Ukuputukako ku Misoka ya Kupangana—“Nali Yakuza”
“TATA, nga mwabwela, tukeseya bonse ku kulongana. Twasuminishanya, te fyo?” Napokelele uyu kalata ukufuma ku mwana wandi umwanakashi cikonke beli lintu nali mu cifungo umuku walenga itatu. Lyonse aalesangwa ku kulongana kwa Nte sha kwa Yehova pamo no mukashi wandi. Apantu bakalata ukufuma ku lupwa lwandi e balempeelako fye icisansamushi, nalisumine ukuti ndi no kuyasangwako nga fintu anjipwishe.
‘Mulandu nshi ndeikalila ubumi bwa misoka ubo buntalusha ku lupwa lwandi?’ e fyo naletontonkanya mu mutima. Naibukishe inshiku lintu nali umwaice sana. Tata afwile lintu nali fye pa mushinku wa myeshi 18, kanshi nshibukisha fye ne cinso cakwe. Mayo alyupilwe imiku ibili pa numa ya mfwa ya kwa Tata. Imibele ya mu lupwa iya musango yo yalinyambukile nga nshi, kabili ku sukulu lya ku sekondare natendeke ukulabishanya ne ntalamisoka. Nasangwike uwa musasu kabili ilingi nalesangwa mu mbuli lintu twafuma pa sukulu. Lintu nafikile mu mwaka wa cibili ku sekondare, napangile ibumba lya bana be sukulu ilya kulwa ne bumba limbi. Pali uyo mulandu, balinjikete no kuntuma ku cifungo ca kusalapula pa kashita kanono.
Nali fye ngo mupila uwalekunkuluka ukulola ku bumi bwa lukaakala. Mu kwangufyanya napangile akalibumba ka bamapuusu, no kulaelepeta pa maofesi ya bayakuza. Pa myaka ya bukulu 18, nasangwike umo uwa mwi bumba lilya uwakamamo na menshi. Lintu nali ne myaka 20, balinjikete pa milandu yalekanalekana iya lukaakala iyo nacitile no kunkaka imyaka itatu mu cifungo. Intanshi, nabombele pa nshita imo mu Nara Juvenile Prison, lelo incitilo shandi tashawamineko. Kanshi bantumine ku cifungo cimbi, ica bakalamba. Lelo naile fye ndebipilako nasuka nafika na ku Kyoto mu cifungo ca ntalamisoka ishine shine.
‘Bushe mulandu nshi ndetwalililo kulatale misoka ya musango yu?’ e fyo naipwishe ne mwine. Ntila nga naibukisha, njisa ku kwiluko kuti kwali kupelulula kwa buwelewele uko nalepelulula. Pali ilya nshita, naletila incitilo sha musango ulya e bwaume, ukushininkisho kuti ndi mwaume. Lintu bandekeeleko pa mushinku wa myaka 25, bamukuukulu banandi balencindika nga kanabesa. Nomba inshila yaliswike ukuti ningafika ku cifulo casumbuka mu mibombele ya buntalamisoka.
Ico Ulupwa Lwandi Lwacitilepo
Mupepi na pali iyi ine nshita nalyupile, na mu kwangufyanya ine no mukashi wandi twakwete abana babili abanakashi. Ubumi bwandi nangu line, tabwayalwike iyo. Natwalilile ukulapitaana lyonse ukulaya ku kapokola—naleuma abantu no kulapoke ndalama mu kufinsha. Conse ico nalecita calendetela umucinshi kuli bamukuukulu banandi no kuncetekela ku mukalamba we bumba. Mu kupelako, uwali “munyinane” mukalamba muli bayakuza alitungulwike ukufika pa cifulo casumbuka pali balya bamukuukulu no kusanguka umukalamba. Nalisaminwe pa kusanguka uwa cibili.
‘Bushe umukashi wandi na bana bandi bayumfwa shani pa nshila njikalilamo ubumi?’ e fyo naletontonkanya mu mutima. Bafwile tabomfwa bwino ukukwato mulume kabili wishi intalamisoka. Napooselwe na kabili mu cifungo pa mushinku wa myaka 30 e lyo na lintu nali ne myaka 32. Ili lyena, iyi myaka itatu bampingwilile ukuba mu cifungo yalinkoseele icine cine. Abana bandi tabaasuminishiwe ukwisa ku kuntandalila. Nalefwaisha sana ukulanda na bo no kubakumbatila.
