Umulandu Abengi Bakongwela

MICHAEL na Reena bailepishisha ubushiku bakumenye umwaka umo mu cupo cabo ku ncende imo ine uko baile pa nshita icupo cabo cali ubuluba. Lelo ilyo fye baleingila mu mwaka wa cibili uwa cupo cabo, baishilelolenkana ne mibele ya cine cine iishawama. Te mulandu na fintu balememenga, balifililwe ukulipile fipooswa fyabo.

Langulukeni abaupana na bambi. Robert ashele fye na loni munono uwa fya masambililo uo aali no kulipila lintu aupile Rhonda, na o uwali fye ne nkongole sha motoka isho alelipilako panono panono. Robert atila: “Ifwe bonse twalebomba incito ya lyonse, kabili capamo twalefola amadola 2,950 pa mweshi. Lelo tashaletufisha nangu kumo.” Rhonda alandilepo ati: “Tatwashitilepo icipe nangu cimo icikalamba nelyo ukucitapo icili conse ica mataki. Nafililwe fye ukwishiba uko indalama shaleya.”

Robert na Rhonda tabaali abanaŋani. Kabili Michael na Reena na bo bene tabaali banaŋani. Ni pi bakwatile ubwafya? Cali ni nkongole sha pa makardi ya kukongwelapo. Mu mwaka wa kubalilapo fye wine mu cupo, Michael na Reena pa makardi yabo aya kukongwelapo bakwetepo inkongole amadola 14,000. Pa numa ya kuba mu cupo imyaka ibili, inkongole sha kwa Robert na Rhonda pa makardi yabo shafikile shonse pamo amadola 6,000.

Anthony, umwaume wa mushinku wa pa kati, na o alolenkene no bwafya bwa mu fya ndalama ubwabipisha mu bumi bwakwe. Amafya akwete, nangu ni fyo, tayakumine ku makardi ya kukongwelapo. Mu 1993 akampani alebombako kalicefiweko, kabili Anthony alilufishe icifulo cakwe ica bumaneja apo alefolela amadola 48,000 pa mwaka. Pa numa ya ico, ukupayanishisha ulupwa lwakwe ulwa bantu bane bwali bwafya ubwine bwine kuli wene. Mu nshila yapalako, Janet, umufyashi umushimbe uwikala mu New York City, alefilwa ukukumanishe fyalefwaikwa pa ŋanda mu sho aalekwata pa mwaka mupepi na madola 11,000.

Ilyo kwena ca cine ukuti ubwingi bwa mafya ya ndalama kuti yayangukako nga wayasenda bwino, icishinka cili ca kuti tuleikala mu nshita lintu abengi bapelebela pa mulandu wa kwenda “mu buwelewele bwa mitima yabo.” (Abena Efese 4:17) Grace W. Weinstein, mu citabo cakwe ica The Lifetime Book of Money Management, alandapo kuti: “Ubwingi ubwa mafunde ya fya kubomba ne ndalama yalyaluka, yalipilibulwa umupwilapo ku fya bunonshi ifyo umuntu ashingasobela, imibele ya mutima iya ndakai iyakuma ku mipoosele ya ndalama ne misungile ya shiko, ne mibele ya bumi iileyaluka.” Mu calo casulama ico tuleikalamo, abantu bafulilako balecililako ukucisanga ukwaafya ukutungulula bwino imilandu ya ndalama iya pa lwabo ne ya lupwa.

Ku ca buseko, Michael na Reena, Robert na Rhonda, Anthony, na Janet balitunguluka bwino mu kubomba ne milandu yabo iya ndalama. Ilyo tushilalanguluka pa cabaafwile, natulolekeshe pa cimoneka nge ndalama ishiileta fye ico calundako ubulanda ku bantu abengi—icaba, makardi ya kukongwelapo.