GEORGIA
Nalemona Ukuti Ifintu Fyalenyendela Bwino
Ba Madona Kankia
BAFYELWE MU 1962
BABATISHIWE MU 1990
Balipo mu kabungwe ka Komyunisimu mu Georgia kabili balyafwa abantu abengi ukusambilila icine. Mu 2015, balisangilwe kwi Isukulu lya Bakabila ba Mbila Nsuma ya Bufumu ilya kubalilapo mu Tbilisi.
ILYO natendeke ukusambilila icine mu 1989, abantu mwi tauni naleikala ilya Senaki balincindike sana pantu nali mu kabungwe ka Komyunisimu kabili ilingi nalesangwa na mu ng’anda ya mafunde iya buteko bwa Georgia. Kabili nalikobekelwe kanshi nalemona ukuti ifintu fyalenyendela bwino.
Nangu ca kuti bamayo na batata tabali ni ba Nte, balingafwile ukutemwa Lesa. Kanshi nalisumine muli Lesa nangu ca kuti nali Komyunisti. Ilyo natendeke ukusambilila Baibolo, nalisangile amasuko ku mepusho yonse ayo nakwete kabili nalipingwilepo ukuipeela kuli Yehova. Nomba balupwa lwandi, ifibusa, abo nalebomba nabo na nkobekela wandi tabatemenwe ifyo napingwilepo ukucita.
Ifyo nasuminemo fyalipusene sana ne ncito nalebomba iya mu buteko kabili fyalengele balupwa lwandi bampata. Nalipingwilepo ukufuma pa ng’anda, ukupwisha bunkobekela, ukuleka incito, ukufuma mu kabungwe no kuleka ukulaya mu ng’anda ya mafunde iya buteko bwa Georgia. Ilyo nabatishiwe, balupwa ne fibusa balicililemo ukulancusha. Apo abantu balinjishibe sana mwi tauni naleikala, nalikukiile ku musumba wa Kutaisi uko nailetendeka bupainiya ilyo nafikile fye.
Abantu nga banjipusha nga ca kuti cali fye bwino ukuculila pa fyo nasuminamo, ndabasuka ukwabula no kupoosa inshita ukuti naliba ne nsansa kabili nalitemwa ifyo napingwilepo ukucita. Nangu ca kuti abafyashi bandi tabaishibe bwino ico napingwililepo ukucita fyonse ifyo nacitile, ndabatasha sana pantu balinsambilishe ukutemwa Lesa na bantu. Pali ino nshita naliba sana ne nsansa.