Mupepi na pa nshita natendeke ukubombela icifungo uyu muku wa kulekelesha, umukashi wandi atendeke ukusambilila Baibolo ne Nte sha kwa Yehova. Mu kukonkanya alenembela pa lwa cine cintu aalesambilila. Naletwishika nati, ‘Nga kanshi cine nshi ici cintu umukashi wandi alelandapo?’ Nalipwishishe ukubelenga Baibolo onse ilyo naali mu cifungo. Nalelanguluka pa fyo umukashi wandi aalelanda muli bakalata bakwe pa lwe subilo lya ku nshita ya ku ntanshi na pa lwa mifwaile ya kwa Lesa.
Isubilo lya bantunse ukwikala kuli pe na pe muli Paradise pe sonde lyali lya kucebusha pa mulandu wa kuti imfwa yalentiinya nga nshi. Lyonse naletontonkanya nati, ‘Nga wafwa, awe ninshi calala capwa.’ Ntila nga naibukisha, njisa ku kwiluko kuti cali kutiine mfwa e kwalenkunta ukucena bambi lintu bena bashilancena. Bakalata ba mukashi wandi na bo banengele ukumona bucafye ubwa mabuyo yandi aya kuyafika ku cifulo casumbuka mu mibombele ya bamukuukulu.
Nalyo line, nshakuntilwe ukuti nsambilile icine. Umukashi wandi aliipeele kuli Yehova no kusanguka umo uwa Nte shakwe ishabatishiwa. Nangu cingatila muli kalata wandi nalisumine ukuti nkaya ku kulongana kwabo, nshaletontonkanya ukuti nkasanguka umo uwa Nte sha kwa Yehova. Naletontonkanya kwati umukashi wandi na bana nabaya ukwalepesha, ukunsha ku numa neka.
Ukufuma mu Cifungo
Ubushiku bwasukile bwafika ubwa kuti bankakule. Pa cipata ce linga ica Nagoya Prison, bamukuukulu abengi balitanteme ku kumpokelela. Mwi bumba likalamba ilya bantu, nangu cibe fyo, nalefwayamo fye umukashi wandi na bana bandi abanakashi. Pa kumona abana bandi, ifyo baakulile mu myaka fye itatu ne myeshi mutanda, nalililile filamba.
Inshiku shibili pa numa ya kubwelela ku ŋanda, nafikilishe ico nalaile umwana wandi cikonke beli no kuyasangwa ku kulongana kwa Nte sha kwa Yehova. Nalipapile ukumona imibele ya cimwemwe kuli bonse abasangilweko. BaNte balimpokelele mu kukaba, lelo naleyumfwa ngo ushilingile. Lintu pa numa naishileishiba ukuti abo bamposeshe balinjishibe ukuti nali ne cikulilo ca buntalamisoka, calimpeseshe amano. Nalyumfwile icikabilila cabo, nangu ni fyo, kabili nalicebushiwe ne lyashi lyashimpilwe pali Baibolo ilyapeelwe. Lyalelanda pa lwa bantu ukwikala kuli pe na pe muli Paradise pe sonde.
Ukutontonkanya pa lwa mukashi wandi na bana bandi abanakashi ukupusuka ukwingila muli Paradise e lyo ine ukonaulwa canengele ukucushiwa apakalamba. Nalyetetwile nga nshi pa co ningacita pa kuti ningekala kuli pe na pe no lupwa lwandi. Natendeke ukulanguluka ukuputukako ku bumi bwandi ubwa bumukuukulu, kabili natendeke ukusambilila Baibolo.
