni ukutendeka isambililo lya Baibolo. (Luk. Mil. 11:6) Nga ca kuti mwasanga abalefwaya ukusambilila kabili mwabyala imbuto sha cine, bweleleniko ku kutapilila.—1 Kor. 3:6-9.
4. Mulandu nshi tulingile ukucincila pa kutendeka amasambililo ya Baibolo?
4 Kucili abantu abengi abaleumfwa insala ne cilaka ca bulungami. Nani akabaafwa ukwishibe cine pa kulabatungulula isambililo lya Baibolo? (Mat. 5:3, 6) Shi natuipeeleshe ukubombako umulimo wa kushimikila ukufikila apo ukapwila no kulenga abantu ukuba abasambi ilyo ukulobolola kushilapwa.—Esa. 6:8.