Balelomba Ukuti Yehova Abafwe

BAMAYO balifulilwe sana ilyo ine no mwina mwandi Tsitso twaishileba Inte sha kwa Yehova. Bushiku bumo, balitile ulupwa lwesu lonse kabili baleenekela ukuti balandesha ukulalongana na ba Nte. Banjebele ukusalapo ukuleka ukuba Nte nelyo ukunkaana ukuti nshili lupwa wabo.

Napingwilepo ukukukila kwi tauni limbi. Apo nalebomba umulimo wa kufula ifyela, nasalilepo ukukukila ku Kutaisi umusumba na umbi uukalamba mu Georgia uko nalemona ukuti cali no kunyangukila ukusanga bwangu incito. Nalishibe no kuti bakasabankanya ba mbila nsuma muli uyu musumba balicepele, kanshi nalelomba Yehova ukuti angafwe.

Tapakokwele sana, nalikumenye umusambi umo uo nalesambilisha Baibolo uwaleikala mwi tauni ilinono ilya Jvari. Ilyo aumfwile ukuti naletontonkanya ukukukila ku Kutaisi, alimpaapete ukuti nkukile kwi tauni aleikala. Atile: “Twalikwata ing’anda. Ine, umwina mwandi na bana tukalaikala mu muputule umo, e lyo imwe na bena mwenu kuti muleikala mu muputule umbi.”

Apo nalelomba ukuti Yehova angafwe, namwebele ukutila kuti naikalako ku mwakwe panono nga ca kuti nasanga bwangu incito ne ng’anda iya kusonkela mu Jvari. Alimpapwishe sana ilyo abwelele bulya bwine bushiku mu cungulo ne pepala apo balembele incito shalekanalekana isho balefwaya aba kubomba.

Papitile fye inshiku ishinono, twalikukiile ku Jvari. Lilya line fye twafikile, nalisangile incito uko balemfolesha indalama ishingi nga nshi. Abakalamba ba ncito balimpeele ing’anda iikalamba sana iya kampani nalebombako. Ilyo papitile fye inshiku ishinono, bamunyinefwe balinjipwishe nga kuti nalabombako umulimo wa kupanga impapulo mu bumfisolo. Apo ing’anda twaleikalamo yali ne miputule 14, ine no mwina mwandi twalisumine ukuti tulepangilamo impapulo.

Pa myaka iingi, twalekwatila Icibukisho e lyo no kulongana kumbi ukwaibela mu ng’anda yesu. Abantu ukucila pali 500 balibatishiwe pa mwesu. Naliba sana ne nsansa apo nalimwene ifyo Yehova angafwile ilyo nakonkele ubutungulushi bwakwe.