Yehova Aleasuka Amapepo Yandi

UKUTUTANDALILA UKWALENGELE UKUTI TWALUKE

Nafyelwe pa 22 December, 1929, mu mushi uunono uwa Noville umwali fye amafarmu 9 uwaba mupepi ne tauni lya Bastogne mu ncende ya Ardennes iyabela ku Belgium. Ndebukisha ifyo twaleikala bwino pa farmu na bafyashi bandi ilyo nali umwaice. Ine no mwaice wandi Raymond twalitemenwe ukulaya mu kukama umukaka wa ng’ombe cila bushiku e lyo no kula-afwako abafyashi besu ukusombola ifya kulya. Mu mushi wesu uunono abantu bali abaikatana kabili baleafwana.

Abafyashi bandi ba Emile na ba Alice bali ni baKatolika abakamamo na menshi. Lyonse pa Mulungu baleya ku ceici. Na lyo line, nalimo mu 1939, bapainiya abaume abafumine ku England balishiletandalila umushi wesu no kweba batata ukuti kuti balembeshako ukulapokelela magazini iya Consolation (iyo pali ino nshita twita ukuti Loleni!) Apo pene fye batata balishibe ukuti balisangile icine kabili balitendeke ukulabelenga Baibo. Ilyo batata balekele ukulaya mu kupepa ku Katolika, abena mupalamano besu balitendeke ukulabacusha sana nangu ca kuti pa kubala baleumfwana fye bwino. Balepatikisha batata ukuti batwalilile ukulapepa ku Katolika, ne ci calengele baleumanina sana pali ili lyashi.

Calenkalipa sana ukumona ifyo abena mupalamano besu balepatikisha batata ukutwalilila ukupepa ku Katolika. E calengele mpepe kuli Lesa ukuti afwe batata nga fintu nacilandapo pa kutendeka kwa cino cipande. Ilyo abena mupalamano balekele ukucusha batata, nalyumfwile bwino sana. Nalishininkishe ukuti Yehova ‘alomfwa amapepo.’

IFYO IFINTU FYALI ILYO KWALI INKONDO

Ilyo abaNazi ba ku Germany basanshile icalo ca Belgium pa 10 May, mu 1940, abantu abengi balifulumwike mu calo. Ulupwa lwesu lwafulumukile ku kapinda ka ku kulyo aka calo ca France. Ilyo twalefulumuka, inshita shimo twalepita mu ncende umo abashilika ba bena Germany na bashilika ba bena France balelwila.

Ilyo papitile inshita, twalibwelele pa farmu yesu, kabili twaishilesanga ukuti balitwibile ifintu ifingi. Imbwa yesu Bobbie, e yashelepo fye. Ifi ifyalecitika fyalengele ndeyipusha nati, ‘Mulandu nshi kwabela inkondo no kucula?’

Pali iyi nshita, nga ca kuti munyinefwe Emile Schrantz,a uwali painiya kabili eluda atutandalila, aletukoselesha sana. Alelondolola bwino ukubomfya Baibo ico abantu baculila kabili aleasuka na mepusho ayengi ayo nakwete. Nalitwalilile ukulatemenwako sana Yehova kabili naishileshininkisha ukuti ni Lesa uwatutemwa.

Na lintu inkondo ishilapwa, bonse mu lupwa lwesu twalemonana na bamunyinefwe abengi kabili twalelanshanya nabo. Mu August, 1943, munyinefwe José-Nicolas Minet alishile pa farmu pa mwesu mu kulanda ilyashi. Aipwishe ukuti, “Ni bani balefwaya ukubatishiwa?” Ine na batata twalimishe amaboko. Kabili twalibatishiwe mu mumana uunono uwali mupepi ne farmu lyesu.

Mu December mu 1944, abashilika abena Germany balisanshile sana ifyalo fyaba ku masamba ya Europe. Uyu e muku wa kulekeleshako basanshile ifi fyalo kabili iyi nkondo baita ukuti Inkondo ya Bulge. Twaleikala mupepi na uko balelwila iyi nkondo. Kanshi mupepi na pa mweshi uutuntulu twaleikala fye mu muputule uwali panshi ya ng’anda yesu. Bushiku bumo ilyo nafumine panse ukuti ndeya mu kupeela ifitekwa fyesu ifya kulya, amabomba yalipuulike pa farmu no konaula icikuulwa umo twalesungila ifya kulya fya fitekwa. Umushilika umwina America uwali mwi cinka ambilikishe ati, “Laala panshi!” nalibutukile uko aali no kuyalaala panshi, e lyo amfwika icimpompo pa kuti ancingilile.

