Umulabasa wa pa Setilaiti uwa JW Broadcasting Ulafika Ukushaba Intaneti

Cila mweshi tulafwaisha ukutamba amaprogramu e lyo na mavidio ayapya ayafuma pa JW Broadcasting ayatukoselesha icine cine. Na lyo line, bamunyinefwe abengi mu Africa balafilwa ukutamba aya amaprogramu pa Intaneti. Mulandu nshi?

Mu ncende ishingi mu Africa tamwaba Intaneti. Kabili mu ncende shimo shimo umwaba Intaneti, ilingi line ilashupa sana kabili yalikosa sana umutengo. Ku ca kumwenako, kangalila wa muputule umo ku Madagascar alikopolwelepo programu ya cila mweshi iya JW Broadcasting mu cikuulwa umo balipilisha ukubomfyako Intaneti. Bamulipilishe K352, ishi ndalama shingi sana ukucila pa sho abantu abengi bakwata pa numa ya kubomba umulungu uuntuntulu!

Te mulandu na aya mafya yonse, abantu abengi mu Africa balatamba JW Broadcasting ukwabula ukubomfya Intaneti. Bushe batamba shani?

Ukutula mu 2017, umulabasa wa JW Broadcasting ulatambika pa setilaiti mu fyalo fyabela ku kapinda ka ku kulyo aka ciswebebe ca Sahara mu Africa. Takwaba ukulipila pa kutamba uyu mulabasa, kabili ulatambika cila bushiku mu ndimi 16.

Pa kuti uyu mulabasa uletambika pa setilaiti, Inte sha kwa Yehova shilalipila akampani kasabankanya imilabasa pa setilaiti. Setilaiti babomfya isabankanya imilabasa mu fyalo nalimo 35 ifyabela ku kapinda ka ku kulyo aka ciswebebe ca Sahara mu Africa. Balipila aka kampani indalama ukucila pali K264,000 cila mweshi. Limo limo balalipila indalama na shimbi nga balefwaya ukutambisha ukulongana kumo ilyo kulecitika ukubomfya umulabasa umbi. Ici cilenga abantu abengi baletamba ukulongana kwa citungu nelyo ukulongana kwaibela ukubako ilyo umwiminishi uufumine ku Maofeshi ya Kalamba aletandalila umusambo.

Abantu abengi ukubikako fye na bashili Inte sha kwa Yehova, balatamba umulabasa wa JW Broadcasting uwa pa setilaiti pa ma TV yabo mu mayanda yabo. Na lyo line, kwaliba bamunyinefwe abengi abashikumanisha ukushita ifikabilwa pa kuti baletamba uyu mulabasa wa pa setilaiti. Pa kuti aba aba bwananyina nabo baletambako uyu mulabasa, mu Mayanda ya Bufumu ukucila pali 3,670 balibikamo ifikabilwa pa kutamba ifiba pa setilaiti pa kuti aba bwananyina baletamba umulabasa wa JW Broadcasting pa Mayanda ya Bufumu. Nga ca kuti pa Ng’anda ya Bufumu balikwata kale TV nelyo projekita, pa kushita ifikabilwa pa kutamba ifiba pa setilaiti e lyo no kufitwala uko filekabilwa bapoosapo nalimo K1,540. Nomba nga ca kuti pa Ng’anda ya Bufumu tabakwata TV nelyo projekita, pa kushita fyonse ifya kutambilako e lyo no kubatwalila babomfya indalama ukufika kuli K11,660.

Bamunyinefwe na bankashi balatasha sana ifi kwaba uyu mulabasa. Eluda umo ku Cameroon atile: “Uyu mulabasa waba fye kwati ni mana mu ciswebebe ku lupwa lwesu.” Munyinefwe Odebode uwa ku Nigeria atile: “Tulatamba uyu mulabasa imiku itatu mu mulungu ngo lupwa. Abana bandi batatu balafwaisha ukutamba uyu mulabasa. Limo balalomba no kuti tutambe umulabasa wa JW Broadcasting na pa nshiku tushiutamba.” Ba Rose nabo aba ku Nigeria batile: “Pali ino nshita, mu nshita ya kulatamba sana imilabasa iilanda pa filecita mu calo, ntamba umulabasa wa JW Broadcasting uwa pa setilaiti. Ilyo naletamba sana ifilecita mu calo, naleba sana no bulanda pa mulandu ne filecitika ica kuti no mulopa walebutukisha. Nomba ifiba pa mulabasa wa JW Broadcasting tafilenga ndesakamikwa sana kabili filankoselesha nga nshi! E mulabasa natemwisha. Ala lipaalo ilikalamba ukufuma kuli Yehova!”

Kangalila wa muputule ku Mozambique alembele ukuti mu muputule abombela, pa Mayanda ya Bufumu balibikamo ifya kubomfya pa kutamba imilabasa ya pa setilaiti. Aba bwananyina muli ifi filonganino balafika bwangu sana pa Ng’anda ya Bufumu, nalimo iawala limo nelyo ukucilapo ilyo ukulongana kushilatendeka pa kuti batambe umulabasa wa JW Broadcasting pa setilaiti.

Mu 2019 pa Kulongana kwa Citungu ukwa bafuma mu fyalo ifingi ukwabelele mu Johannesburg, ku South Africa, balibomfeshe uyu mulabasa ukutambisha amalyashi yakalamba, ukubikako fye na yalandile munyinefwe uwa mwi Bumba Litungulula, mu ncende shalekanalekana 9. Ba Sphumelele ababa muli Dipartimenti ya local Broadcasting pa musambo wa ku South Africa batile: “Nga ni kale nga twabomfeshe Intaneti pa kutambisha amalyashi. Nomba pa kubomfya Intaneti, ilingile ukuba bwino sana kabili kwaleba ukubomfya indalama ishingi pa kubomfya Intaneti. Umulabasa wa pa setilaiti uwa JW Broadcasting walilengele twibomfya indalama ishingi kabili takwaleba ukusakamana ukuti nalimo fya kulaputaukila.”

Tulatasha sana pa misangulo musangula ku mulimo wa mwi sonde lyonse. Bamunyinefwe na bankashi abengi mu Africa nomba balatamba umulabasa wa JW Broadcasting ukubomfya setilaiti. Tulatasha pa misangulo yonse iyo musangula ukubomfya inshila shalekanalekana ishaba pa donate.jw.org.