Mulepoosa Bwino Inkonya
1. Bushe kuti twabomfya shani 1 Abena Korinti 9:26 mu mulimo wa kushimikila?
1 Umutumwa Paulo alembele ati: “Ine ifyo mbutuka nshibutuka ngo ulebutuka icibutukebutuke; ifyo mpoosa inkonya te filya uuleuma umwela acita.” (1 Kor. 9:26) Paulo alelanda pa fyo abikile sana amano ku kucita ukufwaya kwa kwa Yehova. Na lyo line aya mashiwi alandile kuti twayabomfya na mu mulimo wa kushimikila. Pa kuti mufume ifisuma mu mulimo wesu, tufwile ukulapoosa bwino “inkonya,” nelyo ukwishiba ukubomba bwino umulimo wesu. Kuti tulecita shani ifyo?
2. Bushe kuti twapashanya shani Paulo na bakabila banankwe aba mbila nsuma ilyo tulesala inshita ne cifulo ukwa kushimikila?
2 Muleya Ukusangwa Abantu: Umutumwa Paulo na bakabila banankwe aba mbila nsuma, baleya mu kushimikila uko baishibe ukuti kuti kwasangwa abantu. (Imil. 5:42; 16:13; 17:17) Kanshi ababa mu cifulo tushimikila nga basangwa pa mayanda icungulo, ninshi kuti yaba e nshita isuma iya kushimikila ku ng’anda ne ng’anda. Nga ca kuti pa citesheni ca basi nelyo ice shitima palaba sana abantu ulucelo ilyo baleya ku ncito nangu icungulo ilyo balebwela, e lyo nga mwalishiba inshita abantu bafula sana pa matuuka nangu pa maliketi mu cifulo mubombela, ninshi kuti mwabomba bwino sana ubunte bwa mu musebo pali uto tushita.
3. Kuti twapoosa shani bwino inkonya ilyo tulebombela mu cifulo cesu?
3 Muleiluka Ilyo Muleshimikila: Tufwile ukwishiba bwino ifya kupoosa inkonya na lintu tulebomba mu cifulo tushimikila. Ku ca kumwenako, kuti cawama ukwakanya ibumba ilikulu mu tumabumba ukucila ukuya ibumba lyonse mu cifulo cimo pantu ninshi inshita iikulu kuti yapwila mu kwakanya ibumba ukucila ukubomba. E lyo kabili nga tulefwaya, kuti twalomba icifulo ca kushimikilamo icaba mupepi na kuntu twikala pa kuti tatulepoosa sana inshita ya kwenda.
4. Cinshi cingatwafwa ukuba “abalondo ba bantu” abafikapo?
4 Yesu alingenye bakabila ba mbila nsuma ku “balondo ba bantu.” (Marko 1:17) Ico abalondo be sabi bafwaya, kwikata isabi, te kupoosa fye isumbu mu menshi. E ico, abalondo abaishiba bwino incito yabo baleshiba inshita isabi lifwa sana ne ncende ukusangwa sana isabi kabili tabawayawaya nga bafika kuli iyo ncende. E co kanshi balishiba ifya kubomba incito yabo bwino. Shi na ifwe natube abacincila ilyo tulebomba umulimo wesu uwa kushimikila.—Heb. 6:11.