Amepusho Ukufuma ku Babelenga
Mulandu nshi abantu bamo balandila ukuti amashiwi yaba pa Amalumbo 12:7 yalanda pa fyo Yehova alandile, nangu ca kuti Baibo ya Amalembo ya Calo Cipya itila yalanda pa bantu “abo bacusha”?
Amashiwi yaba muli aya Amalumbo yalanda pa bantu.
Pa Amalumbo 12:1-4 Baibo ilanda ati “abantu abacetekelwa nabaloba pa bantu.” Lyena pa Amalumbo 12:5-7 atile:
“‘Pa mulandu wa bacula abo bacusha,
Pa mulandu wa kuteta kwa bashakwata bakubafwa,
Nkema nkacitepo cimo,’ e fyo Yehova alanda.
‘Nkabapususha ku babacusha.’
Ifyo Yehova alanda fyalisanguluka;
Fyaba nga silfere iyo balopolola mwi lungu lya mulilo ilye bumba, iyo baengulula imiku 7.
Mukabacingilila mwe Yehova;
Mukacingilila bonse kuli ino nkulo umuyayaya.”
Icikomo 5 cilanda pa fyo Yehova akacitila “abo bacusha.” Citila akabapususha.
Icikomo 6 cilanda no kuti “ifyo Yehova alanda fyalisanguluka; fyaba nga silfere iyo balopolola.” Ifi fine e fyo fwe Bena Kristu tumona Icebo ca kwa Lesa.—Amalu. 18:30; 119:140.
Mu maBaibo yamo bapilibula amashiwi yaba pa Amalumbo 12:7 ukuti: “Mukaficingilila.”
No mulandu bapilibwila ifi wa kuti, mu cikomo 6 mwaba amashiwi ya kuti “ifyo Yehova alanda.” Kanshi bamo bamona ukuti amashiwi yaba mu cikomo 7 yalola mu kuti Lesa ‘alacingilila’ ifyo alanda. Kabili twalishiba ukuti Lesa alitwalilila ukucingilila Baibo ku balwani bakwe abafwaya ukuti abantu bekwata Baibo nelyo abafwaya ukuilofya.—Esa. 40:8; 1 Pet. 1:25.
Nomba na mashiwi yaba mu cikomo 5 ya cine. Yehova alapokolola “abacula” na “abo bacusha” kabili akatwalilila ukubafwa.—Yobo 36:15; Amalu. 6:4; 31:1, 2; 54:7; 145:20.
Kanshi bushe ni bani abo Yehova acingilila, bantu nangu fintu ifyo alanda?
Amashiwi yaba muli aya Amalumbo yalanda pa bantu.
Pa Amalumbo 12:1 Davidi abalilepo ukulanda pa bantu “aba cishinka” abo ababifi babepa. Mu cikomo 3, tubelenga ukuti Yehova akalofya bonse ababepa ubufi. Amashiwi yaba muli aya Amalumbo yalenga twacetekela ukuti Lesa akapokolola abantu bakwe pantu ifyo alanda fyalilopololwa.
Kanshi icikomo 7 cilanda fye ukuti Yehova akalinda no kucingilila abantu abo ababifi bacusha.
Ifi bapilibula mu maBaibo yamo ukuti “mukabacingilila” e fyaba na mu fyalembwa fya kale ifya ciHebere. Mu Malembo ya ciGriki aya Septuagint balibomfya amashiwi ya kuti “mukatucingilila” imiku ibili mu cikomo 7. Kanshi aya mashiwi yalanda pa bantu aba cishinka abo bacusha. Icikomo 7 calekelesha na mashiwi ya kuti “mukacingilila bonse kuli ino nkulo umuyayaya,” e kutila ukubacingilila ku bantu abalecita “sana ifyabipa.” (Amalu. 12:7, 8) Muli Baibo bapilibwile ukufuma mu ciHebere ukutwala mu ciAramaiki, pa cikomo 7 paba amashiwi ya kuti: “Imwe mwe SHIKULU, mukacingilila abalungama, mukabacingilila kuli ino nkulo ya babifi umuyayaya.” Ici na co cilanga fye apabuuta tuutu ukuti amashiwi yaba pa Amalumbo 12:7 tayalanda pa fyo Lesa alanda.
Kanshi amashiwi yaba pali ili lembo yalalenga “aba cishinka” bakwata isubilo lya kuti Yehova akabapokolola ku babifi.