Bamishonari Balabatuma Ukuya mu Kubomba Ukufika “na ku Mpela ya Pano Isonde”

Yesu aebele abasambi bakwe ukuti: “Mukaba inte shandi . . . na ku mpela ya pano isonde.” (Imilimo 1:8) Inte sha kwa Yehova muno nshiku, balabomba apo bengapesha ukufikilisha aya mashiwi. Na lyo line mu ncende shimo ukubikako fye na mu ncende shimo ishikalamba umwafula sana abantu, abengi tabalaumfwapo imbila nsuma. Kabili mu fyalo fimo mwaba fye ba Nte abanono. (Mateo 9:37, 38) Bushe finshi tucita pa kuti tushimikile ku bantu abengi nga nshi?

Pa kumfwila ifunde lya kwa Yesu, Komiti ya Mulimo iye Bumba Litungulula iya Nte sha kwa Yehova, ilatuma bamishonari ku ncende uko aba kubila imbila nsuma bacepa mwi sonde lyonse. Pali ino nshita, mwi sonde lyonse mwaba bamishonari 3,090.a Abengi pali aba balipita mwi sukulu umo babasambilisha ifya mu Baibolo, pamo nga Isukulu lya Bakabila ba Bufumu. Bamishonari balaipeelesha ukufuma ku calo cabo no kuya mu kubombela ku calo cimbi. Pa mulandu wa kuti aba bamishonari aba cishinka bakalamba mu fya kwa Lesa, balibasambilisha ifya kubomba umulimo kabili balishiba ifingi pa mulimo babomba, balabomba bwino umulimo wa kubila imbila nsuma kabili ifyo bacita filalenga abasambi abapya ukulabapashanya.

Bamishonari Balabasakamana pa Kuti Balebika Amano ku Mulimo wa Kubila Imbila Nsuma

Pa misambo yonse paliba Iciputulwa Icilolekesha Pali Bakangalila wa Muputule na Bapainiya Baibela icaba mu Dipartimenti ya Mulimo, kabili babombela pamo na Komiti ya Musambo. Balasakamana bamishonari ukusanga umwa kwikala umusuma, indalama isho bengabomfya nga balwala e lyo no kubapeelako indalama isha kubomfya ku fyo balekabila. Mu mwaka wa mulimo uwa 2020, Inte sha kwa Yehova balibomfeshe indalama ukufika ku madola 27 isha ku America pa kusakamana bamishonari. Ifi basakamana bamishonari filalenga balebika sana amano ku mulimo wa kubila imbila nsuma e lyo no kukosha ifilonganino.

Fisuma nshi ficitika pa mulandu ne fyo bamishonari babomba umulimo wa kubila imbila nsuma? Ba Frank Madsen, ababa muli Komiti ya Musambo iya ku Malawi batile: “Pa mulandu ne fyo bamishonari bashipa ne fyo babomba bwino umulimo wa kubila imbila nsuma, calilenga ba-afwa aba mu cilonganino ukulabila imbila nsuma mu ncende ishayafya pamo nga mu ncende umwaba amayanda ayaba mu malinga no mo balanda indimi sha ku fyalo fimbi. Na kabili, ifi baipeelesha ukusambilila ululimi lumbi filakoselesha aba bwananyina, maaka maka abaice pantu balatendeka ukutontonkanya pa kubombako umulimo wa nshita yonse. Tulatasha sana Yehova pa kutupeela bamishonari.”

Munyinefwe uwaba muli Komiti ya Musambo ku calo cimbi na o alandile ukuti: “Ifyo bamishonari babomba fyaba bushininkisho bwa kuti abantu ba kwa Yehova balikatana mwi sonde lyonse. Nangu fye bantu abashili Inte sha kwa Yehova balamona ukuti te mulandu no kuti twalipusana intambi, ifyo tusambilila muli Baibolo fyalilenga twaba abaikatana.”

Bushe bamishonari bafwa shani bakasabankanya abo basanga uko babatuma? Ba Paulo aba ku Timor-Leste, balatasha sana pali bamishonari abo baba nabo mu cilonganino. Batile: “Kuno mwesu kwalikaba sana. Nomba nangu ca kuti uko bamishonari bafuma kwalitalala, tabaleka imiceele ya kuno yalenga balafilwa ukubila imbila nsuma. Lyonse fye ulucelo balabako ku kukumana kwa kuya mu mulimo wa kubila imbila nsuma. Ilingi ndabamona baleya ku fipempu akasuba e lyo ne cungulo ninshi nakukaba sana. Balilenga abantu abengi ukusambilila icine, ukubikako fye na ine. Bamishonari balicincila kabili babombela Yehova ubumi bwabo bonse, ne ci calilenga aba mu cilonganino bonse ukulabapashanya.”

Ba Ketti bapainiya ba nshita yonse mu Malawi balondolwele ifyo bamishonari ba-afwile ulupwa lwabo, batile: “Ilyo bamishonari abaupana babatumine ku cilonganino cesu, nine fye nali Inte ya kwa Yehova mu lupwa lwandi. Aba bamishonari balentungilila sana kabili baishileba ifibusa na ba mu lupwa lwandi. Ifyo bali ne mibele iisuma fyalilengele abana bandi ukumona ukuti ukubombela Yehova kulalenga waba sana ne nsansa. Pa mulandu ne fyo aba bamishonari baali, abana bandi abakashana batatu ni bapainiya ba nshita yonse kabili abena mwandi balitendeka ukulongana.”

Ni kwi kufuma indalama isha kusakamaninamo bamishonari? Shifuma ku misangulo iya mulimo wa mwi sonde lyonse, kabili abengi pa kusangula babomfya inshila balandapo pa donate.jw.org. Tulatasha sana pali iyi misangulo iyo musangula.