Bushe Na Imwe Kuti Muleshimikilako pa Mulungu?

1. Cinshi twingasambilila ku fyo Paulo na bakabomba banankwe bacitile mu Filipi?

¹ Ubushiku bwe Sabata, e bushiku abaYuda abengi abaleikala mu Filipi baletuusha. Paulo na Bena Kristu alebomba nabo batandalile uyu musumba ilyo bali pa lwendo lwabo ulwa kushimikila. Nga basalilepo ukutuusha pali ubu bushiku, nga tapali uuli onse wali no kubaseka. Lelo kwena, balishibe ukuti abaYuda balelongana pa nse ya musumba ku kupepa, e co basalilepo ukubashimikila pali ubu bushiku. Paulo na banankwe bafwile balitemenwe nga nshi ilyo Lidia akutike ku cebo ica kuti na ba mu ng’anda yakwe bonse babatishiwa! (Imil. 16:13-15) Apo abengi balatuusha pa Mulungu, bushe te kuti musheko inshita pali ubu bushiku no kuyabashimikila?

2. Mafya nshi abantu ba kwa Yehova bacimfishe pa kuti baleshimikila pa Mulungu ukwabula ukubacusha?

² Calyafishe Ukulashimikila Pa Mulungu: Mu mwaka wa 1927, abantu ba kwa Yehova babakoseleshe ukulashako inshita ya kushimikila cila Mulungu. Ilyo batendeke, abantu bamo balikalipe no kutendeka ukubacusha. BaNte abengi balibekete mu United States pa mulandu wa kuti baletoba ifunde lye Sabata lya pa Mulungu, balefulunganya umutende mu calo, no kushitisha impapulo ukwabula ifitupa. Lelo abantu ba kwa Yehova tabalekele ukushimikila. Mu ma 1930 batendeke ukupekanya amakampeni ya mu mabumba mabumba aya kuti bakasabankanya ba mu filonganino ifyapalamene balekumana pamo pa kuti baleshimikila icifulo conse. Inshita shimo bakapokola baleikata bakasabankanya, lelo bakasabankanya balefulisha ica kuti balefilwa ukubalesha. Bushe mulatasha icine cine pa kubombesha uko bamunyinefwe babombele pa kuti tuleshimikila pa Mulungu ukwabula ukutucusha?

3. Mulandu nshi cawamina ukushimikila pa bushiku bwa pa Mulungu?

³ Ubushiku Ubwawama Ukushimikilamo: Abengi balaba pa mayanda ubushiku bwa pa Mulungu pantu tabaya ku ncito. Ilingi line, e lyo batuusha. Bamo abaya ku mapepo balatemwa sana ukulanda pa fya kwa Lesa pa Mulungu. Apo tulalongana pa Mulungu, ifyo tufwala ku kulongana ni filya fine tufwala na lintu tuleya mu kushimikila. Bushe batini teti tubombeko umulimo wa kushimikila ilyo tushilalongana nelyo ilyo twapwisha ukulongana? Nga kuti mwakwanisha, kuti mwasenda no twa kulya utwayanguka.

4. Busuma nshi tukasanga nga tuleshimikilako pa Mulungu?

⁴ Nga tuleshimikilako pa Mulungu, kuti tuleshalako ne nshita ya kutuusha iyo tukabila sana. Kabili ilyo tuletuusha tukalaba ne nsansa pa mulandu wa kuti natubombako umulimo wa mushilo. (Amapi. 19:23) Kuti twaba ne nsansa sana nga twasanga no muntu uwaba nga Lidia!