Muleteyanya Umutima Wenu Ilyo Mushilatendeka Ukuisambilisha

Nga tuleisambilisha Baibo, tufwaya ifyo Yehova amona ifintu filetufika pa mutima. Kuti twasambililako kuli Esra ‘uwateyenye umutima wakwe pa kuti eshibe amafunde ya kwa Yehova.’ (Esra 7:10) Finshi twingacita pa kuteyanya imitima yesu?

Mulepepa. Ilyo mushilatampa ukuisambilisha, mulepepa. Mulelomba Yehova ukuti alemwafwa pa kuti muleumfwikisha ifyo muleisambilishapo kabili mulefikonka.—Amalu. 119:​18, 34.

Muleicefya. Lesa alafisa icine ku bantu aba cilumba kabili abaimona ukutila kuti baumfwa ifyaba mu Baibo nangu Lesa tabafwile. (Luka 10:21) Tamulingile ukulaisambilisha pa kuti fye abantu balemumona ukuti mwalishiba ifingi. Nga mwasambilila pali fimo kabili mwamona ukuti mufwile ukwaluka, muleicefya kabili mulealuka.

Kuti mwakutika ulwimbo lwa Bufumu. Inyimbo shilalenga twateyanya imitima yesu ilyo tushilatendeka ukupepa Lesa. Nga mwakutika ulwimbo lwa Bufumu ilyo mushilatendeka ukuisambilisha, kuti mwateyanya umutima wenu.