IFISUMA IFYALECITIKA ILYO NALEKULA MU FYA KWA LESA

Pa numa ya nkondo, twalelanshanya lyonse na ba bwananyina abali mu cilonganino cali mu musumba wa Liège, uwali apalepele amakilomita 90 ku kapinda ka ku kuso ukufuma kwi tauni twaleikalamo. Mu kuya kwa nshita, twaishilepanga ibumba ilinono mwi tauni lya Bastogne. Naishiletendeka ukubomba incito mu buteko iya kusonkesha imisonko kabili nalisambilile ifya buloya. Pa numa naishileba loya kabili naishiletendeka ukubomba ku buteko. Mu 1951, twalipekenye ukulongana kwa muputule mu Bastogne. Abantu mupepi na 100 e basangilweko, kabili pa basangilweko pali na painiya uwali uwacincila, nkashi Elly Reuter. Alicofele incinga yakwe amakilomita 50 pa kuti asangwe kuli uku kulongana. Tapakokwele twalitemwanene kabili nalimukobekele. Ilyo nalemukobekela ninshi nkashi Elly balimwita ukuya kwi Sukulu lya Gileadi ku United States. Ba Elly balilembeele aba ku maofesi yakalamba umulandu bashali no kuila ku sukulu. Munyinefwe Knorr, uwaletungulula abantu ba kwa Yehova pali ilya nshita, alembeele ba Elly ukuti nalimo ku ntanshi kuti twaya bonse kwi Sukulu lya Gileadi. Twaupene mu February, mu 1953.

Muli ulya wine mwaka, ine na ba Elly twaile ku kulongana kwa citungu ukwaleti New World Society Assembly ukwabelele mu Yankee Stadium, mu New York. Ilyo twali pali uku kwine kulongana, nalikumene na munyinefwe uwalefwaya ukunyingisha incito iisuma, kabili anjebele ukuti tukuukile ku United States kwine. Pa numa ya kupepelapo kuli Yehova, twapingwilepo ukubwelelamo ku Belgium no kuya mu kubombela pamo ne bumba ilinono ilya bakasabankanya 10 abali mwi tauni lya Bastogne. Umwaka wakonkelepo, twalitemenwe sana ilyo twakwete umwana umwaume, Serge. Ku ca bulanda, pa numa fye ya myeshi 7, Serge alilwele kabili alifwile. Twale-eba Yehova ubulanda twalekwata, kabili twalekoseleshiwa nga twatontonkanya pe subilo lya kubuuka.

NATENDEKA UMULIMO WA NSHITA YONSE

Mu October, mu 1961, nalisangile incito iya kuti nali no kulakwata ne nshita ya kubomba bupainiya. Lelo pali bulya bwine bushiku, umubomfi wa musambo mu Belgium alintumiine foni, kabili anjipwishe nga kuti natemwa ukuba umubomfi wa muputule (uo pali ino nshita beta ukuti kangalila wa muputule). Namwipwishe nati, “Bushe te kuti tubale tubombeko bupainiya ilyo tushilatendeka ukubomba uyu mulimo?” Aba ku Bethel balitusuminishe. Pa numa ya kubombako bupainiya pa myeshi 8, nalitendeke ukubomba umulimo wa bukangalila wa muputule mu 1962.

Pa numa ya kubomba bukangalila bwa muputule pa myaka ibili, balitwitile ukuya mu kubombela pa Bethel mu Brussels. Twatendeke ukubombela pa Bethel mu October, mu 1964. Uyu mulimo twatendeke ukubomba walilengele twapaalwa nga nshi. Tapakokwele ukutula apo twailile mu Bethel, munyinefwe Knorr alitandalile Bethel yesu mu 1965 kabili nalipapile sana ilyo bansontele ukuba umubomfi wa musambo. Pa numa, ine na ba Elly balitwitile ukuya kwi Sukulu lya Gileadi ilyalenga 41. Amashiwi ayo munyinefwe Knorr alandile yalifikilishiwe ninshi palipita ne myaka 13! Ilyo twapwishishe isukulu, twalibwelele ku Bethel ya mu Belgium.

