Imbuto Ishatwele Ifisabo pa Numa ya Myaka Iingi

Kalata uwakonkapo apokelelwe pa mulandu wa cipande caleti “Amafya na Mapaalo ya Kukusha Abana Baume 7,” muli “Loleni!” wa January 8, 1999.

Kuli Munyina na Nkashi Dickman,

E lintu fye nacipwa ukubelenga ilyashi lyenu, kabili namulembela uyu kalata. Naishibe ulupwa lwenu imyaka iyapita mu Mississippi muli ba 1960 na 1961. Na kuba, nalesambilila na bana benu, kabili ilingi naleisa pa mwenu ku kwangala na bo. Lelo ifi te fyo natemenweko sana lintu nali umwaice. Nangu fye nali umwaice, ico natemenweko sana ku balumendo ca kuti ku sukulu tabalepika sulupu ku mendela pa mulandu wa kampingu wabo uwa Bwina Kristu. Nangu cingati nalepepa kwi calici lya Grandview Baptist Church, lintu umwana wenu umo umulumendo anondolwele fintu asuminamo, nalishibe ukuti alilungike.

Nshileibukisha bwino nampo nga umwana wenu e wampeele icitabo ca Ukufuma Kuli Paradise Waluba Ukuya Kuli Paradise Wanonkwa,a nelyo naibile fye. Lelo ico njibukisha ca kuti nalicibelengele conse. Pali iyo nshita, nacimwene fye nge citabo ca malyashi yasuma. Nshaishibe ukuti imbuto sha cine shalibyelwe ishali no kwikala imyaka iingi ukwabula ukumena.

Ulupwa lwandi lwakuukile ku Kapinda ka ku kuso aka Mississippi mu 1964, kabili nalilekele ukuya ku calici. Ubumbimunda bwa mipepele bwalimpelengenye, ica kuti pa myaka iingi nshalefwaya ukuya ku calici.

Imyaka iingi pa numa, lintu natendeke ukutontonkanyapo sana pa lwa mifwaile ya bumi, naliilwike ukuti nalekabila ukwampana na Kalenga. Nalefwaya uko kwampana ukwabula ubumbimunda bwa mipepele. Shilya mbuto sha cine ishabyelwe imyaka iyapita shalitendeke ukumena; nshailwike fye pa lwa ico.

Naletontonkanya pa cishinka ca kuti nshalefwaya ukuya ku muulu; nalefwaya ukwikala pano pene pe sonde. Naletontonkanya ukuti lino isonde lyali bubumbo bushaiwamina nga nshi, e co mulandu nshi Lesa engalyonawila? Na kabili nshaletontonkanya ukuti Yesu ali ni Lesa. Aba ni Lesa, ninshi ilambo lyakwe nga lyali ilya bufi. Aya matontonkanyo, imyumfwile, no kushininwa, nga e fintu mwingafita, fyalipusene ne fyo nasambilile ku Baptist Church. E co natendeke ukupepa sana, na o Yehova alyankwileko mu kwangufyanya. Pa numa ya nshiku fye ishinono Inte shaishile pa mwandi, kabili mu kwangufyanya nalitendeke ukusambilila Baibolo. Nangu fye nshalemonana ne Nte sha kwa Yehova ukutula ilyo naishibene no lupwa lwenu ukufika lintu natendeke ukusambilila, nshalekele ukucindika abana benu no kucindika ukushipa kwabo mu kucita icalungama. Lintu natendeke ukusambilila no kwishiba ifingi, ifintu fyatendeke ukulondoloka. Cansendele umwaka umo na hafu pa kuwamya ubumi bwandi. Nasukile nabatishiwa mu 1975.

Lyonse lintu natontonkanya pa fyo imibele yesu ingacitilo bunte ukwabula ifwe ukwishiba, ntontonkanya pa lwa lupwa lwenu. Ilyo twatontonkanya pa bucindami bwa kutande mbuto sha Bufumu ishingi pa mulandu wa kuti lyonse tatwishiba kuntu nelyo lintu shikamena, ndeshiba ku fyancitikila fintu ici caba ica cine.

Ndemutasha pa kuba pa bantu ba kwa Yehova na pa kuba aba bucishinka ku fisumino fyenu pali ilya nshita. Tamwaishibe ukuti mwalingafwile ukusanga icine. Imibele yenu no kushininwa, pamo ne ya bana benu, fyalengele ulubuuto lumbalikile. Natontonkenye ukuti nshakatale njishiba ifyo mwaikele atemwa ukuba ne shuko lya kumutasha. Na kabili namutasha.

Namucelela mu kutemwa kwa Bwina Kristu,

L.O.

[Futunoti]