Asambilile ku Bafungwa

Mu 2011 umwaume umo afumine ku Eritrea no kwisa ku Norway nge mbutushi. Ilyo Inte sha kwa Yehova balandile nankwe, abebele ukuti ilyo ali ku calo ku mwakwe alelanshanya na ba Nte. Alandile ukuti ilyo ali ku bushilika, alimwene ukuti ba Nte balekaana ukwingila ubushilika nangu ca ukuti ukucita ifyo kwalelenga babacusha sana.

Lyena kwali ifyacitike ifyalengele uyu mwaume bamukake. Ilyo bamukakile aisangile na ba Nte batatu, amashina yabo ni ba Paulos Eyasu, ba Negede Teklemariam, na ba Isaac Mogos abo bakaka ukufuma mu 1994 pa mulandu ne fyo basuminamo.

Ilyo ali mu cifungo uyu mwaume aliimwenene ukuti Inte sha kwa Yehova balacita ifyo basambilisha abantu mu Baibolo. Alimwene ukuti aba ba Nte bali ne cishinka kabili baleyakanyako abafungwa banabo ifya kulya. Alimwene ne fyo ba Nte abafungwa balebelenga Baibolo pamo cila bushiku ne fyo baleitako abafungwa bambi ukusangwako. Lyonse balekana nga babapeela ifipepala ukuti balembepo ukuti balaleka ukuba Inte sha kwa Yehova pa kuti bafume mu cifungo.

Ifyo aba ba Nte balecita fyalifikile uyu mwaume pa mutima. Kanshi pa numa ilyo aishile ku Norway, alefwaya ukwishiba icalenga Inte sha kwa Yehova ukuba ne citetekelo icakosa. Ilyo ba Nte balandile nankwe, tapakokwele alitendeke ukusambilila Baibolo no kulaya mu kulongana.

Mu 2018 mu September, uyu mwaume alibatishiwe no kuba Inte ya kwa Yehova. Alabila sana imbila nsuma ku bantu abafuma ku Eritrea na ku Sudan kabili alabakoselesha ukulabelenga sana Baibolo no kuba ne citetekelo icakosa.