Mulandu Nshi Abantu Bafililwa Ukuleta Umutende?—Finshi Baibo Yalandapo?

Intulungulushi sha fyalo e lyo no tubungwe twa mwi sonde balifilwa ukuleta umutende pe sonde. Muno nshiku kwaliba sana ifimfulunganya ukucila ifyo cali ilyo Inkondo ya Calo Iyalenga Bubili ishilatendeka. Abantu nalimo amabilioni yabili, e kuti mupepi na hafu ya bantu baba pe sonde bekala mu ncende umwaba sana ifimfulunganya.

Nomba mulandu nshi abantu bafililwa ukuleta umutende? Finshi Baibo yalandapo?

Imilandu itatu iyo abantu bafililwa ukuleta umutende

1. 1. Abantu balikwata imibele iilenga bafilwa ukuleta umutende. Baibo yalisobeele ukuti mu nshiku sha kulekelesha “abantu bakaba abaitemwa, abatemwa indalama, aba mataki, aba matutumuko, . . . abashaba na cishinka, . . . abashifwaya ifipangano, . . . abashailama, abankalwe, . . . bamunshebwa, aba cilumba.”—2 Timote 3:2-4.

2. 2. Abantunse, nampo ali umo nelyo bali abengi e lyo balebombela pamo, te kuti bapwishe amafya, lelo balakabila Kabumba wesu Yehovaa Lesa ukubaafwa. Baibo ilanda ukuti umuntu “takwata amaka ya kutungulula intampulo shakwe.”—Yeremia 10:23.

3. 3. Isonde litungululwa na kateka wabipa, Satana Kaseebanya uulufya “aba pano isonde bonse.” (Ukusokolola 12:9) Apo “icalo conse calaala mu maka ya mubifi,” inkondo ne fimfulunganya fikatwalilila ukubako.—1 Yohane 5:19.

Nani wingalenga kwaba umutende?

Baibo yalitweba ukuti kuli no kuba umutende, te bantu bakaleta umutende lelo ukafuma kuli Lesa.

• “‘Pantu ninjishiba amatontonkanyo ayo ndetontonkanya pali imwe,’ e fyasosa Yehova, ‘amatontonkanyo ya mutende, te ya bubi iyo, aya kumupeela inshita ya ku ntanshi iisuma ne subilo.’”—Yeremia 29:11.

Bushe Lesa akafikilisha shani ubu bulayo? “Lesa uupeela umutende akashonaula Satana” (Abena Roma 16:20) Lesa akabomfya ubuteko bwa ku muulu ubo Baibo ita ukuti “Ubufumu bwa kwa Lesa,” pa kuleta umutende pe sonde ponse. (Luka 4:43) Ilyo Yesu Kristu akaba Imfumu ya Bufumu, abantu bakasambilila ifya kwikala mu mutende.—Esaya 9:6, 7.

• Nga mulefwaya ukwishibilapo na fimbi, belengeni icipande citila “Finshi Ubufumu bwa kwa Lesa Bukacita?”