Ukuputuka ku Bumi Bwandi Ubwa Buntalamisoka
Nalilekele ukusangwa kuntu bamukuukulu balekumanina no kuleka ukubishanya na bayakuza. Tacali icayanguka ukwalula inshila naletontonkanishishamo. Naleensha mpanga yonse cimotoka nashitile ku nse ya calo ku musamwe fye—ubulendo bwa matutumuko. Cansendeele imyaka itatu pa kuti njise nkabushe motoka ukuti nkwateko uwalinga fye. Na kabili nakongamine ku kufwaya inshila ya kucibondola. Ilyo nalesambilile cine, nangu cibe fyo, nalemono kuti nalekabila ukwaluka. Lelo nga fintu Yeremia 17:9 asosa, “umutima wa kufutika ukucile fintu fyonse, kabili walilwalisha.” Nalishibe icalungama lelo calenkosela ukubombela pa co nalesambilila. Amafya nalolenkene na yo yamoneke kwati lupili ulukalamba. Nalecushiwa, kabili ilingi nalelanguluko lwa kuleka ukusambilila no kuleka ukutontonkanya pa lwa kusanguka umo uwa Nte sha kwa Yehova.
Lyene, uwaletungulula isambililo lya Baibolo kuli ine alaalike kangalila wenda uwafumine ku cikulilo icapalile icikulilo candi ukuti akesepeela ilyashi mu cilonganino cesu. Ukufuma ku Akita, bamailoshi 400, ukufuma konse uko aishile ku Suzuka ku kunkoselesha. Pa numa ya ico, lyonse ilyo nalenaka no kufwaya ukuleka, nalepokelela kalata ukufuma kuli wene, ukunjipusha nga nalishikatele mu nshila ya kwa Shikulu.
Natwalilile ukulapepa kuli Yehova ukunjafwa ukuputukako umupwilapo kuli bayakuza. Nalicetekele ukuti Yehova aali no kwasuka amapepo yandi. Mu April 1987, nasukile nafumamo mwi bumba lya bayakuza. Apantu ubukwebo bwandi ne mwine e bwalenenga ukuya ku fyalo fimbi cila mweshi, ukusho lupwa lwandi, nafwaile incito imbi iya kusunge fikuulwa ubusaka. Ici calenshilako ifyungulo kasuba ku mibombele ya ku mupashi. Pa muku wa kubalilapo, napokele enifulupu wa malipilo. Yali iyaanguka, lelo yanengele ukuba ne nsansa.
Lintu nali uwa cibili mwi bumba lya bayakuza, nali fye bwino mu fikwatwa, lelo nomba nkwete ifyuma fya ku mupashi ifishibonsa. Ninjishiba Yehova. Ninjishiba imifwaile yakwe. Ndi ne fishinte ifya kwikalilako. Ndi ne fibusa fya cine abasakamana. Muli bayakuza, bamukuukulu balemoneka fye kwati balekusakamana, lelo takwali yakuza untu naishibe, takwali nangu fye umo, uwali no kuipeela umwine pa mulandu wa bambi.
Mu August 1988, nalangishe ukuipeela kwandi kuli Yehova ukupitila mu lubatisho lwa mu menshi, kabili umweshi wakonkelepo, natendeke ukupoosa amaawala mupepi na 60 pa mweshi ukwebako bambi pa lwa mbila nsuma iyaalwile ubumi bwandi. Nalibomba ngo mutumikishi wa nshita yonse ukutendeka March 1989 kabili nomba nalipeelwa ishuko lya kubomba ngo mubomfi utumikila mu cilonganino.
Nali na maka ya kulubukako ku mulondo onse uwa mu bumi bwa buyakuza. Nangu ni fyo, umo wena walishala. Caba lulembo ulwaba pa mubili wandi ulunjibukishako no kwibukisha ulupwa lwandi na bambi, ulwa buyakuza ubo napitilemo. Inshita imo, umwana wandi umwanakashi umukalamba abwelele ku sukulu alelila, ati takaye ku sukulu na kabili pantu abanankwe bamwebele ukuti naali yakuza no kuti nalikwete nembo pa mubili. Nalilanshenye uyu mulandu na bana bandi abanakashi, kabili balishileumfwikisha bwino bwino. Ndepembelela ubushiku lintu isonde likaba ni paradise no mubili wandi ukusanguko “walelemo kucilo wa mwaice.” Lyene inembo ne fibukisho fya myaka 20 mu bumi bwa buyakuza fikaba nafipita. (Yobo 33:25; Ukusokolola 21:4)—Nga fintu cashimikwa na Yasuo Kataoka.
[Icikope pe bula 11]
Ndafulukisho bushiku lintu inembo shandi na sho shikafuutwa
[Icikope pe bula 13]
Pa Ŋanda ya Bufumu no lupwa lwandi