UKUCINGILILA INSAMBU ISHO ABANTU BA KWA YEHOVA BAKWATA

Pa myaka iingi, nalikwata ishuko lya kubomfya ifyo nasambilila ifya buloya ukucingilila abantu ba kwa Yehova pa kuti balemupepa mu Europe e lyo na mu fyalo fimbi. (Fil. 1:7) Ici calenga nandepo na balashi ba buteko ukucila mu fyalo 55 umo baleseshepo imilimo yesu imo nelyo umo babindile umulimo wesu. Mu nshita ya kulaeba abalashi ba buteko ifyo naishibe apo nine loya, nalebeba fye ukuti “ndi muntu wa kwa Lesa.” Lyonse nalepepa kuli Yehova ukuti alentungulula kabili naleibukisha ukuti “umutima wa mfumu (nelyo kapingula) waba nge milonga mu minwe ya kwa Yehova. Aulosha konse uko alefwaya.”—Amapi. 21:1.

Ncili ndebukisha ifyo nalanshenye no mulashi umo uwa mu ng’anda ya mafunde iya ku Europe. Pa miku iingi nalemulomba ukuti nkalandepo nankwe, kabili asukile asumina. Anjebele ukuti, “Nakupeela fye amamineti 5, wicilapo.” Nalikonteme no kutendeka ukupepa. Uyu mwaume alimoneke ukuti ali no mwenso ilyo anjipwishe ifyo nalecita. Ilyo nainwine umutwe, natile, “Nacilatasha Lesa pantu na imwe muli babomfi bakwe.” Anjipwishe ati, “Walosha mwi?” Namulangile amashiwi yaba pa Abena Roma 13:4. Apo uyu mwaume ali ni Protestanti, aya amashiwi ya mu Baibo ayo namulangile yalengele afwaye ukwishibilapo na fimbi. Cinshi cafuminemo? Twalilanshenye nankwe pa mamineti 30 kabili twalilanshenye bwino. Alandile no kuti alicindike umulimo Inte sha kwa Yehova babomba.

Pa myaka iingi, abantu ba kwa Yehova balitwala imilandu iingi ku cilye mu Europe pa mulandu wa kukanaitumpa mu fikansa fya calo, imilandu iikuma abana pamo na babasunga, imilandu ya misonko e lyo ne milandu imbi. Ndamona ukuti lishuko ukumona ifyo Yehova atwafwile ukucimfya iyi imilandu. Inte sha kwa Yehova balicimfya imilandu ukucila pali 140 mu cilye ca European Court of Human Rights.

BAMUNYINEFWE MU CUBA BAKWATA UBUNTUNGWA BWA KUPEPA

Muli ba 1990, nalebombela sana pamo na munyinefwe Philip Brumley, uwa ku maofesi yakalamba e lyo na munyinefwe Valter Farneti uwa ku Italy ku kwafwilisha bamunyinefwe mu Cuba. Twalebafwilisha pa kuti bakwate ubuntungwa bwa kupepa pantu imilimo yesu imo muli cilya calo bali-ileseshe. Nalilembele kalata ku maofesi ya beminishi ba calo ca Cuba ayali mu Belgium, kabili nalilanshenyeko no mulashi uo basalile ukuti tulanshanye nankwe. Pa miku iingi, twalifilwe ukulanshanya bwino pa calengele ubuteko buleshe imilimo imo muli cilya calo.

Ilyo twapepele kuli Yehova, twalilombele ukuti tutume amaBaibo 5,000 ku Cuba kabili ubuteko bwalitusuminishe. AmaBaibo yonse yalifikile ku Cuba kabili balipeele na ba bwananyina. Ici calengele tushininkishe ukuti Yehova aletupaala. Kabili twalilombele ukuti tutume amaBaibo na yambi 27,500. Na uno wine muku balitusuminishe. Ala nalitemenwe icine cine ifi na-afwilisheko ukuti bamunyinefwe mu Cuba bakwate Baibo.

Nalilepo ku Cuba imiku iingi mu kwafwilisha bamunyinefwe mu milandu ya mu cilye iyakuma umulimo wesu. Ici calilenga ndeumfwana na balashi ba buteko muli cilya calo.

UKWAFWILISHA ABA BWANANYINA MU RWANDA

Mu 1994, abantu ukucila pali 1,000,000 balifwile ilyo imitundu ibili yalelwa inkondo mu Rwanda. Ku ca bulanda, bamunyinefwe na bankashi bamo nabo balibepeye. Icilonganino ca kwa Lesa calyebele bamunyinefwe bamo ukupekanya ifya kwafwilisha bamunyinefwe abali muli cilya calo.

Ilyo ine na bo nali nabo twafikile mu Kigali, umusumba ukalamba uwa muli ici calo, twasangile ukuti amaofesi ya bakapilibula ne cikuulwa umwalefikila impapulo balilashilemo imfuti imiku iingi. Aba bwananyina balitushimikile amalyashi ayengi aya bulanda aya bamunyinefwe na bankashi abo baipaile kuli bapanga. Lelo balitushimikile na malyashi ayengi ayalelanga ifyo aba bwananyina balelanga ukuti balitemwana. Ku ca kumwenako, twalikumene no muTutsi uo ulupwa lwa bamunyinefwe abaHutu bafishile mu cilindi pa nshiku 28. Ilyo twakumene na bamunyinefwe na bankashi abacilile pali 900 mu Kigali, twalibakoseleshe no kubasansamusha mu Amalembo.

Pa numa twaile ku Zaire (icalo ico beta pali ino nshita ukuti Democratic Republic of the Congo) mu kufwaya ba Nte abengi abena Rwanda abafulumukile mu nkambi ya mbutushi iyali mupepi no musumba wa Goma. Lelo twalifililwe ukubasanga, e ico twalipepele kuli Yehova ukuti atutungulule. Pa numa ya kupepa, twamwene umwaume atulungama. Lyena twamwipwishe nga ca kuti kwali Inte sha kwa Yehova abo aishibe. Ayaswike ati, “E mukwai, na ine ndi Nte. Nalamutwala kuli bamunyinefwe abali muli komiti yafwilisha abaponenwe na masanso ayakalamba.” Pa numa ya kulanshanya na bali muli komiti, twalikumene na bamunyinefwe na bankashi mupepi na 1,600 abali muli iyi nkambi pa kuti tubakoseleshe no kubasansamusha. Kabili twalibabelengeele kalata iyafumine kwi Bumba Litungulula. Bamunyinefwe na bankashi balyumfwile bwino sana ilyo baumfwile amashiwi ayafumine kwi Bumba Litungulula ayaleti: “Lyonse tulamupepelako. Twalishiba ukuti Yehova takamulekeleshe.” Ala aya amashiwi Ibumba Litungulula lyalandile ya cine. Pali ino nshita, mu Rwanda mwaba ba Nte ukucila pali 30,000!

MFWAISHA UKUTWALILILA UKUBA UWA CISHINKA KULI YEHOVA

Umwina mwandi Elly afwile mu 2011, pa numa ya kwikala nankwe mu cupo mupepi ne myaka 58. Pa kupepa kuli Yehova nalemulondolwela ubulanda naleumfwa kabili alensansamusha. Na cimbi icalensansamusha, kubila imbila nsuma iya Bufumu ku bantu.

Nangu ca kuti nalicila imyaka 90, cila mulungu ndabila imbila nsuma. Na kabili ndaba ne nsansa ilyo mombela pa Bethel iyaba mu Belgium mu Dipartimenti Ilolekesha pa Milandu, ilyo nshimikilako abantu ifyo nabombela Lesa, e lyo na lintu nkoselesha abacaice ababa pa Bethel.

Napapita imyaka 84 ukutula apo napepele ipepo lya kubalilapo kuli Yehova. Lilya line napepele e lyo natendeke ukubombela Yehova kabili ukumubombela kwalilenga napalama sana kuli ena. Ndatasha sana Yehova pantu lyonse alasuka amapepo yandi.—Amalu. 66:19.b